Bansonsi 12 - La Sainte Bible en Langue Yipunu

BaEfraim utoga betoyi na Jefte

¹ BaEfraim bamabenguna va mosi, bamawenda o Safon. Bamawivula Jefte rie: Dibandu yi gumawendila uyetoga na baAmmon tsiri utunengila uyetoga va mosi nagu? Tunyensa ndagu agu na ndeʼ beni o gari jionyi.

² Jefte amabawaka rie: Jetu na batu baini tumaba na misosi mineni na baAmmon, nyinodunengila dumabusa utuwamusa.

³ Nyinolaba yiri dugemyi ukwamusa nyimakevaga nderi diliga na nyimayetoga na baAmmon, Fumu amabakwakisa. Yika namunyi duinyoyi kabu na duna nsala utoyisa?

⁴ Mbana Jefte amabengusana bisi Galaad botsu uyetoyisa baEfraim. Bisi Galaad bamabetsa baEfraim mu mbari baEfraim bamalensa novosa rie: Bisi Galaad bavu barinitsi na berondi utoyisa baEfraim na baManasse!

⁵ Mbana bisi Galaad bamabonga masabu maJourdain nesi baEfraim bakatola. Ava murinitsi uEfraim amavosila rie: Piosianu, bisi Galaad bamamuwivula rie: Ndeju muisi Efraim? Amawaka rie: Nesi.

⁶ Mbana bamamuruma rie: Guluati! Vosa rie: Chibolet; anowaka rie: Sibolet tsiri usungiga nana jogu beni bamavosilanga kabogu bamamugaanga na bamamutabula muru o disabu diJourdain. Vana temu eni bamabokisa magumana na tosini beji tsibaEfraim.

⁷ Jefte amaba nsonsi o Israel bilima bisiamunu. Jefte agumaba muisi Galaad amafu na amatsigu o musiengi uGalaad.

Ibsan na Elon na Abdon

⁸ Jandi anofu Ibsan muisi Bethleem amaba nsonsi o Israel.

⁹ Amabura magumarieru mabaana bababaala na magumarieru mabaana babagetu. Amawetsa baana bandi babagetu na bisi mukuta ususu na amawelila baana bandi bababaala magumarieru mabaana babagetu abasamaba mu mukuta ogu. Amaba nsonsi o Israel yisambuali yibilima.

¹⁰ Mbana Ibsan amafu na amatsigu o Bethleem.

¹¹ Jandi anofu Elon muisi Zabulon amaba nsonsi o Israel yigumi yibilima;

¹² mbana Elon muisi Zabulon amafu na amatsigu o Ayalon o bulongu buZabulon.

¹³ Jandi anofu Abdon muana dibaala uHillel muisi Piraton amaba nsonsi o Israel.

¹⁴ Amabura magumana mabaana bababaala, jogu bamamuburila magumarieru mabategula, jogu bamanangamanga mu magumidusambuali maburu. Amaba nsonsi o Israel yinana yibilima;

¹⁵ mbana Abdon muana dibaala uHillel muisi Piraton amafu na amatsigulu o Piraton o bulongu buEfraim va julu mukongu uAmalec.