Bisalu 15 - La Sainte Bible en Langue Yipunu

Yibenguna o Jerusalem

¹ Babaala bamosi abamarugasana o Judee banotola o Antioche bamalonsa baana baTaji rie: Pa dugorebu nana mugaga uMoise uirumi dugorungula ugobulu.

² Paul na Barnabas bamatsunda nogu na mangolu kabogu bamatabula diambu yiri Paul na Barnabas na bisi Antioche basusu bowenda o Jerusalem uyevosa diambu na bilumbi na bivunda.

³ Kabogu dibundu dimabaganina. Bamavioyila o Phenicie te no Samarie uyenatsingulanga nana jogu abagaa baJuif bamakalulila diela. Baana bataji banogulu musamu eni bamalaba nsangu.

⁴ Banotola o Jerusalem, bamadilu na bisi dibundu na bilumbi na bivunda; bamatubula motsu ama Nsambi amabavayila.

⁵ Mbana baJuif bamosi abamaba baPharisie abamagobulu, bamarelama noruma rie: Abagaa baJuif barebu wandi udugusu mugaga uMoise.

⁶ Bilumbi na bivunda bamagukama ukelula diambu dieni.

⁷ Banotsundanga, Pierre amarelama nobatsingula rie: Baana bataji duijabi yiri ubanda va kala Nsambi amansola yiri abagaa baJuif bogulu Musamu Uboti yiri bomuvayila yitu.

⁸ Nsambi oyijabi batu amalasa yiri bavu bawelimina ava amabaveyila Yinyunyi yiandi munongu mosi nana amatuveyila.

⁹ Asamavaga dupasu va gari jetu nogu; amabatandila masumu mogu ava bamamuvayila yitu.

¹⁰ Kabogu mu mbari yi duimangili Nsambi namunyi ulasa badukitsi maguga ama jetu na bataji betu tusamarungula uwanla? Disawelimina!

¹¹ Tumamuvayila yitu na tumagobulu mu diambu dimaboti maFumu Jesus, munongu mosi nana jogu bamagobululu.

¹² Ava Barnabas na Paul bamavosilanga mu diambu dibimaga biotsu na bilimba abi Nsambi amavayila abasamaba baJuif dibuli diotsu dimaba sui.

¹³ Banomana utubula motsu, Jacques amavosa rie: Jenu baana bataji kululuanu!

¹⁴ Simon abanovosa nana Nsambi amalasila durondu duandi ombu abagaa baJuif ava amasolila bamosi va gari ogu muba abandi.

¹⁵ Mbigulu jimubiyitsi jidiwarisi mu mbari mu Bisonu bisonugu rie:

¹⁶ Adina dinovioga nyumueruga na nyumuereliga ndagu David ajimaberuga, nyugukiga bivongu abimapansiga na nyumuejirungulila.

¹⁷ Mbana bansialutsu boromba Fumu na malongu motsu ama nyimanengila bomuromba wandi.

¹⁸ Anana Fumu omajabisa mambu meni amamavosila kala.

¹⁹ Mbana Jacques amabuela rie: La dibandu nyina nsala yiri bagolasa abagaa baJuif abekaluli diela maguga.

²⁰ Uviolila ubueji yiri tubasonina ubatsingula rie: Duyaji biguji abimavagulu ombu bakosi, bivu muinsi; Duyamuevaga bumbembu; duyamueji bibulu abamasuekugu nesi malungu mabibulu.

²¹ Mu mbari ubanda na kala batu belonsi migaga miMoise mu misiengi miotsu na bemirangi tsona tsiotsu mu Mandagu maBibenguna.

Muganda umatindu ombu abagaa baJuif abavu na yitu

²² Dimaba rie: Bilumbi na bivunda na bisi dibundu bamatabula diambu usindiga batu ulinga na Paul na Barnabas ava bamagabuyila o Antioche. Bamasola Jude apnengulungu Barsabbas na Silas, babaala abamagobusu na bisi dibundu.

²³ Bamatinda muganda egugu nogu: Jetu bilumbi na bivunda diwendi rie: jetu baana bataji benu, tuidutindili mamboiu, jenu baana bataji abagaa baJuif abetsani o Antioche na Syrie nesi o Cilicie.

²⁴ Tumagulu yiri babaala betu bamosi bamadupupisa mirima na posulu tsiogu. Jabanu yiri tusamabaruma udivaga.

²⁵ La dibandu tumasolila batu bebaba usindiga ombu genu. Jogu boruga va mosi na Barnabas na Paul

²⁶ abavu bambatsi betu abamabufuila mu yisalu yiFumu etu Jesus Christ.

²⁷ Kabogu aboruga Jude na Silas; bodusupulila ama tuisoni mu muganda egugu.

²⁸ Kabogu adivu diwelimina ombu Yinyunyi yiNsambi divu diwelimina ombu getu wandi. Tugerondi udubuesa puela mambu kabogu kelisanu migaga miemimi:

²⁹ Duyaji biguji abimavagulu ombu bakosi. Duyaji malungu. Duyaji bibulu biotsu abimasuekugu. Duyavaga bumbembu. Pa duikelisi miotsu mina duvu duwelimina. Kangualianu!

³⁰ Kabogu banoganina bisi dibundu bamawenda o Antioche. Banotola guna bamagukiga bisi dibundu na bamabavega muganda.

³¹ Abamadila muganda eni bamalaba nsangu mu mbari umabawarisa.

³² Jude na Silas abamaba babiyitsi, bamabawarisa na mambu mapuela.

³³ Banomana temu ogu vana baana bataji bamabagabila miula na bamabagabusa ombu jogu abamabasindiga. [

³⁴ Yika Silas amaronda usiala.]

³⁵ Paul na Barnabas va mosi na basusu bamayenalonsanga Mbembu Fumu.

Paul na Barnabas ukakana bekakini

³⁶ Mua bilumbu binovioga Paul amatsingula Barnabas rie: Tʼwendi tulingula baana bataji o misiengi miotsu ami tumalesamuna Mbembu Fumu ulaba nana betsanini.

³⁷ Barnabas amaronda ubega Jean Marc nogu;

³⁸ tumba Paul amabusa mu mbari ava bamabila o Pamphylie amatsana na asamamueronda umanisila yisalu yiogu.

³⁹ Bamaba na mutsundu uneni; la dibandu bamakakinina. Barnabas amabonga Marc, bamayenawenda o nyingi jiChypre.

⁴⁰ Paul amasola Silas, mbana bamawakusu na baana bataji ombu Fumu.

⁴¹ Jandi amalinga o Syrie na Cilicie uyenawarisanga mabundu.