Bisalu Bilevi 17 - La Sainte Bible en Langue Yipunu

BUNSAMBI BUBAISRAEL Maruma mamalungu

¹ Fumu amatsingula Moise rie:

² Tsingula Aaron na baana bandi bababaala na baIsrael rie: Guluanu ama Fumu amaruma.

³ Pa dibaala diyifumba yiIsrael oboka ngombi vo yindombu vo yinsabi va dimbu vo o tsomu dimbu

⁴ na agoyibega va dikotulu diNdagu Yibenguna uvega pagu ombu Fumu va gusu Ndagu Yibenguna, dibaala dieni oba na mbela jimalungu meni; amapuga malungu kulini, dibaala dieni ogusulu va gari batu bandi.

⁵ BaIsrael bayamuevagula bibulu biogu pagu o musiru, bobibega ombu bavagulitsi bapagu va gusu Fumu va dikotulu diNdagu Yibenguna, avana bobivagulila pagu tsikabusulu tsimaboti.

⁶ Muvagulitsi upagu otsatsa malungu va yinyensulu yipagu yiFumu va dikotulu diNdagu Yibenguna na onyensa matsi va yinyensulu yipagu amogulunu mbunga jiboti ombu Fumu.

⁷ Bayamuevaga nsoruru uvagulila binyunyi bibi pagu tsiogu. Aguna uba mugaga ogu umutubu te na bategula bogu.

⁸ Kabogu gukabatsingula rie: Pa muisi yifumba yiIsrael vo muenyi aguitsani nogu ovagulila Fumu pagu jiunyensa nesi yibulu

⁹ na ageyibeyi va dikotulu diNdagu Yibenguna uyivagulila Fumu pagu, mutu eni ogusulu va gari batu bandi.

¹⁰ Pa muisi yifumba yiIsrael vo muenyi aguitsani nogu oji malungu yika la malungu nyumuliyila nsima na nyumugusula va gari batu bandi.

¹¹ Mu mbari malungu la muvumu. Nyimaduvega monyi va yinyensulu yipagu yiri mosalulu utsindula dibumi noduvega monyu, mu mbari malungu metsinduli dibumi na meduveyi monyu.

¹² La dibandu nyimatsingulila baIsrael rie: Ne mutu mosi va gari enu ayaji malungu; ne muenyi aguvu nenu ayaji malungu wandi.

¹³ Pa mutu va gari baIsrael vo muenyi aguvu va gari ogu owenda o burela noboka yibulu vo tsoli abiligu, oledekisa malungu va tsi nomakubiga na difufundu.

¹⁴ Mu mbari muvumu ubisundu biotsu la malungu. La dibandu nyimatsingulila baIsrael rie: Duyaji malungu mabisundu biotsu; mu mbari muvumu ubisundu biotsu la malungu; mutu uotsu agumaji ogusulu va gari baIsrael.

¹⁵ Mutu uotsu: ne muisi bulongu ne muenyi aguji nyama jiyibulu ayimafu yipingu vo ayimavopulu, osusa biduaru biandi na obuila, jaʼ beni oba muinsi te na tsisiga; mbana oba ulioma.

¹⁶ Pa agesusi biduaru biandi na agebuili; mukilu udibi diandi uba va julu muru ujaʼ beni.