Bisalu Bilevi 18 - La Sainte Bible en Langue Yipunu

Maruma ma-ufubana yitsiga

¹ Fumu amatsingula Moise rie:

² Tsingula baIsrael rie: Menu la Fumu Nsambi enu.

³ Duyavaga amevagu o bulongu buEgypte abu dumaletsanina na duyavaga amevagu o bulongu buCanaan agu nyidubeyi: duyaduka bifu biogu.

⁴ Dukelisanga maruma ameruyili ombu gami; dukipanga migaga miami: Menu la Fumu.

⁵ Dukelisanga migaga miami na maruma mami: mutu agubikelisanga owendanga sungingi na bionyi. Menu la Fumu.

⁶ Ne mutu mosi va gari enu ayafubana yitsiga na yiburu yiandi. Menu la Fumu.

⁷ Mugetu ayafubana yitsiga na taji andi; muana dibaala ayafubana yitsiga na nguji andi, avu nguji andi, ayafubana yitsiga nandi.

⁸ Muana dibaala ayafubana yitsiga na mugatsi utaji andi.

⁹ Muana dibaala ayafubana yitsiga na yibusi yiandi, aguvu muana taji vo muana nguji, ayimaburu va misu mandi nesi o yiari yisusu.

¹⁰ Guyafubana yitsiga na mutegula agu umugetu, avu muana agu udibaala vo umugetu amabura. Mu mbaii avu yiburu yiagu.

¹¹ Guyafubana yitsiga na muana mugetu umugatsi agu, jandi wandi amaburu na taji agu. Jandi avu yibusi yiagu.

¹² Guyafubana yitsiga na yibusi yitaji agu, jandi avu taji agu ketu.

¹³ Guyafubana yitsiga na muana nguji umugetu agu. Jandi avu tindi nguji agu.

¹⁴ Guyafubana yitsiga na muana nguji udibaala utaji agu nesi mugatsi andi wandi. Jandi avu nguji agu wandi.

¹⁵ Guyafubana yitsiga na mugatsi umuana agu, aji boji buagu. Jandi avu mugatsi umuana agu: guyafubana yitsiga nandi.

¹⁶ Guyafubana yitsiga na mugatsi umuana nguji agu. Jandi avu mugatsi umuana nguji agu.

¹⁷ Guyafubana yitsiga na nguji na muana andi umugetu, nesi bategula bandi. Abana bavu tindi biburu biagu: divu nsoruru.

¹⁸ Guyafubana yitsiga na nsaji agu ava mugatsi agu akivu monyu, bayaba bapala.

¹⁹ Guyafubana yitsiga na mugetu uotsu ava elabili tsungi andi.

²⁰ Guyafubana yitsiga na mugatsi umutu nagu, dionyi diugubivisa.

²¹ Guyasingisa ne muana agu umosi uwakusu ombu Molek, adina mbe diugurombisa usabula diina diNsambi agu. Menu la Fumu Nsambi agu.

²² Guyafubana yitsiga na dibaala nagu nana befubinini na mugetu. Dionyi divu nsoruru.

²³ Guyafubana yitsiga na yibulu, gukebivisa na yionyi. Mugetu wandi ayafubana yitsiga na yibulu, ukebivisa na yionyi. Dionyi divu diambu diyisonyi.

²⁴ Guyakebivisa ne na diambu dimosi va gari mambu memama mu mbari bisi malongu ama nyirondi usansa va misu menu bamakebivisa na mambu meni.

²⁵ Dilongu dimabiva; nyudikilisa mu diambu dinsoruru tsietsitsi te na diubusa tindi batu bandi.

²⁶ Kabogu jenu baIsrael kelisanu migaga na maruma mami na duyavaga diambu ne dimosi dinsoruru tsietsitsi: ne jenu ne muenyi aguvu nenu.

²⁷ Mu mbari motsu mana mavu nsoruru atsi bisi malongu abamadurela bamavaga; malongu motsu mamabiva.

²⁸ Kebananu yiri ngodubusa nodupalisa o bulongu nana nyimabusila nopalisa abatega.

²⁹ Jogu abovaga nsonmi tsimunongu eni nyubagusula va gari batu bogu.

³⁰ Dukelisanga maruma mami na duyavaga nsoruru ne jimosi aji bamavaganga kaia, duyakebivisa. Menu la Fumu Nsambi enu.