Bisalu 7 - La Sainte Bible en Langue Yipunu

¹ Yivunda yibavagulitsi bapagu amawivula Etienne rie: Mambu anana mavu?

² Etienne amawagula rie: Merianu: Nsambi bundumba amalabana ombu taji etu Abraham ava amabila o Mesopotamie ne akatsana o Charan.

³ Amamutsingula rie: Sila bulongu buagu na mukuta agu wenda o bulongu abu nyugulonsa.

⁴ Mbana amapala o Chaldee na amayetsana o Charan. Taji andi anofu, Nsambi amamusindiga o bulongu abu jenu duitsanini.

⁵ Asamalemuvega mbura tumba amavangana yiri o gusu jandi na bategula bandi bodila bulongu, diuleba asamaba na baana.

⁶ Nsambi amavosa nandi rie: Bategula bagu boba benyi o bulongu bungana na boba baviga na bolasu maguga kama jina tsibilima.

⁷ Nsambi amavosa rie: Nyutabulila batu abobavaga baviga bunsonsi mbana bopala na bonsalila va mbura ejiji.

⁸ Mbana Nsambi amalonsa Abraham yifu yidurebu la yilimba yipangini. Kabogu Abraham amajirangiminanga na ava amaburila Isaac amamukelisa yinana yibilumbu mbana amamureba. Munongu mosi Isaac anobura Jacob amamureba. Va julu vana Jacob amareba digumi na bivunda bibeji.

⁹ Bivunda biJoseph bamamuvina na bamamusumbisa uba muviga o Egypte. Tumba Nsambi amaba nandi.

¹⁰ Amamuwamusanga mu motsu na Pharaon kaga jiEgypte amamuronda mu mbari Nsambi amamuvega diela na bifu biboti. Kabogu Pharaon amamubiatsa uruma bulongu buEgypte na ndagu andi jiotsu.

¹¹ Dungosu dunsala dumaba o Egypte nesi te no bulongu buCanaan. Bataji betu bamabufu na nsala.

¹² O Egypte umaba ble kabogu Jacob amasidiga baana bandi uyesumba biguji.

¹³ Banomana biguji bieni amamuebasindiga; temu eni Joseph amatubulila baana bataji bandi rie: Menu la Joseph. Mbana Pharaon amajaba mukuta andi.

¹⁴ Mbana Joseph amanengila taji andi na mukuta andi uotsu: abamaruga bamaba magumidusambuali na batu baranu.

¹⁵ Kabogu Jacob amawagula mbila Joseph na jandi na baana bandi bamafuila guna o Egypte.

¹⁶ Bivisi biogu bimabegu o Sichem na bimatsigu mu ngila aji Abraham amasumba ombu yifumba yiHemor.

¹⁷ Temu aji Nsambi amavanginina udugusu pangini na Abraham jimatola. O Egypte batu betu bamafunanga na

¹⁸ kaga jisusu amabanda uruma Egypte. Jandi asamajaba Joseph.

¹⁹ Kaga eni amaba na kueru na yifumha yietu la dibandu amatsoyisila bataji betu na amabokisa baana bogu.

²⁰ Va temu eni Moise amaburulu, jandi amaba muana uboti agumarondu na Nsambi. Jandi amakelusu tsungi yirieru o ndagu taji andi

²¹ mbana muana kaga amamurasuna o mamba na amamudila nana muana andi.

²² Moise amawiji diela diotsu dibisi Egypte; posulu tsiandi na bisalu biandi bimaba biwelimina na buneni buandi.

²³ Jandi amaba na magumana mabilima ava amayelingulila baIsrael.

²⁴ Amalaba umosi agumasiengungu na muisi Egypte na amaronda umuwamusa, kabogu amaboka muisi Egypte.

²⁵ Jandi amatasa yiri baIsrael beni bojaba yiri Nsambi amamusola ubagobula tumba basamaditsiyisa.

²⁶ Yilumbu yisusu amalaba bisi Israel babeji betoyi na amaweliga ubagalana. Amabawivula rie: Jenu duji baana banguji, dibandu yi duitoyili nana?

²⁷ Tumba agumalasa mbatsi maguga amasindila Moise na amamuwivula rie: Anyi amaguvaga murumitsi na nsonsi etu?

²⁸ Guirondi umboka nana gutsibokila muisi Egypte masiga?

²⁹ Ava Moise amamugululu amarina o Madian, avana amatsana na amabura baana babeji.

³⁰ Anomana magumana mabilima yiansa yimalabana nandi mu yibagunu yimulutsu muji agumalula mu yivala o kumu ajimaba bebeli na mukongu uSinai.

³¹ Moise anolaba dionyi amakambulu. Ava amakuekila uyigengila buranga diufi diFumu dimagulunu rie:

³² Menu la Nsambi bataji bagu, Nsambi Abraham na Isaac na Jacob. Moise asamarungula ugengila mu mbari amalaba goma.

³³ Fumu amamutsingula rie: Gusula bapondu bagu mu mbari mbura aji guvu jivu jiyingitsi.

³⁴ Nyimalaba maguga mabatu bami o Egypte, nyimagulu mitatu miogu na nyimasunduga ubagobula. Nyimagusola, wenda o Egypte.

³⁵ Tsiri Moise ususu agu nyivosi tumba jandi agu bisi Israel bamabusa ava bamamuwivulila rie: Anyi amaguvaga murumitsi na nsonsi etu? Nsambi amamuwarisa ava yiansa yimalabinina nandi mu yivala mbana yimamusindiga uba murumitsi na mugobutsi ogu.

³⁶ Moise amapalisa bisi Israel o Egypte. Amalasanga bilimba na bimaga ombu bisi Egypte ava bamatolila o Mubu uBenga na ava bamatsanina o kumu magumana mabilima.

³⁷ Moise jaʼ beni amavosa na baIsrael rie: Nsambi osola umosi va gari enu uba mubiyitsi munongu mosi nana amansolila.

³⁸ Rangiminanu yiri Moise amaba na baIsrael o kumu, amaba yikambi ombu batji betu ava yiansa yimavosila nandi o julu mukongu uSinai, avana amagululu mambu mamonyu maNsambi ama tuikelisi te na namunyi.

³⁹ Bataji betu bamamututsa na bamaronda ugabuga o Egypte

⁴⁰ na bamalenda Aaron rie: Tuvayili bansambi aba tuilabi na misu metu mu mbari Moise eni omatupalisa o bulongu buEgypte tugejabi adikavu nandi.

⁴¹ Ava Moise amabila o julu mukongu jogu bamavaga kosi na bamalaba ubueji na jionyi.

⁴² Mbana Nsambi amabaliyila nsima yiri bayitsi wisi na tsungi na bambuelili nana dimasonugulu mu dibuku dibabiyitsi rie: BaIsrael dumapagulila pagu na miensili ava dumabila o kumu te na magumana mabilima?

⁴³ Nesi, dumavaga yibagunu yindagu Molek na yibagunu yimbuelili Rephan abi dumabeganga na abi dumayitsanga. Kabogu nyudugusuga nodubega o yiari yina yiBabylone.

⁴⁴ Ava bataji betu bamabila o kumu bamalinganga na Ndagu Nsambi; muna Ndagu eni bamakelisanga mamanyi amamasonugu migaga miogu. Tungitsi jiNdagu eni jimaba nana Moise amarumunu na nana Nsambi amamulasila.

⁴⁵ Ndagu eni jimavegu ombu bataji betu, jimawendanga nogu ava bamawendusulu na Josue. Ava bamatoyila na bifumba bisusu, Nsambi amabavega mangolu udila bavinitsi bogu. Nesi te na temu David

⁴⁶ omarondungu na Fumu, bamayitsanga Nsambi muna Ndagu eni. David amaronda urunga Ndagu Nsambi ajimavangunu na Jacob tumba

⁴⁷ Solomon amasolu ujirunga.

⁴⁸ Nsambi aguvu uneni, agetsani mu mandagu amamarungu na batu. Mubiyitsi umosi amasona diambu diandi rie:

⁴⁹ Fumu amavosa rie: Julu jivu yitsiga yiami yibufumu na butamba buvu yisunsulu yimakulu mami. Ndagu jimunongu yi dutungila? Mbura yi dupega aji nyutsaninanga?

⁵⁰ Tsiʼ meʼ beni agumasala bima bieni biotsu?

⁵¹ Jenu mimbini, duna mirima migala na matuji madiba! Temu tsiotsu duigayini na Yinyunyi yiNsambi. Nana bataji benu bamabila nana jenu wenu duvu.

⁵² Je vamaba babiyitsi abasamakuanu na bataji benu? Jogu bamaboka abamalelonsa durugu duAgusungama agu jenu dumafunda noboka.

⁵³ Dumadila migaga miNsambi ombu biansa, ne nana dugemikelisi!

Dufu duEtienne

⁵⁴ Ava bivunda bineni bamagululu mambu meni bamanyoga kabu jineni te na misu mogu mamabenga.

⁵⁵ Tumba Etienne agumabasa na Yinyunyi yiNsambi amagengila yisuisu o julu; amalaba bundumba buNsambi na Jesus arelama va mabaala mandi.

⁵⁶ Amavosa rie: Labatianu, nyilabi julu jimadibuga na Muana Mutu arelama va mabaala maNsambi.

⁵⁷ Mbana bamagamuga na bamadibiga matuji mogu yiri bagogulu adi evosi.

⁵⁸ Bamamusindila va gusu kana musiengi na bamamutindila mamanyi. Abamamutindila mamanyi bamawakisa biduaru biogu ombu mufudu, diina diandi Saul.

⁵⁹ Ava bamamutindilanga mamanyi Etienne amasambila rie: Aa, Fumu ndili.

⁶⁰ Mbana amakutama na amagamuga na diufi dineni rie: Fumu batandi disumu diedidi. Anomana uvosa mambu meni amafu.