Bisalu 6 - La Sainte Bible en Langue Yipunu

Yisambuali yibabaala bamasolu uwamusa bilumbi

¹ Dutalu dubadukitsi dunofuna vamaba mitsundu va gari baJuif abamavosanga Grec na abamavosanga Hebreu. Abamavosanga Grec bamavosa yiri bakuili bogu bamawimunu ava bamagabilanga biguji yilumbu na yilumbu.

² Digumi na babeji bamanengila badukitsi bapuela na bamavosa rie: Tumasolu ulonsa mambu maNsambi kabogu dibandu yi tuisalili bisalu bibiguji?

³ Solanu yisambuali yibabaala abedodusu mu diambu didiela na abamabasu na Yinyunyi yiNsambi; tukabaveganu yisalu yieni.

⁴ Jetu tukevega yika usambila nolonsanga mambu maNsambi.

⁵ Botsu bamadisinga. Kabogu bamasola Etienne, dibaala adimaba na yitu yineni na adimabasu na Yinyunyi yiNsambi na Philippe na Prochore na Nicanor na Timon na Parmenas na Nicolas agumaba muisi Antioche agumakaluga muJuif.

⁶ Barnabasulasana ombu bilumbu abamababiatsa.

⁷ Mbembu Nsambi jimaviolila unyava te no Jerusalem; badukitsi bamafunanga na bavagulitsi bapagu bapuela bamavaga yitu.

Bamasikiga Etienne

⁸ Etienne agumagabulu miula miNsambi amavaganga bilimba na bimaga bipuela mu mbari maboti na mangolu maNsambi bimaba nandi.

⁹ Basusu bamatsunda nandi; jogu bamaba bisi dibundu adimanengulungu rie: Baviga bajegusu. (Mu dibundu dieni mumaba baJuif abamaruyila o Cyrene na Alexandrie na Cilicie na Asie.)

¹⁰ Tumba Yinyunyi yiNsambi amavega Etienne diela la dibandu basamarungulila ugagana nandi.

¹¹ Mbana jogu bamafuta batu yiri bovosa rie: Jetu tutsimugulu ulensa elensi Moise na Nsambi.

¹² Mu dionyi botsu na bivunda na milonsi mimigaga bamanyoga. La dibandu bamagaangila Etienne na bamamubega o yibenguna yibivunda bineni.

¹³ Mbana bamabega bambeji abamamufurila rie: Dibaala diedidi elensi Ndagu Nsambi na migaga miMoise.

¹⁴ Amavosa rie: Jesus muisi Nazareth opansa Ndagu Nsambi na otsiemusa bifu abi Moise amatulonsa.

¹⁵ Botsu abamaba o yibenguna yiogu banogengila yinsi yiEtienne bamayilaba nderi yiyiansa.