Bisalu Bilevi 20 - La Sainte Bible en Langue Yipunu

Miyitsa amimagandusu

¹ Fumu amatsingula Moise rie:

² Tsingula baIsrael rie: Pa dibaala va gari baIsrael vo ne muenyi aguitsani o Israel owakisa ne muana andi umosi ombu Molek, jandi aboku. Bisi bulongu bamutindili mamanyi.

³ Menu nyuliyila dibaala dieni nsima na nyumugusula va gari batu bandi mu mbari amawakisa muana andi ombu Molek na amasumuna Mbura ami nosabula diina diami.

⁴ Pa bisi bulongu bagekipi dibi adi dibaala dieni amavaga, uwakisa baana bandi ombu Molek, pa bagemubokisi,

⁵ menu Fumu nyuliyila dibaala dieni nsima na bisi yifumba yiandi wandi na nyumugusula va gari batu bandi na jogu botsu abesingi adi amavaga ava amakotila o muyitsa uMolek.

⁶ Pa dibaala esambili bayisi vo uvanda mavanda nokebivisa na monyi, nyuliyila dibaala dieni nsima na nyumugusula va gari batu bandi.

⁷ Jenu dukeliomisa mbana duba aba Nsambi mu mbari menu la Fumu Nsambi enu.

Migaga misusu miufubana yitsiga

⁸ Dukelisanga migaga miami na dumisalisa wandi. Menu la Fumu oyiduliomisa.

⁹ Pa mutu uotsu osienga taji andi vo nguji andi jandi okilusu mukilu udufu; malungu mandi moba va julu muru ujaʼ beni; amasienga taji andi vo nguji andi.

¹⁰ Pa dibaala amavaga bumbembu na mugetu botsu babeji bokilusu mukilu udufu.

¹¹ Pa dibaala amafubana yitsiga na mugatsi utaji andi, amalensa taji andi, dibaala dieni na mugetu eni bokilusu mukilu udufu; malungu mogu moba va julu tsimiuru mijoʼ beni.

¹² Pa dibaala amafubana yitsiga na mugatsi umuana andi, jogu botsu babeji bokilusu mukilu udufu; bamavaga diambu diyisonyi: malungu mogu moba va julu tsimiuru mijoʼ beni.

¹³ Pa dibaala amafubana yitsiga na dibaala nandi nana befubinini na mugetu, jogu botsu babeji bamavaga diambu dinsoruru; bokilusu mukilu udufu; malungu mogu moba va julu tsimiuru mijoʼ beni.

¹⁴ Pa dibaala amafubana yitsiga na muana na nguji andi, amavaga dibi dineni: botsu barieru bonyensu mbisu yiri nsoruru tsimunongu eni tsigomueba va gari enu.

¹⁵ Pa dibaala amafubana yitsiga na yibulu okilusu mukilu udufu na duboka yibulu wandi.

¹⁶ Pa mugetu ofubana yitsiga na yibulu, guboka mugetu na yibulu wandi; jogu botsu babeji boboku: malungu mogu moba va julu tsimiuru mijaʼ beni.

¹⁷ Pa dibaala amafubana yitsiga na yibusi yiandi, yeri muana umugetu utaji andi vo unguji andi bamalensasana, dionyi la nsoruru; jogu botsu babeji bogusulu va gari batu bogu; jandi amalensa yibusi yiandi, mukilu udisumu diandi uvu va julu muru udibaala.

¹⁸ Pa dibaala amafubana yitsiga na mugetu aguvu na tsungi andi, jogu botsu babeji bogusulu va gari batu bogu mu mbari bamasinga usumuna mugaga umalungu.

¹⁹ Guyafubana yitsiga na muana nguji umugetu unguji agu vo yibusi yitaji agu mu mbari adina divu dilensa diyiburu yiagu; mukilu udisumu diogu uvu va julu tsimiuru miogu.

²⁰ Pa dibaala amafubana yitsiga na mugatsi ukatsi andi amalensa katsi andi wandi; mukilu udisumu diogu uvu va julu tsimiuru miogu; bofu tsiri ubura baana.

²¹ Pa dibaala obonga mugatsi umuana nguji andi nofubana yitsiga nandi dionyi wandi divu muinsi; amalensa muana nguji andi; bagobura baana.

²² Dukelisanga migaga miami miotsu na maruma mami motsu, dubikelisanga yiri ngodubusa nodupalisa o bulongu buenu bugona.

²³ Duyavaga nsoruru tsibisi bulongu aba nyudusansila mu mbari bamavaga mambu meni motsu na bavu yika nsoruru va misu mami.

²⁴ Nyimadutsingula rie: Jenu dubialila bulongu buogu; nyuduvega buonyi, buba abuenu; bulongu bueni buvu bubasa de na magumba. Menu la Fumu Nsambi enu agumadukakasana na malongu masusu.

²⁵ Duvaganga duviakusunu dubibulu bilioma na abivu muinsi na dubatsoli balioma na abavu muinsi yiri dugorombisa batu benu uba na nsoruru mu diambu dibibulu vo batsoli vo mu diambu dibilandila abi nyimadulonsa ukipa abivu muinsi.

²⁶ Duba aba Nsambi mu mbari nyivu Nsambi; menu la Fumu; nyimadukakasana na malongu masusu yiri duba tindi abami.

²⁷ Pa dibaala vo mugetu bekelisi matengu vo bana yinyunyi yibi yiuresila, bokilusu mukilu udufu; botindu mamanyi; malungu mogu moba va julu tsimiuru mijoʼ beni.