Bansonsi 5 - La Sainte Bible en Langue Yipunu

Duimbu duDebora

¹ Muna yilumbu yieni Debora ama-wimbilila duimbu duedudu, jogu na Barac muana dibaala uAbinoam:

² O Israel botsu bavu bakunsama, botsu bamakevega utoga divita: Gabusilanu Fumu diboti!

³ Bakaga guluanu! Baana babakaga liganu matuji! Nyuwimbilanga duimbu duFumu Nsambi Israel.

⁴ Aa Fumu! Ava gumalabinina o Seir, ava gumabambinina o misiru miEdom butamba bumaregama julu jimasulumuga ne mamungi mamasulumuga;

⁵ mikongu mimakungusu va gusu agu, Ndeʼ aguvu Fumu jiSinai Nsambi Israel.

⁶ Va temu Chamgar muana dibaala uAnat, va temu Yael, mansila masamamuekipu; balinsi bamavioyilanga mu mansila masusu.

⁷ Vasamaba basefu vasamaba basefu o Israel, te na menu Debora nyimarelimina, nyimakelasa nguji jibaIsrael botsu.

⁸ Bamasola bansambi bangana: adina dimarombisa mavita. Dimaba divura ulaba nesi ngubu nesi dikongu ombu magumana matosini tsibaIsrael.

⁹ Nyimafubana murima na basefu baIsrael, nesi jogu abamakevega utoga divita. Gabusilanganu Fumu diboti!

¹⁰ Jenu aduinangimi mu buru tsivema, jenu aduitsani mu matogu, jenu aduilingi, wimbilanganu!

¹¹ Va migula mibileka, abeteyi mamba besangili maboti maFumu maboti ama evayili basefu baIsrael! Avana batu baFumu bakunsama o dikotulu didimbu.

¹² Debora, rambugati! rambugati! Wimbila duimbu dudivita! Barac muana dibaala uAbinoam, relamati! Bega baviga bagu!

¹³ Nsialutsu tsimagabuga ombu basefu. Batu baFumu bamagukama ombu gandi nana bangogaga.

¹⁴ BaAmalec abamabetsu bamarambuyila o Efraim. BaBenjamin bavu mu dibuli dibatu abeguduki. Basefu bamapalila yifumba yiMakir, bivunda bibagora bimapalila yifumba yiZabulon.

¹⁵ Basefu baIssakar bamaduka Debora; baIssakar bamaduka Barac, bamasindugu umuduka o yibususu. Va migula mibileka baRuben bamatabulila puela mambu!

¹⁶ Dibandu yi dumasialila o gari bivanga, yika ugulu mufi mababungulitsi babindombu! Va migula mibileka baRuben bamatabulila puela mambu!

¹⁷ Bifumba yika utsana betsani o disimu dina diJourdain. O Galaad o disimu dina diJourdain. Dibandu yi yifumba yiDan yivu mu makumbi? Yifumba yiAsser yivu yitsana va disimu dimubu, yimavuma mu masabu mandi.

¹⁸ BaZabulon basamarina dufu, baNeftali wandi ava bamawendila odivita.

¹⁹ Bakaga bamaruga uyitutoyisa, bakaga baCanaan. O Taanak o mujamba uMeguiddo, basamayenabega nesi abimakindu nesi lora jivema.

²⁰ Nesi julu nesi bambuelili bamatoyisa Sisra

²¹ Bamapeva mu mujamba uQuichon mujamba utemu tsikala uvu mujamba uQuichon. Ka muna mangolu ma mavu nami nesi ubetsa bangogaga!

²² Mbana nduku jibirodi bibakabala jimagulunu, ava bamarinina bisi mavita.

²³ Yiansa yiFumu yimavosa rie: Loganu, loganu, Meroz na batu batu bandi! mu mbari bageruyi uyiwamusi Fumu, uwamusa Fumu va mosi na bangogaga.

²⁴ Miula mibi na Yael, mugatsi uHeber muisi Quenie!

²⁵ Miula mibi na mugetu aguitsani o ndagu jitsanda! Sisra amamuvonda mamba, jandi amamuvega dile, mu dimoyi diduyitsu amamuwakisila.

²⁶ Na dikaka dimosi amagaanga dikutu amagaangila martu jimusalitsi; amadimba Sisra, amamubula muru, amabula na amatoba terensi.

²⁷ Amabandama va gusu Yael, amaberuga, amabandama va gusu andi, amaberuga vana, ava amabandimina avana amaberuyila afu.

²⁸ Nguji Sisra amagengila va fenetera amagamuga rie: Dibandu yi dikalu diandi disakaruyila? Dibandu yi bakabala bandi beruyi va gegeyi?

²⁹ Bagetu bamosi bamaba na tindi diela, bamamuwaka, na jaʼ beni amawaka rie:

³⁰ Bageboli abimakindu? Bagebigabini? Numba mosi nesi beji ombu dibaala dimosi, abimakindu bibiduaru abivu na yinyuru yiSisra, abimamaruku, abi agumalunga oduara.

³¹ Aa, Fumu bavinitsi bagu babunginina! babungini nana Sisra. Abegurondi babi nderi wisi ava uibalili tindi ubala! Bulongu bumaba na duvotsu magumana mabilima.