Bansonsi 4 - La Sainte Bible en Langue Yipunu

Debora na Barac

¹ Ehoud anofu baIsrael bamamuevaga amasamalasa Fumu ubueji.

² Fumu amabawakisa ombu Yabin kaga jiCanaan agumarumanga o Hassor. Sisra amaba yivunda yibagora na amatsaninanga o Harochet-Goim.

³ BaIsrael bamatatila Fumu mu mbari Yabin amaba na yifu yikama tsimakalu mamadilu na amatoyisanga tindi utoyisa baIsrael magumabeji mabilima.

⁴ Vana temu eni Debora, mubiyitsi umugetu, agumaba mugatsi uLapidot, amaba nsonsi o Israel.

⁵ Amatsananga va tsi Mbari-Debora va gari Rama na Bethel o mukongu uEfraim. BaIsrael bamawendanga ombu gandi uyetabululu bunsonsi.

⁶ Yilumbu yimosi amasindiga mutu uyenengila Barac muana dibaala u Abinoam o Quedech-Neftali na amavosa nandi rie: Fumu Nsambi Israel amavega diruma diedidi rie: Wenda yenengila yigumi yitosini tsibabaala mu yifumba yiNeftali na yiZabulon nobabega o mukongu uTabor.

⁷ Nyusoga Sisra diela yiri oruga ombu gagu o mujamba uQuichon udutoyisa, jandi avu yivunda yidibadi diYabin; nyubawakisa ombu gagu na makalu mandi na bagora bandi.

⁸ Barac amatsingula Debora rie: Pa guisingi uwenda nami nyuwenda; tumba pa guibusi uwenda, ngowenda.

⁹ Amawagula rie: Nyuwenda nagu; tumba gugoba na duyitsu mu dionyi mu mbari Fumu owakisa Sisra ombu mugetu. Debora amarelama na amawenda va mosi na Barac o Quedech.

¹⁰ Barac amanengila yifumba yiZabulon na yiNeftali o Quedech; yigumu yitosini tsibabaala bamatubula diambu uwenda nandi na Debora wandi.

¹¹ O Quedech, Heber muisi Quenie amakakana na baQuenie basusu, diwendi rie: bategula baHobab agumaba nsaji Moise na amarangiga ndagu andi jitsanda va misena miSaananim.

¹² Bamatsingula Sisra yiri Barac muana dibaala uAbinoam amawenda o julu mukongu uTabor.

¹³ O Harochet-Goim Sisra amagukiga makalu mandi, diwendi rie: yifu yikama tsiandi tsimakalu mamadilu na batu botsu abamaba nandi na bamatola o mujamba uQuichon.

¹⁴ Mbana Debora amaruma Barac rie: Sogama, namunyi Fumu owakisila Sisra ombu gagu. Fumu jaʼ beni owenda va gusu agu. Mbana Barac amavindama mukongu uTabor va mosi na yigumi yitosini tsibabaala.

¹⁵ Fumu amapansa Sisra na makalu mandi na bagora bandi botsu ava baBarac bamababingisila. Sisra amasunduga mu dikalu diandi na amarina.

¹⁶ BaBarac bamaduka makalu na bagora te no Harochet-Goim; bagora botsu baSisra bamaboku, vasamasiala ne dibaala dimosi.

¹⁷ Sisra amarina mbangu o ndagu jitsanda jiYael, mugatsi uHeber muisi Quenie mu mbari va gari Yabin kaga jiHassor na bisi ndagu Heber agumaba muisi Quenie vamaba dinonga dineni.

¹⁸ Yael amayebengusana Sisra na amamutsingula rie: Kota, fumu ami, kota o ndagu ami, guyalaba keri.

¹⁹ Sisra amakota o ndagu jiYael na amamugumba dimfunga. Amamuvonda rie: Kokolu peyi mua mamba monu, nyina tindi puila. Yael amadibula mbuta jimukata ajimaba na dile amamugabila mbana amamuemugumba.

²⁰ Sisra amamuruma rie: Relama va dikotulu dindagu jitsanda na pa batu boruga uyiguwivula rie: Va mutu vava? Gukawaka rie: Nesi!

²¹ Yael, mugatsi uHeber amagaanga dikutu na amabonga martu na amabambana nandi va gegeyi na amamunonga dikutu dieni va terensi adimapala te na va tsi. Amaba tindi yilu dododududu kabogu amafu.

²² Ava Barac amayenadukilanga Sisra, Yael amapala umubengusana na amamunengila rie: Ruga, yilaba dibaala adi guirombi. Amakota o ndagu mugetu eni na amalaba Sisra asilugu, afu na dikutu va terensi.

²³ Muna yilumbu yieni Nsambi amasundusa Yabin, kaga jiCanaan va misu mabaIsrael.

²⁴ BaIsrael bamalasanga Yabin, kaga jiCanaan, tindi maguga te na bamamuboka.