Bisalu 25 - La Sainte Bible en Langue Yipunu

Paul amawenda ombu kaga

¹ Festus amatsana bilumbu birieru o Cesaree mbana amawenda o Jerusalem.

² Bivunda bibavagulitsi bapagu na bivunda bibaJuif bamamuefunda Paul.

³ Bamawivula Festus na yindandi yiri atindi Paul o Jerusalem mbe baronda umuboka mu nsila.

⁴ Tumba Festus amawagula rie: Paul aji o tsugu o Cesaree na meʼ beni ugabuga nyigabuyi namapapa.

⁵ Pa bivunda bienu bana diambu umufuengilila, tʼwendianu.

⁶ Festus amabuesa mua bilumbu (yinana vo digumi) mbana amagabuga o Cesaree. Ava kedi amatsana va mulebi na amanengila Paul.

⁷ Ava jandi amatolila, baJuif abamaruyila o Jerusalem bamamutsiengila na bamamufuengilila mambu mamfurulu.

⁸ Paul amawaka rie: Nyisamasumuna migaga; ne mibaJuif ne miNdagu Nsambi ne mikaga.

⁹ Festus amaronda ulasa baJuif ubueji kabogu amawivula Paul rie: Guisingi uwenda o Jerusalem noyefundusu nami?

¹⁰ Paul amawaka rie: Nyiji va mulebi ukaga avana nyufundusulu. Nyisamavayila baJuif dibi diotsu, ndeju guidijabi na buranga.

¹¹ Pa nyimavaga adigaa diwelimina vo dineni adiwelimina yiri nyuboku, ngebusi ufu tumba bemfuengili na mambu mamfurulu ngogaru uwakusu ombu gogu. Nyirondi uwenda ombu kaga.

¹² Mbana Festus anomana utunga fundu na batu bandi amatubula rie: Ndeʼ guirondi uwenda ombu kaga; ka wendanga ombu gandi.

Paul va gusu Agrippa na Berenice

¹³ Mua bilumbu binovioga kaga Agrippa na Berenice bamatola o Cesaree uyevega Festus dusagu.

¹⁴ Banotsana mua bilumbu bipuela, Festus amatolisa diambu diPaul ombu kaga. Amamutsingula rie: Nyina mutu vava agu Felix amasila o tsugu.

¹⁵ Ava nyimawendila o Jerusalem bivunda bibavagulitsi bapagu na bivunda bibaJuif bamamufunda ombu gami na bamakwivula umukilisa.

¹⁶ Nyimabagabusila rie: Tsiri yifu yibisi Rome uwakisa mutu agumafundusu mbe asakapalusu va gusu bafuengilitsi bandi umana munu andi.

¹⁷ Bamaruga nami vava. Nyisamalevuma, ava kedi nyimatsana o mulebi na nyimaruma yiri banengili dibaala dieni.

¹⁸ Bavinitsi bandi bamamufuengilila yika mambu mogu, diwendi rie: mambu mamuyitsa ogu

¹⁹ na mambu maJesus eni agumafu agu Paul amasingisila yiri aji monyu.

²⁰ Nyimakambulu ujaba munu aguvu uwelimina mu nguba eni. Nyimamuwivula yeri esingi uwenda o Jerusalem uyefundusu.

²¹ Tumba amaronda ufundusu o mulebi ukaga kabogu nyimaruma yiri bamukelisi o tsugu te na vana nyudilila diweru umusindiga ombu kaga.

²² Agrippa amatsingula Festus rie: Nyirondi ugulu munu udibaala dieni wandi.

²³ Festus amagabusilarie: Kabogu mugesa gumugulu. Ava kedi Agrippa na Berenice bamaruga na mugungi uneni; bamakota o mulebi va mosi na bivunda bibavagulitsi bapagu na bivunda bimusiengi. Festus amaruma yiri babeyi Paul.

²⁴ Mbana Festus amavosa rie: Dibaala diedidi amafuengululu na baJuif abavu vava na abavu o Jerusalem. Botsu berondi yiri afu.

²⁵ Tumba nyisamalaba yiri amavaga diambu diwelimina ufu; na amakwivula uwenda ombu kaga na nyimatabula diambu yiri awendingi.

²⁶ Tumba ngaa na diambu diwelimina usona ombu kaga kabogu nyimamubega va gusu enu, sinsa viri va gusu ndeju kaga Agrippa yiri gunogulu miunu miotsu mibeji gunsingula adivu diwelimina umusonina.

²⁷ Nyilabi yiri digaa diwelimina utinda muisi tsugu pa ngopalisa kengili adi bemufuengilili.