Bisalu Bilevi 11 - La Sainte Bible en Langue Yipunu

AMAVU MALIOMA NA AMAVU MAMUINSI Bibulu bilioma na bimuinsi

¹ Fumu amatsingula Moise na Aaron rie:

² Tsingulanu baana baIsrael rie: Bibulu abi jenu durungula uji va gari bibulu biotsu abibi:

³ Durungula uji yibulu yiotsu ayivu na birodi na ayivu mungunga-taba.

⁴ Tumba duyaji abivu yika na mungunga-taba vo abivu yika na birodi buandi. Duyaji samo mu mbari ana mungunga-taba tumba agaa na birodi: dujikipa muinsi.

⁵ Duyaji dama mu mbari ana mungunga-taba tumba agaa na birodi: dujikipa muinsi.

⁶ Jenu duyaji lapa, ana mungunga-taba tumba agaa na birodi: dujikipa muinsi.

⁷ Duyaji ngulu, ana birodi tumba agaa na mungunga-taba: dujikipa muinsi.

⁸ Duyaji nyama tsibionyi na duyabemba bibindi bibionyi dubikipa muinsi.

⁹ Nyama tsimamba atsi duji va gari nyama tsiotsu atsivu mu mamba atsitsi: duji tsiotsu atsivu na binyansa na magagala, atsivu mu mijamba mineni nesi migeyi nesi mu miubu.

¹⁰ Tumba tsiotsu atsigaa na binyansa na magagala tsiukipu nsoruru, tsiotsu atsivu mu mamba, nesi mu miubu nesi mu mijamba.

¹¹ Dutsikipa nsoruru, duyatsiji na dukipa matsiendi matsionyi nsoruru.

¹² Tsiotsu atsivu mu mijamba, atsigaa na binyansa na magagala, dutsikipa nsoruru.

¹³ Batsoli bamosi aba dukipa nsoruru na aba dugoji ababa: mbira na orafra na nyunga;

¹⁴ na miletsi mitsuyi na batsoli baminongu mieni;

¹⁵ na bakavanga na batsoli baminongu mieni;

¹⁶ na tsoli ajinengulungu mubamba na yibidu na yibura-kama na muletsi na batsoli botsu baminongu mieni;

¹⁷ na kukutu na yigula na sueta;

¹⁸ na sinya na yivuyisa-vengama na ngongu;

¹⁹ na sigonya na nsongi-dianga na batsoli baminongu mieni na uppa na yipungangembu.

²⁰ Bilandila biotsu nesi abipurumuyi nesi abiwendi na makulu, dubikipa nsoruru.

²¹ Tumba va gari bilandila bieni biotsu, duji yika abivu na makansu, abidumuyi.

²² Abi durungula uji abibi: makokoku na bisusu abinengulungu solama na argola na agaba na bilandila biminongu mieni.

²³ Bilandila biotsu bisusu abipurumuyi na abivu na lilakulu mana dubikipa nsoruru.

Abinamusu mutu muinsi

²⁴ Munongu yika la munongu udunamusu muinsi: uotsu agubemba bivisi bi-uonyi oba muinsi te na tsisiga.

²⁵ Na uotsu agunangula bivisi bi-uonyi vengu osusa biduaru biandi na oba muinsi te na tsisiga.

²⁶ Dukipa bibulu biotsu abivu na birodi na abigaa na mungunga-taba muinsi: mutu uotsu agubibemba oba muinsi.

²⁷ Bibulu biotsu abivu na makindi dubikipa muinsi: mutu uotsu agubemba bibindi bibionyi oba muinsi te na tsisiga

²⁸ na uotsu agunangula bibindi bibionyi osusa biduaru biandi na oba muinsi te na tsisiga. Dubikipa muinsi.

²⁹ Bibulu bigeyi abisundili ufuna abi dukipa muinsi abibi: kumbi na yibuji na dibambila na bibulu biminongu mieni

³⁰ na tsibitsi na mulansa na yibonga na kola na dunguena.

³¹ Abina abi dukipa muinsi va gari bilandila biotsu: mutu uotsu agubemba bibindi bibionyi oba muinsi te na tsisiga.

³² Yima yiotsu ayi ne yima yimosi yibibindi bieni yiubonduyila yiuba muinsi; yisalulu yiotsu ne yimuiri ne yiduaru ne mukata ne siela, yima yiotsu ayimasalulu, yiuputugu mu mamba; yiuba muinsi te na tsisiga; mbana yiuba yilioma.

³³ Yisanga yiotsu ayi ne yima yimosi yibibindi bieni yiubonduyila yiuba muinsi nesi abivu o gari yionyi, kabogu yisanga yiubula.

³⁴ Yima yiotsu ayiligu, yika yinyansugulu mamba meni, yiuba muinsi; na yisalulu yiotsu yibinuigu nesi yibegulu yiuba muinsi.

³⁵ Yima yiotsu ayi ne yibindi yimosi mu bibindi bieni yiubonduyila yiuba muinsi; ne mbura ugokila mapa ne kula-muji biupansu: biuba muinsi na dubikipa muinsi.

³⁶ Yika bileka na matanga, abivu bisuegulu bimamba, biuba bilioma, tumba jandi oyipalisi bibindi abimabonduga muna oba muinsi.

³⁷ Pa yivisi yiyibindi yiubonduga va julu yivaru ayiuvaru, yivaru yieni yiuba yilioma;

³⁸ tumba pa yivaru yimatsatsu, yika yivisi yiyibindi yiyibonduyili, dukipa yivaru yieni muinsi.

³⁹ Pa yibulu yimosi mu bibulu abi duvu na musuga uji, yiufu agubemba yibindi yiyionyi oba muinsi te na tsisiga.

⁴⁰ Aguji nyama jiyibindi yieni osusa biduaru biandi, oba muinsi te na tsisiga, agunangula yibindi yieni osusa biduaru biandi, oba muinsi te na tsisiga.

⁴¹ Bilandila biotsu biuba nsoruru ombu genu: bigoligu, via.

⁴² Duyaji bilandila biotsu nesi abivu na binama nesi abiwendi va tulu vo abivu na puela binama; dukipa biotsu bina nsoruru.

⁴³ Duyakevaga nsoruru mu diambu dibilandila bieni biotsu; duyakevaga muinsi na bionyi na duyakebivisa na bionyi wandi.

⁴⁴ Menu nyivu Fumu Nsambi enu; dukeliomisa na duba aba Nsambi mu mbari nyivu Nsambi; duyakenamusu muinsi ubilandila bieni biotsu.

⁴⁵ Menu nyivu Fumu agumadupalisa o bulongu buEgypte, uba Nsambi enu; yiri duba aba Nsambi mu mbari menu nyivu Nsambi.

⁴⁶ Aguna la mugaga ubibulu na ubatsoli na unyama tsimamba na ubilandila

⁴⁷ yiri dujaba abivu muinsi na abivu bilioma nesi yibulu ayiligu na ayigeligu.