Bisalu Bilevi 13 - La Sainte Bible en Langue Yipunu

Mugaga unyambi

¹ Fumu amatsingula Moise na Aaron rie:

² Ava dibaala obila na divugu mu dunyuru duandi vo diretuga vo dingingi adibagunu na pura nyambi, obegu ombu Aaron aguvu muvagulitsi upagu vo ombu umosi va gari baana bandi bababaala.

³ Muvagulitsi upagu okelula mbura ajivu na diambu mu mukata udunyuru duandi. Pa mionyi amivu va gari pura mimavema na pura jilabini udonga uviolila mukata, ajina jivu pura nyambi; yiotsu ayi muvagulitsi upagu ojilabila otubula yiri dibaala dieni avu muinsi.

⁴ Pa avu na mua dingingi na mionyi amivu va gari dionyi migaa mivema, muvagulitsi upagu odibiga mungo dingingi o gari ndagu te na yisambuali yibilumbu.

⁵ Yilumbu yimusambuali, muvagulitsi upagu omukelula. Pa dingingi digabeluga mu bilumbu bieni na pa digelavi muvagulitsi upagu omuedibiga mungo dingingi o gari ndagu te na yisambuali yibilumbu bisusu.

⁶ Yilumbu yimusambuali, muvagulitsi upagu omuemukelula. Pa dingingi ditsiemuyi na digelavi mu mukata, muvagulitsi upagu otubula yiri mutu eni avu ulioma, adina divu dingingi dilootu; dibaala dieni osusa biduaru biandi na oba ulioma.

⁷ Tumba anokelasa ombu muvagulitsi upagu omutubulila yiri avu ulioma, yika dingingi dieni diretuyi, omueyekelasa kumbu ajimubeji ombu muvagulitsi upagu.

⁸ Muvagulitsi upagu omuemukelula. Pa diretuga dieni dimanyanguga, muvagulitsi upagu otubula rie: Avu muinsi: nyambi jivu nandi.

⁹ Ava dibaala obila na pura nyambi obegu ombu muvagulitsi upagu.

¹⁰ Muvagulitsi upagu omukelula. Pa avu na pura ajikavu mafuinyi, pa jionyi jimavemisa mionyi na jivu jidonga

¹¹ ajina jivu nyambi mukata udibaala dieni: muvagulitsi upagu otubula yiri avu muinsi; agomuemudibiga o ndagu mu mbari dimalabana yiri avu muinsi.

¹² Pa nyambi eni jimalava mu dunyuru duotsu, ubandila o muru te no makulu, muvagulitsi upagu omuemukelula;

¹³ ava olabila yiri dunyuru duotsu yika nyambi na nyambi, otubula yiri amalungamuganu: mu mbari jaʼ uotsu amakaluga uvema, avu ulioma.

¹⁴ Tumba yilumbu ayi bomulabila na mapura madonga, oba muinsi;

¹⁵ ava muvagulitsi upagu okelula mapura meni madonga, omutubulila muinsi, mapura meni madonga mavu muinsi, nyambi jivu nandi.

¹⁶ Pa mapura meni mamavema, mungo monyi omuewenda ombu muvagulitsi upagu;

¹⁷ muvagulitsi upagu omuemukelula na pa mapura mamavema, muvagulitsi upagu otubula rie: Amalungamuganu, avu ulioma.

¹⁸ Ava dibaala obila na muvedi

¹⁹ pa va mbura eni volabana dingingi dibenga, dibaala dieni oyekelasa ombu muvagulitsi upagu.

²⁰ Muvagulitsi upagu omuemukelula. Pa pura eni jilabini jidonga na mionyi mimavema muvagulitsi upagu omutubulila yiri avu muinsi: jivu pura nyambi, ajirungi mafuinyi va gari muvedi.

²¹ Pa muvagulitsi upagu elabi yiri vagaa mionyi mivema va gari pura na jigaa jidonga na jimabanda ubeluga, odibiga dibaala dieni o gari ndagu te na yisambuali yibilumbu.

²² Pa dingingi dilavi mu mukata, muvagulitsi upagu omutubulila yiri avu muinsi: ajina jivu pura nyambi.

²³ Tumba pa dingingi divu va mbura mosi na digelavi, aguna uvu muvedi udisieyi: muvagulitsi upagu otubula rie: Amalungamuganu avu ulioma.

²⁴ Ava dibaala obila na pura muji pa jiubenga vo jiuvema muvagulitsi upagu omukelula.

²⁵ Pa mionyi amivu va gari pura mimavema na pura jimadonga, ajina jivu nyambi ajirungi mafuinyi va gari pura jiunyenga; muvagulitsi upagu otubula yiri dibaala dieni avu muinsi: ajina jivu pura nyambi.

²⁶ Pa muvagulitsi upagu elabi yiri vagaa mionyi mivema va pura eni na jigaa jidonga tumba jimabanda ubeluga, odibiga dibaala dieni o gari ndagu te na yisambuali yibilumbu.

²⁷ Yilumbu yimusambuali muvagulitsi upagu omukelula, pa pura jimalava mu mukata, muvagulitsi upagu otubula yiri avu muinsi: ajina jivu pura nyambi.

²⁸ Tumba pa pura jivu va mbura mosi na jigelavi na jimabanda ubeluga yika difuba divu, muvagulitsi upagu otubula rie: Avu ulioma; yika muvedi umuji.

²⁹ Ava dibaala vo mugetu obila na pura o julu muru vo mu penga,

³⁰ muvagulitsi upagu okelula pura. Pa jivu jidonga na va gari jionyi vavu mionyi mimuambalolu vo miviolila ugeyi, muvagulitsi upagu omutubulila yiri avu muinsi: ajina pura jinyambi jimuru vo jipenga.

³¹ Pa muvagulitsi upagu elabi yiri jigaa jidonga na jigaa na mionyi mipinda va gari, odibiga mutu eni o gari ndagu te na yisambuali yibilumbu.

³² Yilumbu yimusambuali muvagulitsi upagu omuekelula pura. Pa pura jigaalava na pa vagaa mionyi mimuambalolu na pa jigaa jidonga

³³ jandi aguvu na digoga vo pura jipenga ofuga tumba agofuga va mbura aji digoga vo pura bivu, mbana muvagulitsi upagu omuemudibiga kumbu ajimubeji o gari ndagu te na yisambuali yibilumbu.

³⁴ Yilumbu yimusambuali muvagulitsi upagu omuekelula digoga vo pura. Pa digoga vo pura bigaalava na pa vagaa mionyi mimuambalolu na pa bigaa bidonga, muvagulitsi upagu omutubulila yiri avu ulioma; osusa biduaru biandi na oba ulioma.

³⁵ Tumba banotubula yiri avu ulioma na digoga vo pura biulava, muvagulitsi upagu omuemukelula.

³⁶ Pa digoga vo pura bimalava, muvagulitsi upagu agomueromba mionyi mimuambalolu: dimalabana yiri dibaala dieni avu muinsi.

³⁷ Pa elabi yiri digoga vo pura bigelavi na bimabendisa nanga tsipinda va gari, bilasi yiri digoga vo pura bimabeluga: avu ulioma mbana muvagulitsi upagu otubula yiri avu ulioma.

³⁸ Ava dibaala vo mugetu obila na mangingi mu dunyuru duandi, mangingi amavu mavema,

³⁹ muvagulitsi upagu omukelula. Pa avu na mangingi marimbuga mu dunyuru duandi amana mavu waʼ mangingi amavu na mafuinyi: avu ulioma.

⁴⁰ Pa dibaala otsiemusa nanga tsiandi, adina la divenda, avu ulioma.

⁴¹ Pa otsiemusa nanga tsiandi na mbami o yiari yigusu nesi va baterensi, avu ulioma wandi.

⁴² Tumba pa va gari divenda, o yiari yigusu vo yikodu vavu mua pura, ajina jivu nyambi ajimarunga mafuinyi va mbura ajivu divenda o yiari yikodu vo yigusu.

⁴³ Muvagulitsi upagu omukelula. Pa vavu pura va gari divenda o yiari yikodu va yigusu, ajibagunu na jinyambi ajivu mu dunyuru,

⁴⁴ dibaala dieni ana nyambi, avu muinsi: muvagulitsi upagu otubula yiri avu muinsi mu diambu dipura ajivu o julu muru andi.

⁴⁵ Mungo nyambi agukavu na mapura, oduaranga biduaru bipasiga na agoduara yiviovi; opieta tsanda va penga andi noyenagamuganga rie: Mungo muinsi menu! Mungo muinsi menu!

⁴⁶ Obanganga mungo muinsi yitsingu yiotsu ayi avu na mapura. Avu muinsi, otsananga va mbura wandi pinsa o tsomu dimbu.

Ditodi didimungi dibiduaru

⁴⁷ Ava ditodi didimungi diunamina yiduaru la yiduaru,

⁴⁸ tsanda la tsanda, mukata la mukata,

⁴⁹ na mbura jiditodi dieni diukaluga yinyuru yimagaji vo yibenga, adina wandi divu ditodi didimungi, vengu diulasu muvagulitsi upagu.

⁵⁰ Muvagulitsi upagu odikelula na odibiga yiduaru ayimanamu ditodi o ndagu te na yisambuali yibilumbu.

⁵¹ Mu yilumbu yimusambuali omuedikelula. Pa dimalava mu yiduaru, tsanda la tsanda, mukata la mukata, dionyi divu ditodi didimungi adigorungula uliomusu: yivu muinsi.

⁵² Yiduaru yiunyensu: tsanda la tsanda, mukata la mukata; yima yiotsu ayivu na ditodi didimungi adigorungula uliomusu: yiunyensu o muji.

⁵³ Tumba pa muvagulitsi upagu elabi yiri ditodi digelavi mu yiduaru, tsanda la tsanda, mukata la mukata,

⁵⁴ oruma ususa yiotsu ayimabembu na dionyi, mbana omueyidibiga kumbu ajimubeji o ndagu te na yisambuali yibilumbu.

⁵⁵ Ditodi dinosusu, muvagulitsi upagu omuedikelula. Pa ditodi divu dedi, kabogu yiduaru yivu muinsi: yiunyensu o muji; yimabiva tindi ubiva.

⁵⁶ Pa muvagulitsi upagu elabi yiri dionyi dinosusu dimabanda utsiemuga, oditabula mu yiduaru, tsanda la tsanda mukata la mukata.

⁵⁷ Pa diumuelabana mu yiduaru, tsanda la tsanda, mukata la mukata, adina divu ditodi didimungi: yiduaru yiunyensu o muji.

⁵⁸ Pa ditodi dimagusuga ava yiduaru yimasusu; tsanda la tsanda, mukata la mukata, yiumuesusu temu ajimubeji na yionyi yiuba yilioma.

⁵⁹ Aguna la mugaga uditodi didimungi dibiduaru, tsanda la tsanda, mukata la mukata, anana biujabunu yeri bilioma vo bimuinsi.