Bisalu 18 - La Sainte Bible en Langue Yipunu

Paul amawenda o Corinthe

¹ Mbana Paul amagusuga o Athenes na amawenda o Corinthe.

² Aguna amabenguna na muJuif, diina diandi Aquilas muisi Pont. Jogu na mugatsi andi Priscille mbe bakiloruga o Italie mu mbari kaga Claude amaruma baJuif botsu ugusuga o Rome.

³ Paul amabarasuna mu mbari amasala yisalu yimosi nogu (bamarariganga mandagu mamatsanda).

⁴ Tsona na tsona Paul amavosanga o Ndagu Yibenguna uyenaweliganga uduta nesi baJuif nesi baGrec ombu Fumu.

⁵ Tumba ava Silas na Timothee bamaruyila o Macedoine, Paul amakevega usamuna Musamu uboti na amasingisila bumbeji ombu baJuif yiri Jesus la Christ

⁶ Ava baJuif bamamulasila maguga na bamamugelilanga amabonga yikutu yiandi na amayigubula va misu mogu na amavosa nogu rie: Pa dumatsiemuga adina divu diambu dujenu beni; tsiri diambu diami. Ubongila namunyi nyiwendi ombu abagaa baJuif.

⁷ Kabogu amabaganina na amawenda uyetsana o ndagu mutu, diina diandi Titius Justus, muenyi agumayitsanga Nsambi; ndagu andi jimaba jibambana na Ndagu Yibenguna.

⁸ Crispus, yivunda yiNdagu Yibenguna amavayila Fumu yitu na bisi ndagu andi wandi. Bisi Corinthe bapuela abamagulu malongi maPaul bamamavayila yitu wandi mbana bamabatusu.

⁹ Mukolu umosi Paul amalaba yiriariamu na mu yionyi amalaba Fumu na Fumu amamutsingula rie: Guyalaba keri, lonsanga; guyadunda

¹⁰ mu mbari nyiji nagu. Mutu agorungula ugugaanga noguvaga dibi mu mbari nyina batu bami bapuela mu musiengi egugu.

¹¹ Paul amatsananga guna yilima na yibuku na amalonsanga batu Mambu maNsambi.

¹² Mu temu aji Gallion amaruma o Achaie, baJuif bamatunga fundu ugaanga Paul na bamamubega o mufundu.

¹³ Bamavosa rie: Dibaala diedidi ekungisi batu na erondi yiri boyitsa Nsambi na muyitsa agugaa uwelimina na migaga mietu.

¹⁴ Paul mbe asakawagula, Gallion amatsingula baJuif rie: Pa vavu amagaa mawelimina vo amamabiva mbe nyudigulu.

¹⁵ Tumba duitsundi mu diambu dimambu na dimiina na dimigaga mienu adina didugengili jenu beni. Ngerondi uba nsonsi jimambu meni.

¹⁶ Amabapalisa o mulebi andi.

¹⁷ Kabogu botsu bamagaanga Sosthene, yivunda yiNdagu Yibenguna, bamamudimba va gusu batu, tumba Gallion amabusa ubawamusa.

Paul amagabuga o Antioche

¹⁸ Paul amamuetsinga o Corinthe. Jogu na Priscille na Acquilas bamaganina baana bataji mbana bamawenda o Syrie. Ne bakarambuyila o Cenchrees Paul amafugu mu mbari avana amaganina kaka.

¹⁹ Banotola o Ephese, Paul amaganina Aquilas na Priscille. Anokota o Ndagu Yibenguna amatsundanga na baJuif.

²⁰ Bamamuwivula utsinga nogu tumba asamagaru.

²¹ Amabaganina novosa rie: Pa Nsambi erondi nyumueruga ombu genu. Amanangama o dikumbi o Ephese.

²² Anosunduga o Cesaree amawenda o Jerusalem uyevega bisi dibundu mbolu mbana amawenda o Antioche.

²³ Paul amatsinga mua pesu o Antioche mbana amawenda o yiari yiGalatie na Phrygie uwarisa badukitsi botsu.

Apollos amawenda o Ephese te no Corinthe

²⁴ MuJuif, diina diandi Apollos muisi Alexandrie amatola o Ephese. Amaba na posulu tsiboti na amajabanga Bisonu na buranga.

²⁵ Amalewiji mambu maFumu na amamalonsanga kengili na amamasamunangana yiusila nana mavu mawelimina tumba amajaba yika batema jiJean.

²⁶ Amalonsa na mangolu o Ndagu Yibenguna. Tumba Priscille na Aquilas banomugulu bamayemulanda na bamamubega o ndagu ogu mbana bamamusungiyila nana Mambu maNsambi mavu.

²⁷ Mbana Apollos amaronda uvioyila o Achaie. Baana bataji bamamuwarisa na bamasona muganda ombu abamagobulu o musiengi eni yiri bakamudila na yisagumunu. Anotola guna batu abamagobulu mu diambu dimaboti maNsambi bamawamusu nandi.

²⁸ Amatsunda na baJuif na amabatsingula rie: Dumatsimbu, mbana amabalasa na Bisonu yiri Jesus avu Christ.