Bisalu Bilevi 10 - La Sainte Bible en Langue Yipunu

Maruma mabukuili

¹ Nadab na Abihou, baana bababaala baAaron bamabonga bisunsulu bimuji na bamasunsa muji muna na bamawitila muyombu va julu; bamabangisa muji agugaa uNsambi va gusu Fumu agu basamabanimu ubangisa.

² Kabogu muji umaruyila ombu Fumu, umababoka mbisu vana vana va gusu Fumu.

³ Moise amatsingula Aaron rie: Fumu amadulubusa rie: Abebambini nami bayitsi buNsambi buami. Balasi bundumba buami va misu mabatu botsu. Aaron amasutu.

⁴ Mbana Moise amanengila Michael na Elissafan, baana bababaala baOuziel agumaba katsi Aaron; amabatsingula rie: Kuekanu guna, kakasananu bamfumbi benu vala na Mbura Nsambi, babeyianu o tsomu dimbu.

⁵ Kabogu bamakueka, bamababega baduisu o tsomu dimbu nana Moise amarumina.

⁶ Moise amatsingula Aaron na baana bandi bababaala Elazar na Itamar rie: Duyavula biviovi bienu na duyapasa biduaru bienu mu mbari dukeefu na Fumu akeenyoyila dibuli diotsu. Baana bataji benu buandi bana musuga ulila batu abamaboku na muji agu Fumu amabondusa.

⁷ Jenu duyapala o Ndagu Yibenguna, dukeefu; mu mbari dumabiatsu na matsi madubiatsu maFumu. Aaron na baana bandi bababaala bamavaga adi Moise amabaruma.

Maruma mamalamu amelansi

⁸ Fumu amatsingula Aaron rie:

⁹ Ava dukotila o Ndagu Yibenguna duyanuanganga malamu maminongu na minongu, jenu na baana bagu bababaala mu mbari dukeefu: uba mugaga umutubu ubategula bagu,

¹⁰ mbana dujaba ukelula adivu diNsambi na adivu nsoruru na adivu muinsi na adivu dilioma,

¹¹ nolonsa baIsrael migaga miotsu ami Fumu amavega Moise ubalonsa.

Maruma manyama tsipagu

¹² Moise amatsingula Aaron na baana bandi babeji Elazar na Itamar rie: Bonganu abimasialulu bipagu jitsangu ajimasielusunu o muji va gusu Fumu, duyabisobana na dufunusu, bijianu va mugula uyinyensulu yipagu mu mbari jivu tindi yingitsi.

¹³ Dubiji va mbura jiyingitsi: musuga umaduvegu jenu na baana bagu bababaala upagu atsimasielusunu o muji va gusu Fumu; nana nyimarumunu.

¹⁴ Tulu ajimaviunsu na kori ajimasambulu jenu na baana bagu bababaala na babagetu duji va mbura jiyingitsi; mu mbari bimaduvegu musuga, jenu na baana bagu bababaala upagu tsikabusulu tsimaboti tsibaIsrael.

¹⁵ Yiasi yikori ayimasambulu na tulu ajimaviunsu, bipagu ajiusielusunu o muji biubegu na baIsrael va mosi na matsi uvagulila Fumu pagu, abina abienu, jenu na baana bagu bababaala; uba mugaga umutubu nana Fumu amarumina.

¹⁶ Moise amaromba mulumi yinsabi upagu jiutsindula dibumi; kabogu bamajinyensa kala. Moise amanyoyila Elazar na Itamar, baana bababaala baAaron na amabawivula rie:

¹⁷ Dibandu yi dusamaji pagu jiutsindula dibumi va mbura jiyingitsi? Jionyi jivu tindi yingitsi, Fumu amaduvega bionyi yiri dugusula mabi madibuli diotsu notsindula dibumi diogu va gusu Fumu.

¹⁸ Laba, malungu mayibulu masamakotusu o Mbura Nsambi; va julu vana dusamaji yibulu o mbura jiyingitsi nana nyimarumunu.

¹⁹ Aaron amatsingula Moise rie: Gulu, dibumi na tsiunyensa va gusu Fumu; nyinolaba diambu diedidi, mbe nsiji yibulu yipagu jiutsindula dibumi, mbe diuba diwelimina va gusu Fumu?

²⁰ Moise anodigulu amadisinga.