Bisalu Bilevi 14 - La Sainte Bible en Langue Yipunu

Duliomusu duyibedu yinyambi

¹ Fumu amatsingula Moise rie:

² Mugaga umungo nyambi na duliomusu duandi, agugu: Bomubega ombu muvagulitsi upagu.

³ Muvagulitsi upagu owenda o tsomu dimbu uyekelula mungo nyambi. Pa pura jimungo nyambi jimabeluga

⁴ muvagulitsi upagu orumisa ubonga batsoli babeji bamonyu abavu balioma na bitsafinyi bisedera na munguli na bitsafinyi biyisopa; abina biusalusu umuliomisa.

⁵ Muvagulitsi upagu orumisa yiri batabuli tsoli mosi muru va julu yisanga ayivu na mamba mayileka.

⁶ Obonga tsoli jimonyu na bitsafmyi bisedera na munguli na bitsafmyi biyisopa; oputiga biotsu na tsoli ajivu monyu mu malungu matsoli ajimatabulu muru va julu mamba mayileka.

⁷ Na bionyi otsatsila mungo nyambi yisambuali yikumbu. Mbana omutubulila yiri avu ulioma, va julu vana odunda tsoli ajivu monyu, jiunyamba o musiru.

⁸ Jandi aguiliomusu osusa biduaru biandi nofuga mionyi miandi miotsu nobuila; oba ulioma. Mbana orungula umuegabuga o mulaku, tumba agokota o ndagu andi te na olemana yisambuali yibilumbu.

⁹ Mu yilumbu yimusambuali omuefuga mionyi miandi miotsu: na muru na yiedu na minsinyi; ofuga mionyi miandi miotsu; osusa biduaru biandi nobuila, mbana amalioma.

¹⁰ Mu yilumbu yimunana obonga baana babeji babindombu babalumi abagaa na bifu na yibusi yiyindombu ayikavu yilima yimosi ayigaa na yifu na pagu jitsangu, diwendi rie: birieru mu yigumi mu yietsu yimosi yifufu biuvagulu pagu ajiusobunu na matsi na ditingi dimbuta matsi.

¹¹ Muvagulitsi upagu aguiliomisi mungo nyambi omubega na bima bieni biotsu ombu Fumu va dikotulu diNdagu Yibenguna.

¹² Muvagulitsi upagu obonga muana yindombu umosi na oguvagula pagu jimbela va mosi na ditingi dimbuta matsi; obiviunsa va gusu Fumu yiari na yiari.

¹³ Otabula muana yindombu muru va mbura aji bebokili bibulu bipagu jiutsindula dibumi na bipagu tsiunyensa, va mbura jilioma; yibulu yipagu jimbela na yipagu jiutsindula dibumi yinoboku yivu yimuvagulitsi upagu: yionyi yivu tindi yingitsi.

¹⁴ Muvagulitsi upagu obonga malungu mayibulu yipagu jimbela; omasinga mu mumbimbili udituji adimabaala dijandi oyiliomusu na mu mulembu umulumi udikaka diandi dimabaala na mu mulembu umulumi udikulu diandi dimabaala.

¹⁵ Muvagulitsi upagu obonga ditingi dimbuta matsi nomawitila va murima-dikaka diandi dimagetu.

¹⁶ Muvagulitsi upagu oputiga mulembu andi udikaka dimabaala mu matsi amavu va murima-dikaka diandi dimagetu, onyaga matsi na mulembu andi yisambuali yikumbu va gusu Fumu.

¹⁷ Va julu malungu mayibulu yipagu jimbela, muvagulitsi upagu osinga matsi amomusialulu va murima-dikaka mu mumbimbili udituji dimabaala dijandi oyiliomusu na mu mulembu andi umulumi udikaka dimabaala na mu mulembu andi umulumi udikulu dimabaala.

¹⁸ Matsi amomusialulu osinga va julu muru ujandi oyiliomusu; muvagulitsi upagu omutsindulila dibumi diandi va gusu Fumu.

¹⁹ Mbana muvagulitsi upagu ovagula pagu jiutsindula dibumi; na otsindula dibumi dijandi oyiliomusu muinsi andi. Va julu vanaotabula muru uyibulu yipagu jiunyensa.

²⁰ Mbana ovagula pagu jiunyensa na jitsangu va yinyensulu yipagu. Anana otsindulila mungo nyambi dibumi mbana amalioma.

Duliomusu duyibedu yinyambi ayivu yijaga

²¹ Pa mungo nyambi aji yijaga na agaa na mangolu orungula ubonga mulumi yindombu umosi, oguvagulu pagu jimbela; jinomana uviunsu yiari na yiari, jionyi jiumutsindula dibumi. Pagu andi jitsangu jiuba yimosi buandi mu digumi mu yietsu yifufu ayiusobunu na matsi na ditingi dimbuta matsi.

²² Obonga makunda mabeji wandi vo baana bamabembi babeji, nana mangolu mandi mavu: dimosi dipagu jiutsindula dibumi na disusu dipagu jiunyensa.

²³ Mu yilumbu yimunana obega biandi biotsu ombu muvagulitsi upagu mu diambu diduliomusu duandi, va dikotulu diNdagu Yibenguna va gusu Fumu.

²⁴ Muvagulitsi upagu obonga muana yindombu upagu jimbela na ditingi dimbuta matsi, jandi obiviunsa yiari na yiari va gusu Fumu.

²⁵ Otabula muru umuana yindombu yipagu jimbela. Muvagulitsi upagu obonga malungu mayibulu yipagu jimbela; omasinga mu mumbimbili udituji dijandi oyiliomusu na mu mulembu andi umulumi udikaka diandi dimabaala na mu mulembu andi umulumi udikulu diandi dimabaala.

²⁶ Muvagulitsi upagu owitila matsi va murima-dikaka diandi dimagetu.

²⁷ Oputiga mulembu andi udikaka diandi dimabaala mu matsi amavu mu murima-dikaka diandi dimagetu, onyaga matsi na mulembu andi yisambuali yikumbu va gusu Fumu.

²⁸ Muvagulitsi upagu osinga matsi amosialulu amavu va murima-dikaka mu mumbimbili udituji dimabaala dijandi oyiliomusu na mulembu umulumi udikaka diandi dimabaala na mu mulembu andi umulumi udikulu diandi dimabaala va mbura aji amasusa malungu mayibulu yipagu jimbela.

²⁹ Matsi amomusialulu osinga va julu muru ujandi oyiliomusu; muvagulitsi upagu omutsindulila dibumi dieni va gusu Fumu.

³⁰ Mbana ovagula dikunda dimosi vo muana udibembi, abi amarungula udila:

³¹ dimosi diuba pagu jiutsindula dibumi na disusu diuba pagu jiunyensa na pagu jitsangu, mbana muvagulitsi upagu ovagulila jandi oyiliomusu pagu jiutsindula dibumi va gusu Fumu.

³² Aguna uvu mugaga uduliomusu dumungo nyambi aguvu yijaga.

Ditodi didimungi o ndagu

³³ Fumu amatsingula Moise na Aaron rie:

³⁴ Ava dukotila o bulongu buCanaan, abu nyuduvega; pa nyunamiga ditodi didimungi o ndagu yika la ndagu o bulongu abududila

³⁵ jandi agudila ndagu eni vengu oyetsingula muvagulitsi upagu rie: Nyilabi o ndagu ami uvu ditodi didimungi.

³⁶ Ne muvagulitsi upagu akakota o ndagu eni uyekelula ditodi, oruma yiri biotsu abivu o ndagu bipalusu yiri biotsu abivu muna bigokipu muinsi. Banobipalisa, muvagulitsi upagu okota ukelula ndagu.

³⁷ Muvagulitsi upagu okelula ditodi. Pa elabi yiri bibaga bindagu eni bivu na mbamfu tsiyinyuru yimagaji vo yibenga, atsilabini udonga te na yiari yimosi yiyibaga,

³⁸ jandi opala o ndagu mbana odibiga ndagu te na yisambuali yibilumbu.

³⁹ Muvagulitsi upagu ogabuga o ndagu eni mu yilumbu yimusambuali. Pa elabi yiri ditodi dieni dimawala mu yibaga yindagu,

⁴⁰ oruma rie: Bagusuli mamanyi amamabembu na ditodi na bamabuayi o tsomu dimbu va mbura ajivu muinsi.

⁴¹ Onima rie: Bagombi o gari ndagu jiotsu nobuaga difufundu diotsu adimagombu o tsomu dimbu va mbura ajivu muinsi.

⁴² Mbana babongi mamanyi masusu nomavinsa va mbura aji mamanyi matega mamaba; bavayi dunduyi dususu o ndagu.

⁴³ Pa ditodi dimamuelava tindi ulava o ndagu ne pa bamagusula mamanyi amamagombu ne pa bamamuevaga dunduyi o ndagu,

⁴⁴ muvagulitsi upagu omuegabuga guna. Pa elabi yiri ditodi dilavi o ndagu, divu ditodi didimungi adigorungula ugusula; ndagu jivu muinsi.

⁴⁵ Bobula ndagu: mamanyi na miri na dunduyi, bobibega o tsomu dimbu va mbura ajivu muinsi.

⁴⁶ Mutu yika la mutu agumakota o ndagu ava jimadibugulu oba muinsi te na tsisiga.

⁴⁷ Mutu yika la mutu agumasilimina o ndagu eni osusa biduam biandi. Mutu yika la mutu agumaji o ndagu eni osusa biduaru biandi wandi.

⁴⁸ Pa muvagulitsi upagu ogabuga o ndagu na elabi yiri ditodi digelavi ava ndagu jimamuevagulu dunduyi, otubula yiri ndagu jivu jilioma; ditodi dimatsiemuga.

⁴⁹ Obonga batsoli babeji na bitsafinyi bisedera na munguli na bitsafinyi biyisopa uliomisa ndagu.

⁵⁰ Otabula tsoli mosi muru va julu yisanga ayivu na mamba mayileka,

⁵¹ obonga bitsafinyi bisedera na biyisopa na munguli na tsoli ajivu monyu; obiputiga mu malungu matsoli ajimaboku va julu mamba mayileka na omatsatsa ndagu eni yisambuali yikumbu.

⁵² Oliomisa ndagu na malungu matsoli na mamba mayileka na tsoli jimonyu na bitsafinyi bisedera na biyisopa na munguli.

⁵³ Mbana odunda tsoli jimonyu yiri jiunyamba o tsomu dimbu nesi o musiru. Anana oliomisa ndagu ujitsindulila dibumi; ndagu jimalioma.

⁵⁴ Aguna uvu mugaga unyambi uditodi diotsu dinyambi na umagoga;

⁵⁵ na uditodi didimungi dibiduaru na ditodi didimungi jimandagu,

⁵⁶ na umavugu na upura tsinyambi na matodi madimungi na umangingi;

⁵⁷ aguilasi yiri yima yivu muinsi vo pa yivu yilioma. Aguna uvu mugaga unyambi yika la nyambi.