Bisalu Bilevi 22 - La Sainte Bible en Langue Yipunu

c. Nsalusulu ji-abimavagululu Nsambi

¹ Fumu amatsingula Moise rie:

² Tsingula Aaron na baana bandi bababaala rie: Bakebini na bima biyingitsi abimakwakusu na baIsrael, bayasabula diina diami diNsambi. Menu la Fumu.

³ Batsinguli rie: Dibaala diotsu adivu na muinsi diyifumba yienu te na bategula benu adiubambana na bima biyingitsi abi baIsrael bekwakisi, dibaala dieni ogusulu va gusu ami. Menu la Fumu.

⁴ Dibaala diotsu diyifumba yiAaron adiuba na nyambi vo suta, ayaji biguji biyingitsi te na amalioma. Diuba munongu mosi ne na jandi oyibembi mfumbi na jandi agumapalisa masuba.

⁵ Jandi agubemba yilandila agumanamusu muinsi vo dibaala adivu muinsi uminongu na minongu;

⁶ jandi agubemba bima bieni vo mungo muinsi oba na muinsi te na tsisiga; ayaji biguji biyingitsi te na olebuila;

⁷ pa wisi umatsima jandi oba ulioma mbana orungula uji biguji biyingitsi, bionyi bivu biguji biandi.

⁸ Ayaji nyama jiyibulu ayimafu yipingu vo ayimavopulu yiri agokenamusu muinsi. Menu la Fumu.

⁹ Bavagulitsi bapagu bokelisanga maruma mami yiri borina mukilu umasumu mogu nesi udisabu dibiguji biyingitsi; mbana bagofu. Menu la Fumu aguiliomisi.

¹⁰ Ne muenyi umosi ayaji biguji biyingitsi; jandi oyitsani na muvagulitsi upagu na jandi oyimusalili bayaji bionyi.

¹¹ Tumba muviga agu muvagulitsi upagu amasumba omngula ubiji, munongu mosi na muviga agumaburulu o ndagu andi; jogu boji biguji biandi.

¹² Muana mugetu umuvagulitsi upagu, agumawelu na muenyi ayaji biguji biyingitsi abimavagulu pagu ajimasambulu.

¹³ Muana mugetu umuvagulitsi upagu aguvu mukuili vo ugusulu na mulumi andi, agugaa na baana, agumagabuga o ndagu taji andi nana va bungebi buandi, jandi guna onmgula uji biguji bitaji andi. Tumba muenyi uotsu ayabiji.

¹⁴ Pa dibaala amaji biguji biyingitsi tsiri udijaba vengu ogabusa ombu muvagulitsi upagu yima ayivu yiwelimina na dufunu dubiguji bieni, va julu vana obuesa yimosi mu biranu bidufunu dueni.

¹⁵ Bavagulitsi bapagu bayasabula biguji biyingitsi bibaIsrael abi bamavagula pagu ajimasambulu;

¹⁶ mbe bonamusu mbela jimabi amavu va julu tsimium miogu ava bejangingi biguji biyingitsi. Menu la Fumu aguibaliomisi.

Maruma mabibulu bipagu

¹⁷ Fumu amatsingula Moise rie:

¹⁸ Tsingula Aaron na baana bandi bababaala na baIsrael botsu rie: Dibaala diotsu diyifumba yiIsrael vo muenyi uotsu aguvu o Israel, adiuvagulila Fumu pagu jiunyensa ne jiudugusulu pangini vo jitondini,

¹⁹ pa erondi yiri pagu andi jiusingu, obega mulumi ngombi vo mulumi yindombu vo mulumi yinsabi agugaa na yifu.

²⁰ Duyavagula ne yibulu yimosi ayivu na yifu mu mbari ngoyisinga.

²¹ Pa dibaala ovagulila Fumu ngombi vo yindombu vo yinsabi pagu jikabusulu tsimaboti ne yiudugusulu pangini ne pagu jitondini; yibulu yiyaba na yifu mbana yiusingu.

²² Duyavagula bibulu abivu bidunga vo abipitsuyi vo abivu bitsunguga vo abivu na mapura vo bikuanyi vo abivu na mafuba; duyabivagulila Fumu pagu ajiusielusunu o muji va yinyensulu yipagu.

²³ Gurungula uvagula ngombi vo yindombu vo yinsabi abivu na bilema abiviolila usakama vo ugufi, pagu jitondini tumba guyayivagula udugusulu pangini.

²⁴ Viaga, duyavagulila Fumu pagu jiyibulu ayi mbanga tsibuliga vo ugesumuga vo uvangulu vo utabulu; duyavaga mambu mamunongu eni o bulongu buenu.

²⁵ Duyasinga uvagulila Nsambi pagu jiyibulu ayi muenyi oduvega ne yibulu yimosi mu mbari bavu na bubomfi na bifu; yionyi yigosingu.

²⁶ Fumu amatsingula Moise rie:

²⁷ Ava muana ngombi vo uyindombu vo uyinsabi uburulu, utsani yisambuali yibilumbu na nguji andi; mbana yilumbu yimunana te no gusu yivu yiwelimina uvagulila Fumu pagu ajiusielusunu o muji.

²⁸ Ne ngombi ne yindombu ne yinsabi, duyatabula yibulu na muana andi miuru mu yilumbu yimosi.

²⁹ Ava duvagulila Fumu pagu jikabusulu tsimaboti, dutsivagula nana nyimarumunu.

³⁰ Yibulu yiuligu muna yilumbu; duyasuega nyama tsimosi te na kedi. Menu la Fumu.

³¹ Dukelisanga maruma mami tindi umakelisa. Menu la Fumu.

³² Duyasabula diina diami diNsambi yiri nyuyitsu va gari baIsrael. Menu la Fumu aguiduliomisi,

³³ na omadupalisa o bulongu buEgypte uba Nsambi enu. Menu la Fumu.