Bansonsi 20 - La Sainte Bible en Langue Yipunu

Divita ukilisa baBenjamin

¹ BaIsrael botsu bamapala: ubandila o Dan te no Bercheba no bulongu buGalaad na dibuli dimabenguna na murima umosi va gusu Fumu o Mispa.

² Basefu na bifumba biotsu biIsrael bamagukama o yibenguna yibatu baNsambi: kama jina tsitosini tsibabaala abamagasusu utoga divita.

³ BaBenjamin bamagulu yiri baIsrael bamawenda o Mispa. BaIsrael bamawivula rie: Nsoruru ts ietsitsi tsie tsimabandila?

⁴ Mbana muisi Levi, mulumi umugetu agumaboku amavosa rie: Nyimatola na mugatsi ami o Guibea uBenjamin uyesilimina guna.

⁵ Bisi Guibea bamandasa tindi maguga; ava mukolu bamakandila ndagu aji nyimatsanina. Bamaba na nsala umboka na bamalasa mugatsi ami dikasi te na amafu.

⁶ Nyimabonga mfumbi ami na nyimajisasa na nyimayenatinda bibuku o biari biotsu bidisiala diIsrael; o Israel nsoruru jimavagu.

⁷ BaIsrael, jenu botsu duji vava, gulusunuanu na tabulanu diambu namunyi!

⁸ Batu botsu bamarelama na murima mosi na bamavosa rie: Ne mutu mosi va gari etu agowenda o ndagu andi jitsanda na ne mutu mosi ayagabuga o dimbu diandi.

⁹ Guluatianu adi tuvayila bisi Guibea:

¹⁰ mbanda jimabuagu, tuyetumuna bisi musiengi eni. Mu bifumba biotsu biIsrael tubonga yigumi yibabaala mu kama na kama mu tosini na tosini mu yigumi yitosini; jogu boyerombila batu biguji; ava boruyila tuyekilisa bisi Guibea uBenjamin dedi mosi nana bamavayila Israel nsoruru.

¹¹ Kabogu baIsrael botsu bamawenda na murima umosi uyetumuna bisi Guibea.

¹² Bifumba biotsu biIsrael bimasindiga babaala o mikuta miotsu miBenjamin uyebawivula rie: Diambu adimalabana ombu genu, divindugulu yi?

¹³ Tsie wakisianu batu beni babi abavu o Guibea yiri tubabokisa na tugusula dibi o Israel. Tumba baBenjamin basamaronda ugulu baana bataji bogu.

¹⁴ BaBenjamin bamapala o misiengi miogu na bamabenguna o Guibea uyetoyisa baIsrael.

¹⁵ Muna yilumbu yieni bamasansama baBenjamin abamapalila o misiengi, dutalu duogu dumaba magumabeji na tosini yisiamunu tsibabaala abamagasusu utoga divita, tsiri utala yisambuali yikama tsibagora baGuibea abamasolu.

¹⁶ Va gari batu beni botsu bamaba yisambuali yikama tsibagora abamasolu, botsu bamaba na dumosu. Botsu bana bamaba na munengi u welimina unamusu dimanyi diyilangandaji nesi mu dunanga.

¹⁷ Bamasansama bagora baIsrael wandi, tsiri utala aba Benjamin, dutalu duogu dumaba kama jina tsitosini tsi-abamagasusu utoga divita.

¹⁸ BaIsrael bamarelama uwenda o Bethel na bamawivula Nsambi rie: Anyi oreyila uyetoyisa baBenjamin? Fumu amawaka rie: Juda oreyila uwenda.

¹⁹ Muna kedi baIsrael bamasogama na bamayevaga milaku bebeli na Guibea.

²⁰ Bagora baIsrael bamakueka uyetoyisa baBenjamin na bamakunsama ubatoyisa va gusu Guibea.

²¹ BaBenjamin bamapala o Guibea na muna yilumbu yieni bamabokisa magumabeji na tosini beji tsibagora baIsrael.

²² BaIsrael bamamuedila mangolu na bamamuekunsama va mbura aji bamaleba yilumbu yitega ubatoyisa.

²³ BaIsrael bamawenda uyelilila Fumu te na tsisiga; bamawivula Fumu rie: Turungula umuetoyisa baana bataji betu, baBenjamin? Fumu amawaka rie: Yebatoyisanu.

²⁴ Yilumbu ayimubeji baIsrael bamamuetoyisa baBenjamin.

²⁵ Muna yilumbu yieni baBenjamin bamamuepala o Guibea ubabengusana na bamamuebabokisa: yigumi na yinana yitosini tsibaIsrael abamagasusu utoga divita.

²⁶ BaIsrael botsu na batu botsu bamayenagabuga o Bethel; bamalila na bamatsana va gusu Fumu; bamabusa uji muna yilumbu yieni te na tsisiga; bamavagulila Fumu pagu tsiunyensa na pagu tsikabusulu tsimaboti.

²⁷ Mbana baIsrael bamamuemoga na Fumu. (Kabogu yigara yipangini yimaba vana mbura eni;

²⁸ Pinhas muana dibaala Elazar muana dibaala uAaron amasalanga yisalu va gusu Fumu.) Bamamuwivula rie: Jetu tumueyetoyisa baana bataji betu baBenjamin vo nesi? Fumu amawaka rie: Wendanu, mugesa nyubawakisa ombu genu.

²⁹ Mbana baIsrael bamaramba murambu yiari na yiari biGuibea.

³⁰ BaIsrael bamawenda uyetoyisa baBenjamin, yilumbu ayimurieru bamamuekunsama utoga divita va gusu Guibea nana temu tsikala.

³¹ BaBenjamin bamabengusana batu na bamabadukilila vala na musiengi. Bamabanda ubokisa batu nana temu tsisusu, bamosi mu nsila Bethel na basusu mu nsila Guibea na basusu o musiru: magumarieru mabagora baIsrael.

³² BaBenjamin bamatasa rie: Joʼ ve, tumamuebabokisa! Tumba baIsrael bamavosa rie: Turinianu yiri botuduka vala na musiengi mu mansila.

³³ BaIsrael bamosi bamasila mbura tsiogu na bamayekunsama o Baal-Tamar; na murambu uIsrael umagusulu agu bamaleba na bamabegu mambangu o kumu jiGuibea.

³⁴ Yigumi yitosini tsibagora abamasolu o Israel jiotsu bamatola o Guibea, divita dimaranga tindi uranga na baBenjamin basamajaba yiri bogudusu.

³⁵ Fumu amabelisila baIsrael baBenjamin, muna yilumbu yieni baIsrael bamabokisa magumabeji na tosini yiranu na kama mosi tsibagora baBenjamin.

³⁶ BaBenjamin bamalaba yiri bamabetsu. BaIsrael bamafura baBenjamin urina mu mbari bamavayila abamaba murambu o Guibea yitu.

³⁷ Batu abamaba murambu bamayevikana o Guibea, bamawenda o gusu na bamaboka bisi musiengi botsu.

³⁸ Jogu abamaba murambu bamabangisa mua muji agumarongubusa nsumbili o musiengi nana bamavanginina yilimba na baIsrael.

³⁹ Kabogu baIsrael bamageluga o utoga. BaBenjamin bamaboka bebeli na magumarieru mabagora baIsrael. Bamavosanga rie: Joʼ ve, dingensa bamamuebetsu nana temu tsikala!

⁴⁰ Tumba nsumbili jinobanda uronguga o musiengi, baBenjamin bamagengila o gsima ogu na bamalaba yiri musiengi uotsu yika unyenga uinyengi.

⁴¹ Mbana baIsrael bamageluga na baBenjamin bamakambulu ava bamalabila yiri bamagudusu.

⁴² Bamaliyila baIsrael nsima na bamarina o yiari yikumu, kabogu baIsrael bamabasutusu na jogu abamapalilanga o musiengi bamabokungu vana vana.

⁴³ Jogu bamakanda baBenjamin na bamabaduka na bamababetsa yiari na yiari te na va nsungisini na Guibea o yiari ayi wisi epalili.

⁴⁴ Yigumi na yinana yitosini tsibaBenjamin bamaboku, botsu bamaba bangogaga.

⁴⁵ BaBenjamin bamosi bamarina o yiari yikumu o dimanyi diRimmon, va gari ogu tosini yiranu bamaboku mu mansila; basusu bamaduku te no Guidom agu bamaboka tosini beji.

⁴⁶ Dutalu duotsu dubagora baBenjamin abamaboku muna yilumbu yieni dumaba magumabeji na tosini yiranu tsibangogaga.

⁴⁷ Vamaba kama yisiamunu tsibabaala abamageluga na bamarina o yiari yikumu o yiari yidimanyi diRimmon. Bamatsana guna tsungi jina.

⁴⁸ BaIsrael bamagabuga uyeboka baBenjamin botsu aba bamarasuna o misiengi, nesi batu nesi biruitsi na bamanyensa misiengi miotsu ami bamavioyila.