Bisalu 11 - La Sainte Bible en Langue Yipunu

Misamu miPierre ombu dibundu diJerusalem

¹ Badukitsi abamaba o Judee bamagulu yiri abagaa baJuif bamadila Mambu maNsambi wandi.

² Ava Pierre amawendila o Jerusalem baJuif basamalaba ubueji na bamamunyangila rie:

³ Kabogu gumatsana na abagaa baJuif na gumaji nogu?

⁴ Pierre amabatubulila motsu rie:

⁵ Nyimaba o Joppe na ava nyimasambililanga nyimalaba yiriariamu. Nyimalaba nderi tsanda jineni jitungu kodu tsiotsu; jimasunduga ombu gami.

⁶ Nyinojigengila buranga nyimalaba minongu miotsu mibibulu na mibilandila na mibatsoli.

⁷ Mbana nyimagulu diufi adimansingula rie: Pierre relama, biboki, gukaji.

⁸ Tumba nyimavosa rie: Nesi Fumu! Na kala nyisakaji ayimakandusu vo ayivu muinsi.

⁹ Kabogu nyimamuegulu diufi adimamuevosa rie: Ayi Nsambi amaliomisa guyayigengila nderi yivu muinsi.

¹⁰ Nyimadigulu kumbu yirieru mbana tsanda jimagabuga o julu.

¹¹ Sundila babaala barieru abamaruyila o Cesaree bamatola o ndagu aji nyimatsanina.

¹² Yinyunyi yiNsambi amansingula rie: Wenda nogu guyatumuna paga. Tumawenda, jetu na babaala basiamunu na tumakota o ndagu Corneille.

¹³ Jandi amatutsingula yiri yiansa yimalabana nandi na yimamutsingula rie: Sindiga batu o Joppe uyenengila Simon ajinengulungu Pierre.

¹⁴ Jandi ogulonsa mawelimina ugugobula, nesi bisi ndagu agu botsu.

¹⁵ Ava nyimabandila uvosa, Yinyunyi yiNsambi amasunduga ombu gogu nana amasunduyila ombu getu va dibandu.

¹⁶ Mbana nyimarangimina adi Fumu amavosa rie: Jean amabatisanga na mamba tumba jenu dubatusungu na Yinyunyi yiNsambi.

¹⁷ Je digaa diwelimina yiri abagaa baJuif bamavayila Jesus Christ yitu na bamadila pegulu munongu mosi nana jetu tumadilila? Je menu nyina musuga utumuna paga na Nsambi?

¹⁸ Banogulu nana bamavola sui. Bamadodisa Nsambi novosa rie: Diboti Nsambi erondi yiri abagaa baJuif bagobulu wandi.

Dibundu diAntioche

¹⁹ Jogu abamapansu mu diambu didikuana adimaba mu temu Etienne bamatola te no Phenicie no Chypre no Antioche. Bamasamuna Musamu Uboti yika ombu baJuif.

²⁰ Tumba bisi Chypre na bisi Cyrene bamosi abamatola o Antioche bamasamunina abagaa baJuif Musamu Uboti uFumu Jesus.

²¹ Mangolu maFumu mamaba nogu na batu bapuela bamamuvayila yitu.

²² Bisi dibundu diJerusalem banogulu misamu mieni bamasindiga Barnabas te no Antioche.

²³ Ava amatolila amalaba nana Nsambi amagabila batu bandi miula; amalaba ubueji na amabalonsa rie: Waranu na ngensa jibi nenu.

²⁴ Barnabas amaba mutu muboti agumabasu na Yinyunyi yiNsambi na mu diambu diyitu yiandi batu bapuela bamafubana mirima na Fumu.

²⁵ Barnabas amawenda o Tarse uyelanda Paul na amamubega o Antioche.

²⁶ Jogu botsu babeji bamatsana guna yilima yimosi uyenalonsanga bisi dibundu na bapuela bamagulu malongi mogu. O Antioche badukitsi bamabanda unengulu batu baChrist.

²⁷ Mu temu eni babiyitsi bamarambuyila o Jerusalem uwenda o Antioche.

²⁸ Umosi va gari ogu, diina diandi Agabus, amabiga na mangolu maYinyunyi yiNsambi rie: Mu bulongu buotsu muba dungosu dunsala. (Duonyi dumaba mu temu Claude amaba kaga.)

²⁹ Badukitsi bamatabula diambu yiri mutu uotsu owamusa baana bataji abamatsananga o Judee.

³⁰ Botsu bamasinga kabogu bamatinda Barnabas na Saul ombu bivunda biJudee.