Bisalu Bilevi 24 - La Sainte Bible en Langue Yipunu

Dingasa diMbura Nsambi

¹ Fumu amatsingula Moise rie:

² Ruma baIsrael ugubeyila matsi maoliva madingasa yiri balambi bagotsima, ubanda tsisiga te na kedi.

³ Dingasa diuba va gusu dumbu dudugabu aduvu va gusu yigara yipangini o Mbura Nsambi, Aaron odikelisanga yiri balambi bagotsima ubanda tsisiga te na kedi va gusu Fumu. Aguna uvu mugaga umutubu te na bategula betu.

⁴ Otsonsiga balambi badingasa ditindi lora yiri bagotsima mikolu miotsu va gusu Fumu.

Mapa amamavagululu Nsambi

⁵ Gukabonga fufu na gukavaga digumi na mapa mabeji; dipa dipa diuba dibietsu bibeji mu digumi.

⁶ Gukamagukiga maguki mabeji, diguki diguki mapa masiamunu va tavula jitindi lora ajivu va gusu Fumu.

⁷ Gukasunsa bima bimbunga jiboti va julu diguki diguki, biuba yirangumunu ayiunyensu va yivinga yimapa na biuba pagu ajiusielusunu o muji va gusu Fumu.

⁸ Kadi yilumbu yitsona bogukiga mapa meni va gusu Fumu: jivu pangini jimutubu aji baIsrael bokelisanga.

⁹ Moba maAaron na baana bandi bababaala, jogu bomaji va mbura Nsambi; mu mbari monyi moba tindi yingitsi ombu gogu, divu dikabu dipagu atsiusielusunu o muji va gusu Fumu. Aguna uvu mugaga umutubu.

Mukilu udibaala adimasienga Nsambi

¹⁰ Vamaba muana dibaala agumaburu na mugetu umuisi Israel, taji andi amaba muisi Egypte: muana eni amarasuna baIsrael na amatsunda na dibaala dimosi.

¹¹ Muana dibaala agumaburu na muisi Israel amasabula na amasienga diina diNsambi. Bamamubega ombu Moise. Diina dinguji andi Chelomit muana mugetu agu Dibri amabura, aguvu muisi yifumba yiDan.

¹² Bamamukotisa o tsugu te na Moise ogulu adi Fumu oruma.

¹³ Fumu amatsingula Moise rie:

¹⁴ Bega musabulitsi o tsomu dimbu; botsu abamamugulu bosakiga miogu va julu muru andi mbana dibuli diotsu diumutindila mamanyi.

¹⁵ Gukatsingula baIsrael rie: Uotsu agusienga Nsambi andi, mukilu udibi diandi ubi va julu muru ujaʼ beni.

¹⁶ Jandi agusabula diina diFumu aboku; dibuli diotsu diumutindila mamanyi; ne muenyi ne muisi bulongu, afu; mu mbari amasabula diina diNsambi.

¹⁷ Jandi agudimbisa dibaala kuba te na ofu, jaʼ wandi aboku.

¹⁸ Jandi agudimbisa yibulu kuba te na yiufu ovinsa ayiandi; biusoga miuru.

¹⁹ Pa mutu amanemisa mutu nandi, jaʼ wandi onemusu nana atsimunemisila;

²⁰ utsungula mbatsi, jaʼ wandi ogutsungula; disu na disu mosoga miuru, dinu na dinu mosoga miuru; onemusu pura munongu mosi nana aji amanemisa mutu nandi.

²¹ Jandi aguboka yibulu ovinsa yisusu, tumba jandi aguboka mutu, jaʼ wandi aboku.

²² Botsu boduka mugaga umosi; ne batsiga ne benyi; menu la Fumu Nsambi enu.

²³ Moise amatsingula baIsrael motsu mama; bamabega musabulitsi o tsomu dimbu na bamamutindila mamanyi. BaIsrael bamaduka adi Fumu amaruma Moise.