Bansonsi 17 - La Sainte Bible en Langue Yipunu

Muyitsa uMika

¹ Vamaba dibaala adimaba muisi mukongu uEfraim, diina diandi Mika.

² Yilumbu yimosi amatsingula nguji andi rie: Yigumi na kama mosi tsimbongu atsi bamagudayila, atsi gumavosila puela kulini tsiagu, atsi meʼ beni nyimagulu, laba mbongu tsieni tsivu nami; menu agumatsibonga. Mbana nguji andi amavosa rie: Fumu agabili muana ami miula!

³ Amagabusila nguji andi yigumi nakama mosi tsieni, nguji andi amavosa rie: Meʼ beni nyiveyi mbongu tsietsitsi ombu Fumu yiri tsiuvagu kosi jimuana ami; nyirondi ugabusa tsionyi ombu Fumu.

⁴ Amagabusa tsieni ombu nguji andi. Nguji amabonga kama beji atsi amavega ombu musulumusitsi agumatsisulumusa uvaga kosi ajimasunsu o ndagu Mika.

⁵ Anana Mika amavayila muyitsa o ndagu andi; amavaga yilinga yiyijungi yibuvagulitsi bupagu na bakosi na amawakisa muana andi umosi udibaala uba muvagulitsi upagu.

⁶ Vasamaba kaga o Israel va temu eni: mutu mutu amavaga adi amaronda uvaga.

⁷ Vamaba mufudu, muisi Bethleem o Juda, agumaba mu mukuta uJuda; agumaba muisi Levi; na avana amatsaninanga.

⁸ Dibaala dieni amarambuyila o musiengi uBethleem o Juda uyenarombanga mbura yika la mbura jiutsanina. Ava amawendila amatola o mukongu uEfraim te no ndagu Mika.

⁹ Mika amamuwivula rie: Aguʼ guiruyisini? Amamuwagula rie: Nyiji muisi Levi o Bethleem o Juda na ulinga nyiyenalinga uromba mbura yika la mbura jiutsanina.

¹⁰ Mika amamutsingula rie: Tsana nami; ndeʼ guba muvagulitsi ami upagu na yilima na yilima nyugufutanga yigumi yimbongu na biduaru abi guba na nsala na biguji wandi. Muisi Levi amatabula diambu utsana

¹¹ na dibaala dieni adimamukelisa nderi muana andi.

¹² Mika amakotisa muisi Levi o yisalu usala yisalu yibuvagulitsi bupagu; amatsananga o ndagu andi.

¹³ Mika amavosa rie: Mbana nyimajaba yiri Fumu opaga maboti mu mbari muisi Levi avu muvagulitsi ami upagu.