Bisalu 9 - La Sainte Bible en Langue Yipunu

Dugobutsu duSaul

¹ Saul mbe aki na nsala ulasa badukitsi baFumu maguga nesi ubaboka kabogu amawenda ombu bivunda bibavagulitsi bapagu

² na amabawivula musuga yiri pa orasuna batu abekelisi malongi meni magona o Damas orungula ubabega bakapu o Jerusalem.

³ Ava amawendilanga anotola bebeli na Damas yijalala yimamuvedimina yiari na yiari.

⁴ Amaberuga va tsi na amagulu diufi adimamuwivula rie: Saul, Saul, dibandu yi guikuanini?

⁵ Amawivula rie: Ndeʼ la nyi? Diufi dimawagula rie: Menu la Jesus agu ndeʼ guikuani.

⁶ Relama na kota o musiengi na bogutsingula adi guvaga.

⁷ Babaala abamawendanga nandi bamasikugu, bamakambulu; bamagulungu diufi na buranga tumba basamalaba mutu.

⁸ Saul amarelama na diuleba misu mandi mamatiemuna, asamalabanga ne pesu. Kabogu bambatsi bamamubega te no Damas.

⁹ Amatsana bilumbu birieru na budunga bueni, tsiri uji vo unu.

¹⁰ Vamaba mudukitsi, diina diandi Ananias agumatsananga o Damas. Fumu amamunengila mu yiriariamu rie: Ananias! Amawagula rie: Fumu meʼ janduʼ gu!

¹¹ Fumu amamutsingula rie: Relama na wenda mu nsila ajinengulu jisungama o ndagu Judas. Guwivula mutu, diina diandi Saul muisi Tarse. Gumurasuna usambila esambili.

¹² Amalaba yiriariamu ayitsimulasa inambu memamarie: Vamaruga dibaala diina diandi Ananias. Amaniusakiga miogu na amamuelaba.

¹³ Ananias amawagula rie: Fumu, nyimagulu mabi motsu ama dibaala diedina amavayila batu bagu o Jerusalem.

¹⁴ Ne namunyi ana musuga ubivunda bibavagulitsi bapagu ukilisa botsu abesambili mu diina diagu.

¹⁵ Tumba Fumu amamutsingula rie: Wenda, nyimamusola unsalila yiri diina diami diunyavila o malongu motsu nombu bakaga nombu baIsrael.

¹⁶ Dingensa olaba maguga maneni mu diambu diami, adina nyumulonsa kengili.

¹⁷ Kabogu Ananias amawenda. Amakota o ndagu, amamusakiga miogu na amavosa nandi rie: Saul, mbatsi ami, Fumu Jesus agumalabana nagu mu nsila amansindiga yiri gumuelaba na yiri gubasu na Yinyunyi yiNsambi.

¹⁸ Vana vana vamabonduga bima nderi magagala amamadibiga misu mandi na amalaba. Anomana ubatusu

¹⁹ amaji mbana amawara. Saul amaletsana mua bilumbu ombu badukitsi abamaba o Damas.

Saul ulonsa elonsi o Damas

²⁰ Vana vana amabanda ulonsa o Mandagu maBibenguna. Amalonsa rie: Jesus aji Muana Nsambi.

²¹ Botsu abamamugulungu bamakambulu puela. Bamawivulanga rie: Tsia jandi otsikuananga jogu abesambilingi mu diina dieni o Jerusalem? Tsiri jandi agumalekilisa batu na musuga ubivunda bibavagulitsi bapagu?

²² Tumba Saul amawarisa ulonsa yiri Jesus aji Christ te no Damas na batu bamakambulu puela.

²³ Mua bilumbu binovioga baJuif bamabenguna na bamatunga fundu ubokisa Saul.

²⁴ Tumba fundu ogu jimamutubululu. Nyangu na mukolu bamakelisanga dikotulu dimusiengi yiri agorina.

²⁵ Mbana mukolu mosi badukitsi baSaul bamamupodula mu ditsa na bamamubega o yivaga yimusiengi na bamayemusundusa.

Saul o Jerusalem

²⁶ Saul amatola o Jerusalem na amaronda ufubana na badukitsi abamaba guna. Tumba bamalaba goma umudila mu mbari basamatasa yiri ngensa amakalula diela.

²⁷ Barnabas amaronda umuwamusa kabogu amamubega ombu bilumbi. Amabatsingula rie: Fumu amalabana na dibaala diedidi mu nsila na amavosa nandi. Ava amabila o Damas amalonsa na mangolu mu diina dilesus.

²⁸ Amayenalinganga o Jerusalem jiotsu na amalonsa na mangolu mu diina diFumu.

²⁹ Amatsundanga na baJuif abamavosanga Grec, kabogu bamarondanga umubokisa.

³⁰ Badukitsi basusu banodijaba bamamubega o Cesaree na bamamusindiga o Tarse.

³¹ Dimaba rie: Mabundu maJudee na maGalilee na maSamarie mamaba sui. Mabundu meni motsu mamawara mu mbari bisi mabundu bamaba na goma Fumu na Yinyunyi yiNsambi amabawamusanga.

Dubelusu duEnee

³² Ava Pierre amalingulilanga batu baNsambi, amatola nesi ombu bango yitu o Lydda.

³³ Amarasuna yibomfi, diina diandi Enee agumaba va tangi yinana yibilima.

³⁴ Pierre amamutsingula rie: Enee, Jesus Christ egubelusi; relama, kunsa tangi agu. Kabogu amarelama.

³⁵ Bisi Lydda na Saron botsu banomulaba bamavayila Fumu yitu.

Dorcas urambuga erambuyi o dufu

³⁶ O Joppe umaba mudukitsi, diina diandi Tabitha (mu Grec, Dorcas, divindugulu rie: tsiesi). Jandi amasalanga bisalu biandi biboti na amawamusanga bijaga.

³⁷ Yilumbu yimosi amagaangu nobela na amafu. Banomana ukunsa mfumbi bamajisiliga.

³⁸ Badukitsi basusu bamagulu yiri Pierre aji o Lydda, dimbu adivu bebeli na Joppe; bamasindiga batu babeji uyemulanda.

³⁹ Pierre amawenda nogu. Ava amatolila bamamubega o ndagu ajimaba mfumbi. Bakuili botsu bamamutsiengila nolila na bamamulasa bijungi na biduaru abi Dorcas amabarariyilanga.

⁴⁰ Pierre amapalisa batu botsu; amakutama na amasambila mbana amageluga o yiari yimfumbi. Amavosa rie: Tabitha, relama! Amatiemuna, anolaba Pierre amatsana.

⁴¹ Pierre amamusamba dikaka na amamureliga. Mbana amanengila bisi dibundu na bakuili na amabalasa yiri Tabitha aji monyu.

⁴² Dionyi dimajabunu mu Joppe jiotsu na bapuela bamavayila Fumu yitu.

⁴³ Pierre amatsana mua temu o Joppe ombu ngela bibanda, diina diandi Simon.