Bisalu 27 - La Sainte Bible en Langue Yipunu

Paul amasindugu o Rome

¹ Dinotabulu yiri jetu tuwenda o Italie bamawakisa Paul na bisi tsugu bamosi ombu yivunda yikama bagora yidibuli dikaga, diina diyivunda yieni Julius.

² Tumanangama o dikumbi diAdramytte adimavioyila o Asie. Aristarque muisi Macedoine agumaruyila o Thessalonique amaba netu.

³ Ava kedi tumatola o Sidon; Julius agumakelisanga Paul na buranga amamusingisa uwenda ombu bambatsi bandi uyevuma mua pesu.

⁴ Tunogusuga vana tumavioyila adu nyinga Chypre mu mbari punga jimatugandisa uwenda sungingi.

⁵ Tunosabuga mubu uCilicie na uPamphylie tumatola va Myra o Lycie.

⁶ Avana yivunda yikama bagora amadila dikumbi diAlexandrie adimawenda o Italie mbana amatunangisa muna.

⁷ Mua bilumbu bipuela tumawendanga va gegeyi mbana na maguga maneni tumatola o disimu diCnide. Punga jisamagaru yiri tuwenda na mabaala kabogu tumavindama te na nyingi Crete o dinsongi diSalmone.

⁸ Na maguga tumavioyila bebeli na disimu te na tumatola va mbura ajinengulungu Bons Ports, ajisamaba vala na Lasee.

⁹ Tumayetsinga puela na tumajaba yiri turungula ulaba diambu va temu eni mu mbari mfula jimaketubila.

¹⁰ La dibandu Paul amalubusila bambatsi bandi rie: Tulaba maguga maneni mu muendu egugu ne mufuna ne dikumbi biubungana na bamosi bofu mu mamba.

¹¹ Tumba yivunda yikama bagora asamagaru, amagulu yika diufi difumu dikumbi na dimubeyitsi udionyi.

¹² Dibungu dieni disamaba diboti uviosila mfula la dibandu bapuela abamaba mu dikumbi bamatabulila diambu ugusuga vana. Bamaronda uwenda o dibungu diCrete adinengulu Phenix disungasana o yiari ayi wisi epalili.

Mungudi

¹³ Dupepi dutandu dumavuga kabogu bamatasa yiri borungula uwenda. Bamanyangula nyilu na bamavioga va mugula nyingi jiCrete.

¹⁴ Tumba mua pesu temu punga jineni ajinengulu Euraquilon jimarugasana o yiari yimukongu yinyingi.

¹⁵ Mu diambu dipunga, dikumbi dimapeva na tusamamuerungula udisungiga.

¹⁶ Ava tumavioyila va mugula nyingi jigeyi ajinengulungu Cauda tumalaba mua duvotsu ne nana tumalaba uvura usungiga mupaka.

¹⁷ Bamagupodula mu dikumbi mbana bamawarisa dikumbi na dikuku. Bamalaba goma yiri boyegakama o dukueku duLibye kabogu bamanyangula mikudu na bamamuepeva na punga eni.

¹⁸ Mungudi umagumbanga kabogu ava kedi bamabuayila mufuna

¹⁹ mbana ava kedi ajimubeji bamabuaga bisalulu bidikumbi.

²⁰ Bilumbu bipuela tusamamuelaba nesi wisi nesi bambuelili na punga jimaviolila ugumba. Tumakubula yitu ugobulu.

²¹ Bisi dikumbi bamabusa uji yitsingu yineni. Mbana Paul amarelama amavosa nogu rie: Bambatsi bami mbe jenu dumakululu na mbe dusamagusuga va Crete mbe tugaalaba maguga memama.

²² Kokolu tsienu, sunsanu mirima! Vagoba mutu ne umosi agufu yika dikumbi diubungana.

²³ Mukolu, yiansa yiNsambi ami agu nyiyitsingi, yimalabana nami na yimavosa nami rie: Paul guyalaba goma.

²⁴ Ngensa gulabana na kaga na va julu vana mu diambu diagu, Nsambi aguvu na yingeba agogaru yiri abavu nagu mu dikumbi bofu.

²⁵ La dibandu sunsanu mirima mienu mu mbari nyivayili Nsambi yitu yiri diuba nana dimansingululu.

²⁶ Dimosi, dikumbi diudiama na jetu tusiala va nyingi.

²⁷ Te na mukolu agu digumi na muina tumayenatsagamanga mu mubu uMediterrannee. Ava gari wisi basalitsi bamatasa yiri bamabambana na disimu.

²⁸ Banoweliga ndonga bamadila magumarieru na metera yisiamunu; banokueka mua vala bamamueweliga na bamadila magumabeji na yinana yimetera.

²⁹ Bamaba na keri yiri dikumbi diuduku na mamanyi kabogu bamabuaga nyilu jina; mirima miogu mimaba o julu ava bamavivilanga wisi.

³⁰ Basalitsi bamaronda urina; bamavaga nderi bebuayi banyilu kabogu mupakg besundusi.

³¹ Tumba Paul amatsingula yivunda yibagora na bagora bandi rie: Pa batu bebaba bagotsana o gari dikumbi jenu botsu dugorungula ugobulu.

³² La dibandu bagora bamatabulila mikudu amimasikiga mupaka na uonyi umapeva.

³³ Ne wisi ukatebuga Paul amaruma batu botsu yiri baji. Amabuesa rie: Namunyi duka digumi na bilumbu bina abi mirima mienu mitsuiyili na duibusi uji.

³⁴ Kabogu jianu yiri dugofu. Jabanu yiri dugotsiemusa ne dunanga dumosi.

³⁵ Anomana uvosa nana, amabonga dipa, amagabusila Nsambi diboti va gusu batu botsu mbana amadibukula na amabanda uji.

³⁶ Botsu bamasunsa mirima na bamaji wandi.

³⁷ O dikumbi jetu tumaba kama beji na magumidusambuali na batu basiamunu.

³⁸ Botsu banogukuru bamaronda ulengasana dikumbi kabogu bamabuaga uresi.

Upumuga

³⁹ Wisi unotebuga basamamuejaba agu bavu tumba bamalabilila dukueku kabogu bamaronda uyetsiekiga dikumbi.

⁴⁰ Bamaletabula mikudu mibanyilu mbana bamanyangula mikudu miyivepi. Va julu vana bamatunga dikuku dinsima yiri dikumbi diuwenda o disimu.

⁴¹ Vana vana dikumbi dimayembangama va yinsunsa yiyisieyi; mbasu jimagakama kabogu nsima jimapansiga na mangolu mamibiji.

⁴² Bagora bamaronda uboka bisi tsugu yiri bagodila nsila urina.

⁴³ Tumba yivunda yikama bagora asamaronda yiri Paul aboku la dibandu amabagandisila. Amaruma yiri botsu abejabi ubuila bareyili mu mamba usabuga o disimu.

⁴⁴ Mbana amaruma basusu yiri banangimi va julu tsitsimbi vo bisusu abitsayimi yiri tanguji bosabuga wandi. Anana jetu botsu tumasabuyila o disimu.