Bansonsi 9 - La Sainte Bible en Langue Yipunu

Abimelek ubiatsu ebiatsu kaga o Sichem

¹ Abimelek muana dibaala uYeroubaal-Gedeon amagabuga o Sichem ombu bakatsi bandi nombu yifumba yinguji andi na amavosa rie:

² Kokolu tsienu wivulanu baneni baSichem rie: Diwelimina yiri magumidusambuali mabaana bababaala ba Yeroubaal badurumi vo mutu mosi abi kaga enu? Rangiminanu wandi yiri menu nyivu muana enu.

³ Bakatsi bandi bamayenavosulilanga mambu mandi ombu baneni baSichem. Bamatabula diambu ufubana na Abimelek mu mbari bamavosa rie: Avu muana taji etu.

⁴ Bamamuvega magumidusambuali mambongu atsi bamagusula o ndagu nsambi jiBaal-Berit. Abimelek amatsisalisa uwamusa bifufu na mimbini yiri bomurondanga.

⁵ Amawenda o ndagu taji andi o Ofra na amaboka baana bataji bandi bababaala, baana baYeroubaal; magumidusambuali mababaala va julu dimanyi dimosi. Yika Yotam agumaba marina maYeroubaal-Gedeon amarina mu mbari amasuema.

⁶ Baneni baSichem botsu na bisi ndagu Bet-Millo bamabenguna va mosi; bamatubula Abimelek kaga va mugula usena o Sichem.

Dusavu duYotam

⁷ Yotam amatsingulu dionyi. Amayetsana o julu mukongu uGarizim, guluanu adi amabatsingula ava amagamuyila rie: Jenu baneni baSichem kululuanu yiri Nsambi adugulu!

⁸ Yilumbu yimosi, miri mimawenda uyebiatsa kaga. Mimatsingula muoliva rie: Turumi!

⁹ Tumba muoliva umabawaka rie: Je nyutsiemusa bundumba bumatsi mami, amepeyi duyitsu dubansambi na dubatu uyenarumanga miri?

¹⁰ Miri mimanengila mufiga rie: Ruga yiturumanga.

¹¹ Tumba mufiga umabawaka rie: Je nyutsiemusa bundumba budueyi duami na bumilunda miami uyenarumanga miri?

¹² Miri mimanengila mfuga ajimaburanga mirayisan rie: Ruga yiturumanga!

¹³ Tumba mfuga eni jimabawaka rie: Je nyutsiemusa bundumba bumalamu mami amelasi bansambi na batu ubueji uyenarumanga miri?

¹⁴ Mbana miri miotsu mimanengila yifundi rie: Ruga yiturumanga!

¹⁵ Yifundi yimawaka miri rie: Pa duirondi umbiatsa na murima umosi uba kaga enu, yisuemanu o tsi yidumbitsi yiami; pa tsiri nana muji upalili o gari yifundi na usielasana misedera miLiban.

¹⁶ Je dumavaga buranga ava dumasolila Abimelek uba kaga? Diwelimina dumavayila Yeroubaal na bisi ndagu andi? Je dumamuvayila dedi mosi nana jandi amaduvayilanga?

¹⁷ Taji ami amadutoyila; amabufu ava amaduwakila kalala ombu bisi Madian.

¹⁸ Tumba namunyi jenu duitoyisi bisi ndagu taji ami na dumaboka magumidusambuali mabaana bandi va julu dimanyi dimosi na dumabiatsa Abimelek kaga mu mbari aguvu muana taji enu.

¹⁹ Pa dumavayila Yeroubaal na bisi ndagu andi buranga yilumbu yieni, tulelaba! Abimelek adulasi nsangu na jenu wenu dukamulasanga ubueji!

²⁰ Pa tsiri anana muji upalili Abimelek agusielasana bisi Sichem na bisi ndagu Bet-Millo; vo muji upalili bisi Sichem nesi bisi ndagu Bet-Millo agusielasana Abimelek.

²¹ Yotam amagusuga na amayenarina, amawenda o Beera amayetsana vala na muana taji andi Abimelek.

Bisi Sichem ubusa bebusi Abimelek

²² Abimelek amaruma baIsrael bilima birieru.

²³ Mbana Nsambi amakotisa yinyunyi yibi va gari Abimelek na baneni baSichem; baneni baSichem basamamuededila Abimelek,

²⁴ yiri adimavagulu magumidusambuali mabaana baYeroubaal dimagabusulu pila. Malungu mogu mabangingi va julu muru umuana taji ogu Abimelek agumababokisa na va julu muru baneni baSichem abamamuwamusa ubokisa baana bataji bandi.

²⁵ Baneni baSichem bamamurambila murambu o julu tsimikongu, diwendi rie: bamasunsa batu abamapatulanga bima bibotsu abamavioganga bebeli nogu. Abimelek amatsingulu dionyi.

²⁶ Yilumbu yimosi Gaal, muana dibaala uEbed amaruga na baana bataji bandi na bamavioga o Sichem. Baneni baSichem bamamuvayila yitu.

²⁷ Banotola o manungi bamadokula mirayisan; bamamigama mbana bamavaga feta; bamakota o ndagu nsambi ogu, bamaji na bamanu te na bamalensa Abimelek.

²⁸ Gaal muana dibaala uEbed amavosanga rie: Abimelek la nyi yiri jetu bisi Sichem tumusalila? Jandi tsiri muana u Yeroubaal? Zeboul agaa yivunda yiandi yibagora? Diwelimina usalila babaala baHamor aguvu taji Sichem tumba dibandu yi tusalila Abimelek?

²⁹ Aa mbe nyivu fumu jibatu bebaba mbe nyupatula Abimelek yitsiga. Gaal amagamuga rie: Abimelek warisa bagora bagu na rugatianu!

³⁰ Zeboul agumaba yivunda yimusiengi amagulu adi Gaal muana dibaala uEbed amavosanga mbana kabu andi jimaranga.

³¹ Amatinda bilumbi o musiengi ombu Abimelek uyemutsingula rie: Gulu, Gaal muana dibaala uEbed na baana bataji bandi bamaruga o Sichem, besibisi bisi musiengi ugupatula yitsiga.

³² Kabogu ne mukolu egugu wendanu jenu na bagora bagu uyeramba murambu o musiru.

³³ Kedi yika wisi uitebuyi dukasunda ulabana na mangolu motsu o musiengi. Ava Gaal na batu bandi bopalila udutoyisa dukamuvayila nana dudilila mangolu.

³⁴ Abimelek na batu abamaba nandi bamawenda mukolu na bamayeramba murambu va mugula uSichem, bamaguramba mabuli mana.

³⁵ Gaal muana dibaala uEbed amapala na amayesikama va dikotulu dimusiengi. Abimelek na batu botsu abamaba nandi bamarelama vana murambu ogu.

³⁶ Gaal amalabilila batu mbana amatsingula Zeboul rie: Nyilabi batu uvindama bevindimi o julu tsimikongu. Zeboul amamuwaka rie: Guifuiyisi yidumbitsi yimikongu na batu.

³⁷ Gaal amamuevosa rie: Dingensa abana batu abevindimi, bavu bagora aberuyili mu nsila jimisena mibaresitsi.

³⁸ Zeboul amamuwaka rie: Na dupambi duagu gutsivosanga rie: Abimelek la nyi, yiri tumusalila? Abana tsiri bagora aba ndeʼ gutsilensanga? Tsie babengusini o utoga!

³⁹ Gaal amavioga va mosi na bisi Sichem uyetoga na baAbimelek.

⁴⁰ Abimelek amamuduka tumba Gaal amarina na babaala bapuela bamaboku mbe basakatola va dikotulu dimusiengi.

⁴¹ Abimelek amatsana va Aruma. Mbana Zeboul amabinga Gaal na baana bataji bandi, jogu basamamuerungula utsana o Sichem.

⁴² Ava kedi batu bamawenda o musiru na dionyi dimatsingulu Abimelek,

⁴³ amagaba bagora bandi makabu marieru, bamaramba murambu o musiru. Anolaba batu bamapala o musiengi amabatoyisa na bamapansiga yiari na yiari.

⁴⁴ Abimelek na dikabu dimosi dibagora bamarela o gusu na bamayesikama va dikotulu dimusiengi; mabuli mabeji mabagora beni mamatoyisa batu abamaba o musiru na mamababetsa.

⁴⁵ Abimelek amatumuna bisi musiengi nyangu jiotsu, amabapatula uonyi na amaboka bisi musiengi. Mbana amarakula musiengi na amakuka musayi muna.

⁴⁶ Ava bisi musiengi abamatsana o yiari yindagu yisakama jiSichem bamagululu musamu eni bamayesuema o yivaga yindagu nsambi jiBaal-Berit.

⁴⁷ Bamayetsingula Abimelek yiri bisi Sichem botsu abetsani o yiari yindagu jisakama jiSichem bamagukama va mosi.

⁴⁸ Mbana Abimelek amamata o julu mukongu uSalmon na bagora botsu abamaba nandi. Amabonga diumbi na amatabula yitayi yimuiri ayi amanangula va disambaka diandi. Mbana amatsingula bagora abamaba nandi rie: Jenu dutsilaba adi nsivaga, lensanu novaga dedi mosi.

⁴⁹ Mutu mutu amatabula yitayi na amaduka Abimelek; bamayesunsa bitayi va mugula uyivaga na bamabinyensa va mosi na abimareyila vana. Anana bisi Sichem abamatsaninanga o yiari yindagu jisakama jiSichem bamafuila, dutalu duotsu dubabaala na dubagetu dumaba tosini.

Dufu duAbimelek

⁵⁰ Abimelek amamuetoyisa bisi Tebes, amabakanda na amabapatula musiengi eni.

⁵¹ Va gari musiengi vamaba ndagu ajimaba tindi jisakama nesi bisi musiengi botsu bamayesuema guna, nesi babaala nesi bagetu; bamakedibiga o gari na bamamata o julu ndagu eni jisakama.

⁵² Abimelek amatola te no ndagu jisakama; amajikanda na amabambana va dikotulu dindagu uyetsabiga muji.

⁵³ Tumba mugetu amabuaga dimanyi dineni adimadimba Abimelek va muru, adimamunemisa pura jineni.

⁵⁴ Abimelek amanengila mufudu agumabeganga bitogulu biandi na amamuruma rie: Somuna dijenga diagu, ndukuli, mu mbari bakeposila rie: Mugetu amamuboka. Mufudu eni amamunonga, mbana amafu.

⁵⁵ Ava baIsrael bamalabila yiri Abimelek amafu, mutu mutu amagabuga o ndagu andi.

⁵⁶ Anana Nsambi amagabusilila Abimelek dibi adi amavayila taji andi ava amabokila magumidusambuali mabaana bataji bandi.

⁵⁷ Nsambi amagabusila bisi Sichem mabi motsu ama bamavaga. Anana mulogu uYotam muana dibaala uYeroubaal umabadugusulu.