Bansonsi 18 - La Sainte Bible en Langue Yipunu

Yifumba yiDan udila bedili disiala

¹ Va temu eni o Israel usamaba kaga; na yifumba yiDan yimaromba udila bulongu butsanina; mu mbari te na temu eni mbe basakadila disiala nana bifumba bisusu biIsrael bimadilila.

² BaDan bamasola babaala baranu abamaba na mangolu mu mukuta ogu aba bamasindiga o Sora na Echetaol uyesieenga bulongu. Bamabaruma rie: Yesieenganu bulongu. Bamatola o mukongu uEfraim te no ndagu Mika na aguna bamasilimina.

³ Ava bamabila bebeli na ndagu Mika bamagulu diufi dimuisi Levi; banobambana bamamuwivula rie: Anyi amagubega gunu? Yi guivayi vava? Yi yivu nagu vava?

⁴ Amabawaka rie: Mika epeyi bisalu biebibi na emfutingi na nyivu muvagulitsi andi upagu.

⁵ Bamamuruma rie: Moga na Nsambi, gukatujabisa yeri mulingu etu ubueji.

⁶ Muvagulitsi upagu amabatsingula rie: Wendanganu na buranga, Fumu aji nenu mu mulingu enu.

⁷ Babaala beni baranu bamayenawenda na bamatola o Laich. Bamalaba yiri nsanunu jibatu abamatsana guna jimaba dedi na bisi Sidon na bamabanganga na mirima misunda na basamalabanga keri; baneni botsu bayiari yieni basamabavayila ne dibi dimosi; jogu bamakakana vala na bisi Sidon na basamaba na diambu ne na mutu mosi.

⁸ Mbana bamawenda o Sora na Echetaol ombu baana bataji bogu abamabawivula rie: Misamu yi?

⁹ Bamavosa rie: Tʼwendianu tuyebatoyisanu; tumayelaba bulongu nana buvu tindi buboti. Ayina yi? Duitsani yika utsana, dugevosi diambu? Lensanu nowenda uyebapatula bulongu bueni.

¹⁰ Ava dutolila guna dupala ombu batu abavu sui. Bulongu bueni buvu tindi buneni, Nsambi amaduwakisa buonyi. Yiari yieni yivu na tindi digumba.

¹¹ Kama yisiamunu tsibagora bayifumba yiDan bamarambuyila na bitogulu biogu o Sora no Echetaol.

¹² Bamawenda na bamayevaga milaku o yiari ayi wisi ewendisini yiQuiriat-Yearim o Juda; mbura eni jimalugu Mahane-Dan, mulaku uDan; anana jinengulungu te na namunyi.

¹³ Banorambuyila vana bamawenda o mukongu uEfraim te na bamatola o ndagu Mika.

¹⁴ Mbana babaala beni baranu abamayesieenga bulongu buLaich bamawivula baana bataji bogu rie: Duijabi yiri o mandagu meni uvu yilinga yiyijungi yibuvagulitsi bupagu na bakosi barieru baminongu na minongu? Dugelabi yiri yisalu yisakasuka?

¹⁵ Mbana bamabambana nokota o ndagu Mika agumaba muisi Levi na bamamuwivula rie: Guji buranga?

¹⁶ Yiotsu yina kama yisiamunu tsibagora baDan na bitogulu biogu bamaba va dikotulu dindagu.

¹⁷ Babaala beni baranu abamayesieenga bulongu bamakota o ndagu; bamabonga yilinga yiyijungi yibuvagulitsi bupagu na bakosi barieru baminongu na minongu. Muvagulitsi upagu amaba va dikotulu dindagu ombu kama yisiamunu tsibagora abamaba na bitogulu biogu.

¹⁸ Banokota o ndagu Mika, bamabonga yilinga yiyijungi yibuvagulitsi bupagu na bakosi barieru baminongu na minongu; muvagulitsi upagu amabawivula rie: Yi duivayi?

¹⁹ Bamamuwaka rie: Vola nduku, dibiga munu agu, tʼwendi; ndeʼ guba muvagulitsi etu upagu. Je diwelimina ombu gagu uba muvagulitsi upagu umutu mosi vo uyifumba yimfuimbila yiIsrael?

²⁰ Muvagulitsi upagu amabasa de na nsangu, amabonga yilinga yiyijungi yibuvagulitsi bupagu na bakosi barieru baminongu na minongu na amawenda nogu.

²¹ Bamamuesogama na bamaretsa baana bageyi na biruitsi na mifuna.

²² Jogu bamakewendila vala na ndagu Mika ava batu abamatsaninanga o mandagu amamabambana na ndagu Mika bamagukimina uyenaduka baDan.

²³ Banobadala bamatsundisa baDan abamawivula Mika rie: Diambu yi divu nagu? Diambu yi gumagungila batu bebaba?

²⁴ Amawaka rie: Bansambi bami aba nyimavaga, dumabadaga na muvagulitsi upagu wandi na dumayenawenda. Yima yi yisiali nami?

²⁵ BaDan bamamuwaka rie: Vola nduku agu! Bango kabu bakegugaanga na bakeguboka, ndeʼ na bisi mukuta agu botsu.

²⁶ BaDan bamayenawenda, Mika amalaba mangolu mogu mamaviolila amandi kabogu amayenagabusila o ndagu andi.

Musiengi uDan na mbura jimuyitsa andi

²⁷ Ananabamadayila bima biMika na muvagulitsi upagu o ndagu andi; bamayetumuna bisi Laich, diwendi rie; batu abamaba sui. Bamababoka mbana bamanyensa musiengi.

²⁸ Mutu asamabawaka kalala; bamaba vala na Sidon na basamaba na yipoti na basusu; musiengi eni umarungulu o yibususu ayivindimi o yiari yiBet-Rehob. BaDan bamarungulila musiengi; bamatsana muna.

²⁹ Bamaguluga diina ditaji ogu Dan agumaburulu o Israel. Diina dikala dimusiengi eni Laich.

³⁰ Mbana baDan bamaretsiga bansambi baMika ubayitsa; Yonatan muana dibaala uGuerchom muana dibaala uMoise na bategula bandi bamaba bavagulitsi bapagu bayifumba yiDan te na yilumbu ayi bamakotusulu o buviga.

³¹ Bamayitsa bansambi baMika mu mbari Ndagu Nsambi jimaba o Silo.