Bisalu 22 - La Sainte Bible en Langue Yipunu

¹ Merianu: Nyirondi udutsingula amami.

² Banogulu yiri evosi Hebreu bamavola sui! Paul amavosa rie:

³ Nyiji muJuif, nyimaburulu o Tarse o Cilicie tumba avava Jerusalem nyimabanguyila. Nyimawiji ombu Gamaliel agumanjabisa migaga mibataji betu. Nyimasalila Nsambi na yiusila nana duimusalili namunyi.

⁴ Nyimakuana bamosi na nyimakotisa basusu o tsugu.

⁵ Yivunda yibavagulitsi bapagu na dibuli diotsu dibivunda bejabi yiri ngefuri. Tsiri ombu gogu nyimadilila musuga uwenda o Damas ugaanga batu nobatunga na bapanga nobabega vava ukilusu?

Paul amatubula dugobutsu duandi

⁶ Diweru dimuangulu ava nyimabila mu nsila bebeli no Damas, vana vana yijalala yineni yimaruyila o julu na yimavedama yiari na yiari.

⁷ Nyimaberuga va tsi na nyimagulu diufi adimakwivula rie: Saul, Saul dibandu yi guikuanini?

⁸ Nyimawivula rie: Fumu, ndeju la nyi? Na amakwagula rie: Menu la Jesus muisi Nazareth agu guikuaningi.

⁹ Jogu abamaba nami bamalaba yijalala na buranga tumba basamagulu diufi dijandi agumavosanga nami.

¹⁰ Mbana nyimawivula rie: Fumu yi nyuvaga? Fumu amansingula rie: Relama, wenda o Damas, aguna bogutsingula diotsu adi Nsambi oguruma uvaga.

¹¹ Yijalala yieni yimapaga yidunga kabogu abamaba nami bamambeganga na nguangu te no Damas.

¹² Kabogu mutu, diina diandi Ananias amatsana guna, jandi amayitsanga Nsambi na amadedilanga migaga mietu na baJuif botsu baDamas bamamusingisilanga bumbeji.

¹³ Amaruga ombu gami na amavosa nami rie: Saul, tiemuna! Muna diweru dieni nyimatiemuna na nyimamuelaba.

¹⁴ Amavosa rie: Nsambi bataji betu amagusola ujaba duganu duandi. Amaronda yiri gulaba agusungama, nogulu mambu mandi.

¹⁵ Gusingisila bumbeji ombu batu botsu; diwendi rie: mambu ama gumalaba na ama gumagulu.

¹⁶ Yi guikelisi? Relama. Gugobatusu yiri masumu magu mogugusulu mu diina diFumu?

Paul amatubula nana amasindugu ombu abagaa baJuif

¹⁷ Nyimagabusila o Jerusalem. Ava nyimasambililanga o Ndagu Nsambi, nyimalaba yiriariamu.

¹⁸ Amuna Fumu amansingula rie: Lensa nogusuga o Jerusalem mu mbari batu bagogaru pa gunsingisila bumbeji.

¹⁹ Nyimawagula rie: Fumu, bejabi na buranga yiri nyimawendanga o Mandagu maBibenguna na nyimakotisanga bamosi o tsugu na nyimadimba basusu mikasa abamaguvayila yitu.

²⁰ Ava bamabokila mbeji agu, Etienne menu wami nyimaba guna, nyimaba kingu mosi na jogu abamamuboka na nyimakelisanga biduaru biogu.

²¹ Mbana Fumu amansingula rie: Wenda nyugusindiga vala ombu jogu abagaa baJuif.

Paul na yivunda yibagora

²² Bamamugululu te na amavosa mambu meni. Tumba banomagulu bamagamuga rie: Mugaangiann! Mubokianu! Agaa muboti!

²³ Bamagamuganga na bamamuangisanga miiuru na kabu jineni mbana bamamutinda mamanyi.

²⁴ Yivunda yibagora amaruma yiri bakotisi Paul o gari yivaga nomudimbisa mikasa yiri otubula dibandu yi bamamufuengilila.

²⁵ Ava mbe bamudimbila mikasa, Paul amawivula yivunda yikama bagora ayimaba vana rie: Dimaduvegu musuga udimba muisi Rome mikasa, agusakavegu mbela?

²⁶ Ava yivunda yikama bagora amadigululu amawenda ombu yivunda yibagora na amamuwivula rie: Yi guivayi? Gugejiabi yiri aji muisi Rome?

²⁷ Kabogu yivunda yibagora amawenda ombu Paul na amamuwivula rie: Je guji muisi Rome? Paul amawagula rie: Nyiina.

²⁸ Yivunda yibagora amavosa rie: Menu nyiji muisi Rome tumba nyimafuta mbongu tsipuela muba. Paul amavosa rie: Ombu gami tsiri nana. Nyimaburulu o Rome.

²⁹ Vana vana jogu aba mbe bamudimba bamakakana; yivunda yibagora anojaba yiri Paul aji muisi Rome amaregama na goma mu mbari amamutungisa.

Paul va gusu bivunda bineni

³⁰ Yivunda yibagora amaronda ujaba dibandu adi baJuif bamafuengilila Paul; Kabogu ava kedi amaruma yiri bamunyanguli bapanga. Mbana amanengila bivunda bibavagulitsi bapagu na bivunda bisusu o yibenguna yiogu na amaretsiga Paul va gusu ogu.