Bisalu Bilevi 4 - La Sainte Bible en Langue Yipunu

Pagu tsiutsinduia dibumi a. Pagu tsiyivunda yibavagulitsi bapagu

¹ Fumu amavosa na Moise rie:

² Tsingula baIsrael rie: Pa mutu osumuna diruma dimosi diFumu tsiri ujaba, novaga mambu amagaa mawelimina uvaga, ovagulanga pagu tsietsitsi:

³ Pa agumavaga dibi dieni avu yivunda yibavagulitsi bapagu agumabiatsu na mu dionyi amarombisa batu mbela, ovagulila Fumu pagu jiutsindula dibumi, mulumi ngombi agugaa na yifu.

⁴ Jandi obega mulumi ngombi o dikotulu diNdagu Yibenguna va gusu Fumu; va julu vana osakiga gogu andi va julu muru umulumi ngombi agu otabula muru va gusu Fumu.

⁵ Yivunda yibavagulitsi bapagu agumabiatsu obonga malungu mamulumi ngombi, nomabega o Ndagu Yibenguna.

⁶ Oputiga mulembu andi mu malungu na va gusu Fumu otsatsa dumbu duMbura Nsambi yisambuali yikumbu.

⁷ Osinga malungu mu masiyi mayinyensulu yibima bimbunga jiboti o Mbura Nsambi mbana owitila malungu amosialulu va tsi yinyensulu yipagu ayivu va dikotulu diNdagu Yibenguna.

⁸ Ogusula matsi mangombi jiutsindula dibumi; matsi mamisopu na biotsu abinamana muna,

⁹ na mipigu miotsu mibeji na matsi mamipigu na mabambambi na muvogumbombu aguneni aguibambini na mipigu agu otabula.

¹⁰ Biotsu bina bivu dedi na abimagusulu mu yibulu ayimavagulu pagu jidinonga; yivunda yibavagulitsi bapagu obinyensa va yinyensulu yipagu.

¹¹ Tumba mukata na misonyi na muru na bakondu na misopu na mambi;

¹² bimulumi ngombi biubegu o tsomu dimbu va mbura jilioma aji bebuayili mabufu: vana mbura eni biunyensulu.

b. Pagu tsidibuli diotsu

¹³ Pa dibuli diotsu diIsrael dimasumuna ne diruma dimosi diFumu tsiri ujaba ava bamavayila amagaa mawelimina uvagu, bana mbela mu dionyi.

¹⁴ Yika dijabunu yiri bamavaga dibi, dibuli diuvagula mulumi ngombi pagu jiutsindula dibumi na bogubega o Ndagu Yibenguna.

¹⁵ Bivunda biIsrael bosakiga miogu miogu va julu muru ungombi va gusu Fumu na botabula muru umulumi ngombi va gusu Fumu.

¹⁶ Yivunda yibavagulitsi bapagu agumabiatsu obega malungu mamosi mangombi o Ndagu Yibenguna;

¹⁷ jandi oputiga mulembu andi mu malungu va gusu Fumu, otsatsa dumbu duMbura Nsambi yisambuali yikumbu.

¹⁸ Osinga malungu mu masiyi mayinyensulu yibima bimbunga jiboti ayivu va gusu Fumu o Mbura Nsambi; mbana opuga malungu amesiali va tsi va gusu yinyensulu yipagu ayivu va dikotulu diNdagu Yibenguna.

¹⁹ Ogusula matsi motsu mamulumi ngombi, yivunda yibavagulitsi bapagu, omanyensa va yinyensulu yipagu.

²⁰ Ovayila mulumi ngombi eni munongu mosi nana bevayili na mulumi ngombi upagu jiutsindula dibumi. Anana yivunda yibavagulitsi bapagu otsindulila dibumi didibuli diotsu, mbana botandu mabi mogu.

²¹ Obega abiusialulu bimulumi ngombi o tsomu dimbu, obinyensa nana amanyensila bimulumi ngombi agutega. Ajina la pagu jiutsindulila dibuli dibumi.

c. Pagu jiyivunda

²² Pa yivunda yidibuli amasumuna ne diruma dimosi diFumu Nsambi andi tsiri ujaba ava amavayila amagaa mawelimina uvagu, ana mbela mu dionyi.

²³ Yika dijabunu yiri amavaga dibi, jandi ovagula pagu jimulimi yinsabi agugaa na yifu.

²⁴ Osakiga gogu andi va julu muru uyinsabi ayi otabula muru va gusu Fumu va mbura aji bebokili bibulu bipagu tsiunyensa. Ajina la pagu jiutsindula dibumi.

²⁵ Muvagulitsi upagu oputiga mulembu mu malungu mayibulu ayimaboku yiutsindula dibumi nomasinga mu masiyi mayinyensulu yipagu, opuga malungu amesiali va gusu yinyensulu yipagu.

²⁶ Onyensa matsi motsu va yinyensulu yipagu nana amanyensila matsi mapagu jikabusulu tsimaboti. Anana muvagulitsi upagu ovayila utsindula dibumi didibi diyivunda yidibuli na dibi diandi diumutandu.

d. Pagu jimutu yika la mutu

²⁷ Pa mutu yika la mutu amasumuna ne diruma dimosi diFumu tsiri ujaba ava amavayila amagaa mawelimina, ana mbela.

²⁸ Yika dijabunu yiri amavaga dibi, jandi ovagula pagu jiyibusi yiyinsabi ayigaa na yifu mu diambu didibi adi amavaga.

²⁹ Osakiga gogu andi va julu muru uyibulu yipagu jiutsiridula dibumi ayi otabula muru va mbura aji bebokili bibulu bipagu tsiunyensa.

³⁰ Muvagulitsi upagu oputiga mulembu mu malungu mayibulu yieni nomasinga mu masiyi mayinyensulu yipagu na opuga malungu amesiali va tsi va gusu yinyensulu yipagu.

³¹ Muvagulitsi upagu ogusula matsi motsu nana begusulili matsi mapagu jikabusulu tsimaboti na omanyensa va yinyensulu yipagu na jionyi jiuba pagu ajiugulunu mbunga jiboti ombu Fumu. Anana ovayila utsindula dibumi didibi dimutu yika la mutu na dibi diandi diumutandu.

³² Pa mutu yika la mutu ovagula muana yindombu pagu jiutsindula dibumi vengu ovagula aguyibusi agugaa na yifu.

³³ Osakiga gogu andi va julu muru uyibulu ayi otabula muru novagula pagu jiutsindula dibumi va mbura aji bebokili bibulu bipagu tsiunyensa.

³⁴ Muvagulitsi upagu oputiga mulembu mu malungu mayibulu yieni nomasinga mu masiyi mayinyensulu yipagu, opuga malungu amesiali va tsi va gusu yinyensulu yipagu.

³⁵ Ogusula matsi motsu nana begusulili matsi mayindombu yipagu jikabusulu tsimaboti. Muvagulitsi upagu omanyensa va yinyensulu yipagu nana pagu ajimasielusunu o muji va gusu Fumu. Anana otsindulila dibumi dimutu yika la mutu mu diambu didibi adi amavaga na dibi diandi diumutandu.