Bisalu Bilevi 23 - La Sainte Bible en Langue Yipunu

Batemu bafeta babaIsrael: Yilumbu yitsona

¹ Fumu amatsingula Moise rie:

² Tsingula baIsrael rie: Bafeta baFumu aba dutubula boba tindi mbila tsiNsambi. Bafeta bami ababa:

³ Dusalanga bilumbu bisiamunu tumba yilumbu yimusambuali yivu yitsona, yilumbu yiuvuma; yiubatindi mbilaNsambi. Duyasala ne yisalu yimosi mu yilumbu yieni: yionyi yivu tsona jiFumu mu mbura tsienu tsiotsu atsi duitsanini.

⁴ Dutubulanga bafeta baFumu abavu tindi mbila tsiNsambi va temu tsietsitsi tsiwelimina:

Feta Paque na Feta jimapa amagaa na dufunusu

⁵ Mu tsungi jitega na mu yilumbu yidigumi na muina, tsisiga eni duji Paque jiFumu.

⁶ Mu yilumbu yidigumi na biranu bitsungi eni yiuba yifeta jimapa amagaa na dufunusu jiuyitsila Fumu; mu yisambuali yibilumbu dujanganga yika mapa amagaa na dufunusu.

⁷ Yilumbu yitega duwagula mbila Nsambi; duyasala ne yisalu yimosi.

⁸ Mu yisambuali yibilumbu duvagulila Fumu pagu atsiusielusunu o muji. Yilumbu yimusambuali yiuba tindi yimbila Nsambi; duyasala ne yisalu yimosi.

Feta jimukundu utega

⁹ Fumu amatsingula Moise rie:

¹⁰ Tsingula baIsrael rie: Ava dutolila o bulongu abu nyiduveyi duvega mukundu ubitega bidigumba dienu ombu muvagulitsi upagu.

¹¹ Oyenaviusanga mukundu eni va gusu Fumu yiri usingu; tsona jinovioga muvagulitsi upagu omueguviunsa va kedi ajiduki.

¹² Yilumbu ayi duviunsila mukundu eni, duvagulila Fumu muana yindombu agukavu yilima yimosi na agugaa na yifu, pagu jiunyensa.

¹³ Duvagula pagu jitsangu wandi: bibeji mu digumi bifufu atsimalambu na matsi, ajiuvagulu pagu ajiusielusunu o muji ajiugulunu mbunga jiboti ombu Fumu. Va julu vana duvagula pagu jiunu; mbuta jimosi na ditingi jimalamu.

¹⁴ Te na yilumbu ayi duvagulila Nsambi enu pagu duyaji ne dipa ne tsangu tsigoku vo tsiroku. Aguna uvu mugaga umutubu ubategula benu mu mbura tsiotsu atsi dutsaninanga.

Feta jidutsonsugu

¹⁵ Ubanda na yilumbu ayiuduka tsona, jiyilumbu ayi dubeyila mukundu pagu jiuviunsa, duranga yisambuali yitsona.

¹⁶ Duranga magumaranu mabilumbu te na yilumbu ayiuduka tsona jimusambuali; mbana duvagulila Fumu pagu jigona.

¹⁷ Dubeyila o mandagu menu mapa mabeʼ mabeji yiri moviunsu; dipa dipa diuvagu na bietsu bibeji mu digumi bifufu na dufunusu; monyi mavu pagu tsiumanga tsiFumu.

¹⁸ Va julu mapa meni, duvagulila Fumu pagu jiunyensa; yisambuali yibaana babindombu abakavu yilima yimosi na abagaa na bifu na mulumi ngombi na balumi babeji babindombu, dusobana jionyi na pagu jitsangu na pagu jiunu, tsionyi tsiuba pagu atsiusielusunu o muji atsiugulunu mbunga jiboti ombu Fumu.

¹⁹ Duvagula mulumi yinsabi pagu jiutsindula dibumi na baana babindombu babeji abakavu yilima yimosi, pagu tsikabusulu tsimaboti.

²⁰ Muvagulitsi upagu oviunsa bibulu bieni va gusu Fumu va mosi na pagu tsiumanga na bindombu bieni bibeji; bionyi biuba bimuvagulitsi upagu mu mbari bimawakusu ombu Fumu.

²¹ Muna yilumbu yieni dutubula feta ajiuba tindi mbila Nsambi; duyasala ne yisalu yimosi mu yilumbu yieni. Aguna uvu mugaga umutubu te na bategula benu mu mbura tsiotsu atsi jenu dutsaninanga.

²² Ava dutsonsiyila magumba menu, dusila mbura mu manungi menu aji dutsonsiga abivu vana na duyabola abiusialulu. Dusilila bijaga na benyi bionyi. Menu la Fumu Nsambi enu.

Feta jidurangumunu

²³ Fumu amatsingula Moise rie:

²⁴ Tsingula baIsrael rie: Yilumbu yitega yitsungi yimusambuali yiuba yilumbu yienu yiuvuma, duyitubula yilumbu yidurangumunu na mufi mamimbanda, yiuba tindi mbila Nsambi.

²⁵ Mu yilumbu yieni duyasala ne yisalu yimosi na duvagulila Fumu pagu ajiusielusunu o muji.

Yilumbu yiutsindula dibumi

²⁶ Fumu amatsingula Moise rie:

²⁷ Yilumbu yimugumi yitsungi eni jimusambuali yiuba yilumbu yiutsindula mabumi, duwagula tindi mbila Nsambi, dukevongula va gusu andi na duvagulila Fumu pagu ajiusielusunu o muji.

²⁸ Muna yilumbu yieni duyasala ne yisalu yimosi mu mbari yivu yilumbu yiutsindula mabumi, yilumbu yimatubulu utsindula dibumi va gusu Fumu Nsambi enu.

²⁹ Mutu uotsu agugokevongula va gusu andi muna yilimbu yieni agusulu va gari batu bandi.

³⁰ Mutu uotsu agusala yisalu yiotsu muna yilumbu yieni, nyumugusula va gari batu bandi.

³¹ Duyasala ne yisalu yimosi. Aguna uvu mugaga umutubu te na bategula benu, mu mbura tsiotsu atsi dutsaninanga.

³² Ayina yiuba yilumbu yienu yiuvuma dukevongula va gusu andi; ubanda na tsisiga jiyilumbu yimufu te na tsisiga jiyilumbu yimugumi, duyitsa yilumbu yienu yiuvuma.

Feta jimasamba

³³ Fumu amatsingula Moise rie:

³⁴ Tsingula baIsrael rie: Yilumbu yiyigumi na muranu yitsungi eni jimusambuali, yiuba yifeta masamba yiuyitisila Fumu te na yisambuali yibilumbu.

³⁵ Yilumbu yitega yiuba yitindi mbila Nsambi: duyasala ne yisalu yimosi.

³⁶ Te na yisambuali yibilumbu duvagulilanga Fumu pagu atsiusielusunu o muji. Mu yilumbu yimunana duwagula tindi mbila Nsambi na duvagulila Fumu pagu ajiusielusunu o muji; yiuba yibenguna yineni: duyasala ne yisalu yimosi mu yilumbu yieni.

³⁷ Abana bavu bafeta baFumu na tindi mbila tsiNsambi atsidutubulanga yiri batu bovagulila Fumu pagu atsiusielusunu o muji tsiminongu na minongu: pagu tsiunyensa, pagu jitsangu na bibulu na pagu jiunu; kadi pagu na yilumbu yijionyi nana yimatubululu.

³⁸ Va julu vana dukelisanga bilumbu biuvuma biFumu na dubuesanga uvega ombu Fumu pagu na pagu tsiudugusu pangini na pagu tsitondini.

³⁹ Mu yilumbu yimugumi na biranu bitsungi jimusambuali ava dutsonsiyila magumba, duvaga feta jiuyitsila Fumu te na yisambuali yibilumbu: yilumbu yitega yiuba yilumbu yiuvuma na yilumbu yimunana wandi yiuba yiuvuma.

⁴⁰ Mu yilumbu yitega, dubonga milunda mimiri amiboti na metu na bitayi bimiri abivu mafunda na manyanyi amavu mu migula mimijamba; dusangilanga va gusu Fumu Nsambi enu te na yisambuali yibilumbu.

⁴¹ Dukelisanga feta eni kadi yilima uyitsa Fumu te na yisambuali yibilumbu. Aguna uvu mugaga umutubu te na bategula benu. Dujikelisanga mu tsungi jimusambuali.

⁴² Jenu baIsrael dutsananga te na yisambuali yibilumbu o masamba,

⁴³ yiri bategula benu bojaba yiri nyimatsanisa baIsrael o masamba ava nyimabapalisila o bulongu buEgypte. Menu la Fumu Nsambi enu.

⁴⁴ Anana Moise amatubulila baIsrael bafeta baFumu.