Bansonsi 16 - La Sainte Bible en Langue Yipunu

Samson upansa epansi biabutsu biGaza

¹ Yilumbu yimosi Samson amawenda o Gaza, aguna amalabila yimbembu yimugetu na amakota o ndagu andi.

² Bamatsingula bisi Gaza rie: Samson aka vava. Kabogu bamaramba murambu yiari na yiari na bamasilimina va dikotulu dimusiengi. Mukolu uotsu basamakipa, bamavosanga rie: Tumuboka ava matebugulu.

³ Samson amasilama te na va gari wisi. Amarambuga va gari wisi na amabonga biabutsu bidikotulu dimusiengi na makutu motsu mabeji amabipangumuna na budilu mbana amabinangula va masambaka, amayenabibega o julu mukongu aguvu va nsungisini na Hebron.

Dalila usoga esoyi Samson diela

⁴ Adina dinovioga, Samson amaronda mugetu o yibususu yiSorec. Diina dimugetu eni Dalila.

⁵ Bakaga baranu babaPhilistin bamawenda ombu mugetu eni na bamamuruma rie: Soga Samson diela yiri tujaba agunyi mangolu mandi meruyisini na nana turungulila umubetsa nomutunga umutsiemusa mangolu mandi. Mutu mutu oguvega yigumi na kama mosi tsimbongu.

⁶ Dalila amavosa na Samson rie: Kokolu tsiagu, nsinguli agunyi guidilili mangolu magu? Tsie borungulila ugutunga ugutsiemusa mangolu?

⁷ Samson amamutsingula rie: Pa botunga na yisambuali yimikudu migona amisakagumuga, mangolu mami motsiemuga na nyuba dedi na mutu uotsu.

⁸ Bakaga baPhilistin bamabega yisambuali yimikudu migona ami mbe misakagumuga. Dalila amamutunga na mikudu mieni.

⁹ Kabogu batu bamaramba murambu o ndagu Dalila ava bamasuemina o yibuku yimosi. Mbana Dalila amagamuga rie: Samson baPhilistin baka nagu! Amatudula mikudu nderi pusu atsimanyensu. Kabogu basamajaba agumarugasana mangolu mandi.

¹⁰ Dalila amatsingula Samson rie: Labati nana gumansanisila, kabogu ufura gumamfura, kokolu tsiagu tsie nsinguli na yi borungula ugutunga.

¹¹ Amamutsingula rie: Pa botunga na mikudu migona ami basakasalisa na kala nyudeda na nyuba dedi na mutu uotsu.

¹² Dalila amabonga mikudu migona ami amamutungila. Mbana amagamuga rie: Samson baPhilistin baka nagu! Kabogu batu bamaramba murambu o ndagu ava bamasuemina o yibuku yimosi. Amatudula mikudu nderi amatungu na banyongi.

¹³ Dalila amatsingula Samson rie: Te na diweru diedidi usanisa guinsanisi na gumamfura. Nsinguli, na yi borungula ugutunga. Amamutsingula rie: Gukapanda yisambuali yimipanda na mikudu na nyuba dedi na mutu uotsu.

¹⁴ Anomitunga dingondu amasuma disoluku. Mbana amagamuga rie: Samson baPhilistin baka nagu! Mbana amarambuga na amarubula disoluku na amapusula mipanda.

¹⁵ Mbana Dalila amamuwivula rie: Dingensa guitondi? Nyilabi yiri gugetondi! Ajiji la kumbu jimurieru aji guinsanisi na gusakansingula agu mangolu magu meruyisini.

¹⁶ Bilumbu biotsu amamutsoyisanga na bivu na amamunyonyisa na yisuebiri yiandi te na murima uSamson umafutsa.

¹⁷ Mbana amamulasa murima andi uotsu; amamutsingula rie: Disambi digandusu ombu gami mu mbari nyimavegu ombu Nsambi ne mbe nyisakaburu. Pa nyufugu mangolu mami mosuka nyudeda na nyuba dedi na mutu uotsu.

¹⁸ Dalila amalaba yiri Samson amamudibulila murima andi uotsu, amasindiga batu uyenengila bakaga babaPhilistin nobatsingula rie: Tsie ruyianu mu mbari amandasa murima andi uotsu. Bakaga babaPhilistin bamawenda ombu Dalila na bamayenabega mbongu.

¹⁹ Dalila amamuwensa yilu va tulu andi. Amanengila dibaala dimosi na amafuga yisambuali yimipanda miSamson mbana Dalila amamunyogatana; kabogu mangolu mandi mamatsiemuga.

²⁰ Mbana Dalila amagamuga rie: Samson baPhilistin baka nagu! Mbana amarambuga na amatasa rie: Nyuvaga nana na kala na nyupatuga. Asamajaba yiri Fumu amakakana nandi.

²¹ BaPhilistin bamamugaanga na bamamutoba misu; mbana bamamubega o Gaza na bamamutunga na bapanga bakunga. Bamamusalisa o tsugu nderi yibulu.

²² Tumba nanga tsiandi atsimafugu tsimamuebanda unega.

Diambu diusita diSamson na dufu duandi

²³ Kabogu bakaga babaPhilistin bamabenguna uvagula pagu jineni jiunyensa nosangila nsambi ogu, Dagon. Bamawimbila rie: Nsambi etu amatuwakisa muvinitsi etu Samson!

²⁴ Ava batu bamamugengililanga bamayitsanga nsambi ogu na bamavosanga rie: Nsambi etu amatuwakisa muvinitsi etu, jandi agumagudisanga bulongu buetu te na amaboka puela batu.

²⁵ Na nsangu jineni bamavosanga rie: Nengilanu Samson ayituvayila bingana! Kabogu bamapalisa Samson o tsugu na amavaga bingana va gusu ogu. Bamamuretsiga va gari makutu.

²⁶ Samson amatsingula mufudu agumamugaanga mu gogu rie: Mbeyi, nyirondi ubemba makutu amewarisi ndagu nosingama muna.

²⁷ Ndagu jimaba jibasa de na babaala na bagetu; nesi bakaga baranu baPhilistin bamaba vana, o julu muansa umaba tosini yirieru tsibatu: na babaala na bagetu abamagengilanga Samson ava amavayilanga bingana.

²⁸ Mbana Samson amasambila Fumu rie: Fumu Nsambi! Kokolu tsiagu tangimini! Aa Nsambi! Muepega mangolu yika temu ejiji buandi yiri nyugabusila baPhilistin pila jimisu mami!

²⁹ Mbana Samson amabumba makutu mabeji magari amamawarisanga ndagu na amasingama muna; dimosi dimaba o mabaala mandi na disusu o magetu mandi.

³⁰ Samson amavosa rie: Nyifu va mosi na baPhilistin! Amamasindila na mangolu na ndagu jimavika bakaga babaPhilistin na batu botsu abamaba muna. Jogu abamaboku va dufu duandi bamaviolila aba amalebokanga.

³¹ Baana bataji bandi na bisi ndagu taji andi botsu bamayebonga mfumbi andi. Banogabuga bamamutsiga va gari Sora na Echetaol o ngila jitaji andi Manoa. Samson amaba nsonsi o Israel magumabeji mabilima.