Bansonsi 7 - La Sainte Bible en Langue Yipunu

Kama yirieru tsibagora baGedeon

¹ Yeroubaal aguvu Gedeon na batu botsu abamaba nandi bamarelama kedi jineni na bamayevaga milaku va mugula uyileka yiHarod. Milaku mibisi Madian mimaba o banda jimilaku miGedeon o yiari yimukongu uMore o yibususu.

² Fumu amatsingula Gedeon rie: Bagora abavu nagu bamaviolila puela yiri nyubawakisa bisi Madian. Mbe bopatula diduma na mbe bovosa rie: Tumakewaka kalala.

³ Kabogu tsingula bagora diambu diedidi rie: Aguilabi keri na goma ayenagabuga na akakini na mukongu uGalaad. Magumabeji matosini tsibagora bamayenagabuga, vamasiala yigumi yitosini.

⁴ Fumu amatsingula Gedeon rie: Bagora bakivu bapuela. Babeyi o mujamba avana nyuyeguvayila dugabu; agu nyugutsingula aguwenda nagu na agugowenda nagu.

⁵ Gedeon amabega bagora o mujamba mbana Fumu amamutsingula rie: Botsu abonu mamba nana mondi enuini gukabakakasana na botsu abokutama ava bonuina.

⁶ Abamanu mamba na makaka mogu bamaba kama yirieru, botsu basusu bamakutama ava bamanuina.

⁷ Fumu amatsingula Gedeon rie: Na kama tsieni tsirieru atsimanu mamba na makaka nyuduwakila kalala ombu bisi Madian. Botsu basusu bayenagabuga o mbura tsiogu.

⁸ Mbana Gedeon amakelisa yika kama yirieru tsibagora tumba amakelisa biguji biogu na mimbanda miogu na amagabusa bagora beni basusu, mutu mutu o ndagu andi. Milaku mibisi Madian mimaba o banda milaku miGedeon o yibususu.

Ndungulu jimabigu

⁹ Ava mukolu Fumu amatsingula Gedeon rie: Relama, vindama yetoyisa bisi Madian mu mbari nyimabawakisa ombu gagu.

¹⁰ Pa guilabi keri ubatoyisa lewendanu jenu na musalitsi agu Poura.

¹¹ Gugulu adi bevosi mbana gudila mangolu ubatoyisa. Amawenda na musalitsi andi Poura te no bagora batega abamakelisa milaku.

¹² Bisi Madian na baAmalec na bisi yiari ayi wisi epalili botsu bamapansiga yiari na yiari biyibususu nderi batosini bamakokoku na basamo bogu bamafuna tindi ufuna nderi yisieyi yimubu.

¹³ Ava Gedeon amatolila amagulu dibaala adimawalulila mbatsi andi ndosi. Amajiwalula rie: Nsidora ndosi, vabetsi dipa digeyi adimavagu na fufu jiorsa, ditsiyenabungalananga va milaku mibisi Madian, ditsiyeduku te no ndagu jitsanda na jionyi jitsiberuga, ava jitsiberuyila jiotsu jitsipansiga mbuengili mbuengili.

¹⁴ Mbatsi andi amawaka rie: Tsiri diambu disusu divu dijenga diGedeon muana dibaala uYoach muisi Israel. Nsambi amatabula diambu uwakisa bisi Madian na milaku miotsu ombu gandi.

¹⁵ Ava Gedeon amagululu mambu mandosi eni na divindugulu dijionyi, amagabusila Fumu diboti mbana amagabuga o milaku mibaIsrael na amagamuga rie: Relamanu, Fumu amaduwakisa milaku mibisi Madian.

Tinunu jibisi Madian

¹⁶ Gedeon amagaba kama yirieru tsieni tsibagora makabu marieru na amabavega mimbanda na bisanga bipavala na muji muna bisanga.

¹⁷ Amabatsingula rie; Dukakengilanga na dukakuakulilanga. Ava nyubambinina na milaku dukavaga dedi mosi nana nyuvayilanga.

¹⁸ Ava jetu na bagora aboba nami tusiyila mimbanda, jenu botsu dukasiga mimbanda o biari biotsu bimilaku mbana dukagamuga rie: Dijenga diFumu na diGedeon!

¹⁹ Gedeon na kama bagora abamaba nandi bamatola va mugula umilaku va gari wisi, diweru adi bevinsi bagora. Bamasiga mimbanda na bamabula bisanga abimaba nogu.

²⁰ Mabuli motsu marieru bamasiga mimbanda na bamabula bisanga; bamagaanga bitutu mu makaka mamagetu na mimbanda mu makaka mamabaala. Bamamisiga, bamagamuga rie: Dijenga diFumu na diGedeon!

²¹ Gora gora amasikama va mbura andi, bamatsiengili milaku. Bisi milaku bamarina mambangu na bamayenagamuganga.

²² Kama yirieru tsibagora bamasiga mimbanda; o milaku miotsu Fumu amabanongasana majenga. Bisi milaku bamarina te no Bet-Chitta o yiari yiSereda te no mugula uAbel-Mehola bebeli na Tabbat.

²³ Bamanengila baIsrael: Yifumba yiNeftali na yiAsser na yiManasse botsu, mbana bamabingisa bisi Madian.

²⁴ Gedeon amatinda bilumbi o biari biotsu bimukongu uEfraim uyebatsingula rie: Vindamanu ugesila bisi Madian; kandanu masabu mogu te no Bet-Bara no disabu diJourdain. Bamanengila baEfraim abamagukama na abamatandama o masabu te no Bet-Bara no disabu diJourdain.

²⁵ Bamagaanga basefu babeji baMadian: Oreb na Zeb; bamaboka Oreb va dimanyi diOreb na bamaboka Zeb va yigamunu yiZeb, bamayenadukanga bisi Madian. Bamabega muru uOreb na uZeb ombu Gedeon o disimu dina diJourdain.