Bisalu 20 - La Sainte Bible en Langue Yipunu

Mulingu uPaul o Macedoine no Grece

¹ Kimbu eni jinosuka, Paul amagukiga bango yitu. Anomana ubawarisa amabaganina na amawenda o Macedoine.

² Amalinga mu banda tsi eni uyenalubusanga badukitsi. Mbana amatola o Grece

³ uyetsana tsungi yirieru. Mbe aronda uwenda o Syrie tumba anogulu yiri baJuif bamamutungila fundu amagabuga o Macedoine.

⁴ Batu bamayemuvetsiga te no Asie. Miina mogu amama: Sopater muana Pyrrhus muisi Beree na Aristarque na Secundus bisi Thessalonique na Gaius muisi Derbe na Timothee na Tychique na Trophime wandi, jogu bamaba bisi Asie.

⁵ Bamareyila o gusu na bamatukelisanga o Troas.

⁶ Bilumbu bimapamagambunadufunusu binovioga jetu tumawenda o Philippes uyetsana bilumbu biranu mbana tumatola o Troas, avana tumasilama tsona mosi.

Paul amasita ulingula Troas

⁷ Tsisiga samedi tumagukama utsana va tavula Fumu. Paul amamoganga na batu, diwendi rie: amasakiga yilombi yiandi te na va gari wisi mumbari amagana uwenda kedi.

⁸ Mu yibuku ayi tumatsanina mumaba puela balambi.

⁹ Mufudu diina diandi Eutyche amatsana va fenetera; Paul anosakiga yilombi yiandi Eutyche amatimbanga yilu te na amawenda yilu yineni kabogu amabonduga o kilingu ajimurieru te no tsi. Bamamurasuna afu.

¹⁰ Tumba Paul anosunduga amamubumba. Jandi rie: Sunsanu mirima, aji monyu.

¹¹ Mbana amamuemata o julu; amababukulila mapa na bamaji. Amabuesa umoga te na wisi umatebuga mbana amabaganina.

¹² Bamayevetsiga mufudu eni agu mbe ufu o ndagu andi na dionyi dimawarisa botsu.

Mulingu o Troas te no Milet

¹³ Tumareyila Paul mu bota na tumavaga dikuku uwenda o Assos o tumavangana ubonga Paul mu mbari amavioyila adu disimu.

¹⁴ Tunomurasuna o Assos amanangama o bota na tumawenda va mosi o Mitylene.

¹⁵ Tumarambuga vana na ava kedi tumatola va nsungisini na Chio. Mbana tumabegu na dikuku o yiari yiSamos na ava kedi mosi tumawenda o Milet.

¹⁶ Paul mbe aronda utola o Jerusalem uyeviosa feta Pentecote kabogu tumavioga Ephese kuasa yiri tugotsiemusa temu o Asie.

¹⁷ Paul amasindiga yilumbi o Ephese uyenengila bivunda bidibundu umurasuna o Milet.

¹⁸ Banotola amavosa nogu rie: Jenu duijabi nsanunu ami ubanda yilumbu ayi nyimatolila o Asie.

¹⁹ Nyimasalila Fumu na murima usunda diuleba nyimalelaba maguga ava baJuif bamatungila fundu.

²⁰ Duijabi yiri nyisamasuega ne dilongi dimosi ava nyimalonsila o Ndagu Yibenguna vo o mandagu menu.

²¹ Nyimalubusa nesi baJuif nesi abagaa baJuif yiri bokalula diela novayila Fumu Jesus yitu.

²² Kabogu yilumbu yi na nyangu nyiwendi o Jerusalem mu mbari nyimasindugu na Yinyunyi yiNsambi. Ngejabi adi nyuyelaba.

²³ Dimosi nyijabi, Yinyunyi yieni amandubusa yiri nyulaba maguga na nyukotusu o tsugu mbura na mbura.

²⁴ Tumba monyu ami ugaa na tsongu; adi nyirondi adidi rie: Nyumanisila yisalu ayi Fumu Jesus amapega. Yisalu yieni yivu usamuna Musamu Uboti umaboti maNsambi.

²⁵ Nyimadulingulanga jenu botsu ava nyimadusamuninanga Musamu uDurumu duNsambi.

²⁶ Tumba yilumbu yi na nyangu nyijabi jenu botsu dugomuendaba.

²⁷ Kabogu nyidutsinguli rie: Pa mutu obungana tsiri diambu diami mu mbari nyimadusamunina malongi motsu maNsambi tsiri usuega diambu.

²⁸ Kabogu kebananu jenu beni nokelisa batu aba Yinyunyi yiNsambi amaduvega. Bakelisianu nana mubungulitsi ubindombu ekelisili migamba miandi mu mbari bamasumbu na malungu maMuana Nsambi.

²⁹ Nyijabi yiotsu ayi nyiwendi bamosi boruga ubanga dibundu, munongu mosi nana magena mebungili migamba.

³⁰ Nesi va gari enu volabana bamosi abofuranga ubivisa mirima mibadukitsi bamosi.

³¹ Kabogu kebananu na rangiminanu nyimawarila maguga nyangu na mukolu te na bilima birieru udulonsanga.

³² Kabogu nyidusili na Nsambi na malongi mandi maboti. Jandi orungula uduwarisa nodugabila miula ami egabili abandi.

³³ Ava nyimabila nenu nyisamanyingila ne mbongu ne lora ne biduaru bimutu ususu.

³⁴ Duijabi nyimasala na makaka memama ukelisa abamalinga nami, nesi meʼ beni.

³⁵ Nyimadulasa yiri diwelimina usala uwamusa abadeda mu mbari Fumu Jesus jaʼ beni amavosa rie: Divu diviolila ubueji ugaba tsiri ugabulu.

³⁶ Anomana uvosa nana bamakutama na bamasambila va mosi.

³⁷ Botsu bamalila na bamamuganina

³⁸ na munyongu mu mbari amavosa rie: Dugomuendaba. Bamamuvetsiga te no bota.