Bisalu 23 - La Sainte Bible en Langue Yipunu

¹ Paul amagengila bivunda biotsu yisuisu na amavosa rie: Baana bataji bami, ubanda va dibandu te na namunyi ngaa na diambu va gusu Nsambi.

² Ananias, yivunda yibavagulitsi bapagu amaruma jogu abamaba bebeli nandi umudimba.

³ Mbana Paul amawaka rie: Mungo penda, Nsambi ogulasa maguga! Guinsosisi mu diambu dimugaga ne nana guisumuni mugaga ava guirumini yiri batu bandimbi!

⁴ Jogu abamaba bebeli nandi bamavosa rie: Kabogu guisiengi yivunda yibavagulitsi bapagu?

⁵ Paul amavosa rie: Kokolu tsienu, ngaajaba! Kabogu aji yivunda yibavagulitsi bapagu? Ngensa dimasonugu rie: Guyalensa barumitsi.

⁶ Paul amajaba yiri dikabu dimosi didibuli dimaba baJuif abamaba baSadducee na disusu baJuif abamaba baPharisie la dibandu amagamuyila va gusu ogu rie: Baana baTaji bami, menu nyiji muPharisie nesi muana umuPharisie. Nyimafundusulu mu mbari nyina ditasa yiri abamafu bomuerambuga.

⁷ Posulu tsieni tsimabangisa mutsundu va gari baPharisie na baSadducee, dibuli dimakegaba.

⁸ (BaSadducee bevosi yiri vagaa durambugu duabafu na yiri vagaa biansa vo binyunyi bibi tumba baPharisie bebivayili yitu.)

⁹ Vamaba mutsundu uneni na basonitsi bamosi babaPharisie banorelama bamavosa rie: Jetu tugelabi yiri dibaala diedidi ana diambu ne dimosi. Tanguji yinyunyi yibi vo yiansa atsivosa nandi.

¹⁰ Nduku jinosinsa uroga yivunda yibagora amalaba keri yiri Paul oboku kabogu amasindiga bagora umugusula va gari ogu nomubega o yivaga.

¹¹ Mukolu agumubeji, Fumu amalabana na Paul na amavosa rie: Sunsa murima! Laba gumansingisila bumbeji o Jerusalem, guvaga munongu mosi o Rome wandi.

Bamatungila Paul fundu

¹² Wisi unotebuga, baJuif bamatunga fundu. Bamagana kaka yiri bagomueji nonu te na boboka Paul.

¹³ Jogu abamatunga fundu bamaba ne uviolila magumana mabatu.

¹⁴ Bamarasuna bivunda bibavagulitsi bapagu na bivunda na bamavosa nogu rie: Jetu tumagana kaka yiri tugoji yima yiotsu te na tuboka Paul.

¹⁵ Kabogu tindanu yilumbi o yibenguna yibivunda yiri bowivula yivunda yibagora ubega Paul ombu genu nana nderi duirondi ujaba diambu na buranga. Ne jandi akabambana nenu jetu tuba tukunsama umuboka.

¹⁶ Muana katsi Paul anojaba fundu ogu amawenda uyelubusa Paul.

¹⁷ Paul amanengila gora na amavosa rie: Bega mufudu egugu ombu yivunda yibagora mu mbari ana diambu uvosa nandi.

¹⁸ Yivunda yikama bagora amabega mufudu eni ombu yivunda yibagora na amavosa rie: Muisi tsugu, diina diandi Paul atsindengila na atsikwivula ubega mufudu egugu ombu gagu mu mbari ana diambu ugutsingula.

¹⁹ Yivunda yibagora amawenda fundu na mufudu eni; amamuwivula guna rie: Diambu yi guirondi unsingula?

²⁰ Amawagula rie: BaJuif bamavangana uboka Paul na bamatinda yilumbi ombu gagu yiri gumubega o yibenguna yienu yineni nana nderi bivunda berondi utsiyisa diambu diandi na buranga.

²¹ Kokolu tsiagu, guyabagulu, bavu bapuela, ne magumana aberondi umugaanga. Bamagana kaka yiri bagoleji vo unu te na bamamuboka.

²² Yivunda yibagora amatsingula mufudu eni rie: Guyatsingula mutu adi gutsinsingula, mbana amamuganina.

Paul amasindugu ombu Felix yivunda yibulongu

²³ Mbana yivunda yibagora amanengila bagora babeji na amabaruma rie: Solanu kama beji tsibagora na magumidusambuali mababeyitsi babakabala na kama beji tsibagora na makongu mogu. Banu dukunsama uwenda o Cesaree ava tsisiga.

²⁴ Dukunsa na bakabala wandi ubeyila Paul yiri otola ombu Felix yivunda yibulongu.

²⁵ Mbana amatinda muganda egugu rie:

²⁶ Menu Claude Lysias, nyitindi mbolu ombu Felix yivunda yibulongu!

²⁷ BaJuif bamagaanga dibaala diedidi na mbe bamuboka tumba nyinojaba yiri aji muisi Rome nyimawenda na bagora bami uyemugobula.

²⁸ Nyinoronda ujaba dibandu adi bamamufuengililanga nyimamubega va gusu bivunda o yibenguna yineni.

²⁹ Nyimalaba yiri bamamufuengililanga mu diambu dimigaga miogu tumba jandi asamavaga diwelimina uboku vo ukotusu o tsugu.

³⁰ Nyinolubusu yiri baJuif bamamutungila fundu nyimatabula diambu umusindiga ombu gagu. Nyimatsingula bafuengilitsi bandi yiri bayemufuengilila ombu gagu. Yika nguali.

³¹ Bagora bamadugusu motsu nana bamarumunu. Bamabonga Paul na bamamubega mukolu na mukolu te no Antipatris.

³² Ava kedi, bagora bamawendanga na makulu na bamagabuga o yivaga, bamasila babeyitsi babakabala uwenda na Paul.

³³ Banotola o Cesaree, babeyitsi babakabala bamavega muganda ombu yivunda yibulongu na bamawakisa Paul ombu gandi.

³⁴ Yivunda yibulongu anoranga muganda amawivula Paul rie: Yiari yi gumarugasana? Anogulu yiri aji muisi Cilicie amamutsingula rie: Gugolemana munu te na bafuengilitsi bagu boruga.

³⁵ Mbana amaruma yiri bomukotisa o ndagu Herode.