Bisalu 14 - La Sainte Bible en Langue Yipunu

Paul na Barnabas bamawenda o Iconium

¹ Paul na Barnabas bamakota o Ndagu Yibenguna o Iconium. Banolonsa, baJuif bapuela na abagaa baJuif wandi bamavayila Fumu yitu.

² Tumba baJuif abamabusa malongi mogu bamapupisa abasamaba baJuif ava bamagelilanga bilumbi.

³ Paul na Barnabas bamatsinga o Iconium. Bamalonsanga mambu maFumu na mangolu na Fumu amabalasanga yiri malongi mamaboti mandi mamaba mangensa ava amabaveyila mangolu uvaga bimaga nolasa bilimba.

⁴ Vamaba dupasu va gari bisi musiengi; bamosi bamaronda baJuif na basusu bamaronda bilumbi.

⁵ BaJuif na abagaa baJuif bamavangana na bivunda yiri bokuana bilumbi nobaboka na mamanyi.

⁶ Bilumbi banodijaba bamarina te no Lystre na Derbe, misiengi amimaba o Lycaonie nesi te no biairi biotsu bimbanda tsi.

⁷ Aguna bamasamuna Musamu Uboti.

Paul na Barnabas bamawenda o Lystre

⁸ O Lystre umaba dibaala adimaba na bubomfi bumakalu ubongila va duburu duandi.

⁹ Jandi amagulungu malongi maPaul. Paul amamugengila yisuisu na amajaba yiri amaba na yitu yiwelimina ubeluga.

¹⁰ Kabogu amavosa na mangolu rie: Relama teliti na makulu magu. Jandi amarelama nodumuga dikabi na amawenda.

¹¹ Ava batu bamalabila adi Paul amavaga, bamagamuga mu mbembu ogu rie: Bansambi bamasunduga ombu getu mu yibagunu yibatu.

¹² Jogu bamanengila Barnabas Zeus na Paul Hermes mu mbari jandi agumavosanga.

¹³ Muvagulitsi upagu uZeus agu ndagu nsambi andi jimaba va dikotulu dimusiengi, amabega balumi babeji babangombi na bafelera te no miunu mindagu mu mbari amaronda yiri bobavagulila pagu.

¹⁴ Barnabas na Paul banodigulu bamapasa biduam biogu na bamawenda mambangu ombu batu beni na bamagamuga rie:

¹⁵ Aa jenu, dibandu yi duivayili nana? Jetu tuji batu munongu mosi nana jenu. Tuji vava udusamunina Musamu Uboti yiri dubusa bakosi abagaa na tsongu nogengila Nsambi aguvu monyu, agumavaga julu na butamba na mubu na biotsu abivu muna.

¹⁶ Mu temu atsimavioga amasisila malongu motsu uvaga nana berondili.

¹⁷ Ne nana elasingi na bilimba biandi yiri erumingi motsu: enoyisi mfula na ebendisi bivaru mu temu tsiwelimina; etuveyi biguji na efunisi nsangu ombu getu.

¹⁸ Ne na mambu memama bilumbi bamalaba uvura mu mbari batu bamaronda ubavagulila pagu.

¹⁹ BaJuif bamosi abamavina Paul bamaruyila o Antioche o Pisidie na Iconium. Bamapupisa batu mirima te na jogu wogu bamaba kingu mosi nogu, mbana bamamutinda mamanyi. Banotasa yiri amafu bamamupalisa va gusu kana musiengi.

²⁰ Tumba ava badukitsi bamamukandila jandi amasundila urelama na amagabuga o musiengi. Ava kedi jogu na Barnabas bamawenda oDerbe.

Paul na Barnabas bamagabuga o Antioche o Syrie

²¹ Paul na Barnabas bamasamuna Musamu Uboti o Derbe na bamadila badukitsi bapuela. Bamagabusila o Lystre, mbana o Iconium te no Antioche o Pisidie.

²² Bamawarisa badukitsi na bamabalubusa uba na yikanana. Bamalonsa rie: Tulelaba maguga maneni mbana tulaba Dummu duNsambi.

²³ Mu mabundu motsu bamabasolila bivunda; bamabusa uji ukevega o dusambu, mbana bamabasulasana ombu Fumu agu bamavayila yitu.

²⁴ Mbana jogu banovioga Pisidie bamatola o Pamphylie

²⁵ Bamalonsa Mambu maNsambi o Perge mbana bamagabuga o Attalie.

²⁶ Banorambuga vana bamagabuga o Antioche mu mbari avana bamagabulu miula usala yisalu yiNsambi ayi babanomanisila.

²⁷ Jogu banotola o Antioche bamanengila bisi dibundu na bamatubula motsu ama Nsambi amabavayila na nana amakotisila abasamaba baJuif mu dibundu.

²⁸ Mbana bamatsananga na badukitsi.