Bansonsi 11 - La Sainte Bible en Langue Yipunu

Jefte, sefu jibaIsrael

¹ Jefte muisi Galaad amaba tindi ngogaga. Amaba muana dibaala uyimbembu yimugetu agu amabura na Galaad.

² Mugatsi uGalaad amamuburila baana bababaala wandi; banobanguga bamabinga Jefte na bamamutsingula rie: Ndeʼ gugobialila ndagu taji etu mu mbari gugaa nguji mosi netu.

³ Jefte amarina baana bataji bandi vala na amayetsana o bulongu buTob. Mimbini mimayegukama ombu Jefte na mimayenakindanga va mosi nandi.

⁴ Mua temu jinovioga baAmmon bamatoga divita na baIsrael.

⁵ BaAmmon bamatoyilanga divita o Israel na bivunda biGalaad bamayelanda Jefte o Tob.

⁶ Bamatsingula Jefte rie: Tʼwendi, guba sefu etu na tuyetoyisanu baAmmon.

⁷ Jefte amawivula bivunda biGalaad rie: Dusamalepina? Tsiri jenu adumambinga o ndagu taji ami? Dibandu yi duiruyili ombu gami ava duilabili munyongu?

⁸ Bivunda biGalaad bamatsingula Jefte rie: Namunyi tumagabuga ombu gagu yiri tubanganga va mosi noyetoyisa baAmmon; guba sefu jibisi Galaad biotsu.

⁹ Jefte amawaka bivunda biGalaad rie: Pa duimbeyi uyenatoyisa baAmmon na Fumu obawakisa ombu gami nyuba sefu enu.

¹⁰ Bivunda biGalaad bamatsingula Jefte rie: Fumu etugulu; pa tugoguvayila adi guivosi jandi otabula bunsonsi.

¹¹ Kabogu Jefte amawenda na bivunda biGalaad. Bamamuvaga sefu ogu mbana Jefte amavosulila va gusu Fumu o Mispa mambu motsu ama bamalevosa.

Bulumbi buJefte ombu baAmmon

¹² Mbana Jefte amatinda bilumbi ombu kaga jiAmmon uyemuwivula rie: Diambu yi divu va gari jetu nagu adi guiyitoyisili?

¹³ Kaga jiAmmon amawaka bilumbi biJefte rie: Ava baIsrael bamapalila o Egypte bamabonga bulongu buami ubandila o mujamba uAmon te no mujamba uYabboc no mujamba uJourdain. Bukabusili na buranga.

¹⁴ Jefte amamuetinda bilumbi ombu kaga jiAmmon uyemutsingula rie:

¹⁵ Jefte jandi rie: BaIsrael basamabonga bulongu buMoab nesi buAmmon.

¹⁶ Ava baIsrael bamapalila o Egypte bamayenalinganga o kumu te no Mubu uBenga na bamatola o Cades.

¹⁷ Mbana baIsrael bamatinda bilumbi ombu kaga jiEdom uyemuwivula rie: Turungula uvioyila o bulongu buagu? Tumba kaga jiEdom asamagaru. Bamatinda bilumbi ombu kaga jiMoab wandi na jandi amabusa. Kabogu baIsrael bamatsana o Cades.

¹⁸ Mbana bamavioyila o kumu uyenatsiengilanga bulongu buEdom na buMoab na bamatola o yiari ayi wisi epalili o Moab; bamavaga milaku o disimu dina diAmon, basamakota o bulongu buMoab mu mbari Amon uvu va mandilu maMoab.

¹⁹ BaIsrael bamatinda bilumbi ombu Sihon kaga jiAmor agumatsana o Hechebon. BaIsrael bamamuwivula rie: Turungula uvioyila o bulongu buagu te na tutola o mbura aji tuiwendi?

²⁰ Tumba Sihon asamavayila baIsrael yitu ubasingisa uvioyila o bulongu buandi; amabengusana batu bandi botsu na bamavaga milaku va Yahas na bamatoyisa baIsrael.

²¹ Fumu Nsambi Israel amawakisa Sihon na bagora bandi botsu ombu baIsrael abamababetsa. BaIsrael bamabonga bulongu buotsu buAmor na bamatsana muna.

²² Bamabonga biari biotsu biAmor ubandila o mujamba uAmon te no mujamba uYabboc ubandila o kumu te no mujamba uJourdain.

²³ Fumu Nsambi Israel amabingila baIsrael baAmor; ne nana gubapatula bulongu buogu?

²⁴ Ayi nsambi agu Kemoch eguveyi yigobanganga ayiagu? Na biotsu abi Fumu Nsambi etu amatuvega bigobanganga abietu?

²⁵ Je ndeʼ guiviolili Balac muana dibaala uSippor aguvu kaga jiMoab? Je amatumuna paga na baIsrael? Asamabatoyisa?

²⁶ Yiotsu ayi baIsrael bamabandila utsana o Hechebon na mimbu amamabambana no Aroer na mimbu amamabambana no mimbu motsu amavu va mugula umujamba uAmon tuka kama yirieru tsibilima; dibandu yi gusamabapatulila monyi temu eni jiotsu?

²⁷ Nyisamaguvayila dibi ne nana guipayili adigaa diwelimina ava guitoyisili. Fumu aguvu nsonsi abi nsonsi namunyi va gari baIsrael na baAmmon!

²⁸ Kaga jiAmmon asamagulu bulumbi buJefc.

Pangini jiJefte

²⁹ Yinyunyi yiFumu amaba na Jefte na amavioga va Galaad na Manasse; amavioyila va Mispe o Galaad; ava amabila va Mispe o Galaad amatoyisa baAmmon.

³⁰ Jefte amavangana pangini na Fumu novosa rie:

³¹ Pa gukwakisa baAmmon, jandi agupala o ndagu ami uyimbumba ava nyuruyila na ndunga o divita na baAmmon, nyuvega Fumu, nyumuvagula pagu jiunyensa.

³² Mbana Jefte amawenda uyetoga na baAmmon, Fumu amabawakisa ombu gandi.

³³ Amababetsa ubandila o Aroer te no yiari yiMinnit; amabapatula magumabeji mamisiengi te no Abel-Keramim. Dumaba dubudama duneni na baAmmon bamakesundusa va gusu baIsrael.

³⁴ Jefte amagabuga o ndagu andi o Mispa. Muana andi umugetu amayemubengusana na bisigu noyenayinanga. Amaba muana andi udivingu; asamaba na baana bababaala nesi baana basusu babagetu.

³⁵ Yika emulabilili amapasa biduaru biandi nogamuga rie: Aa muana ami! Gumakambisa tindi ukambisa! Ndeʼ guba mu dutalu dujogu abendasi uvura! Nyimavangana pangini na Fumu na ngorungula ubunsa pangini eni.

³⁶ Amatsingula taji andi rie: Pa gumavangana pangini na Fumu yiotsu ayi Fumu amagugabusilila pila ombu bavinitsi bagu baAmmon, payili nana gutsivanginina.

³⁷ Mbana amatsingula taji andi rie: Nsingisi diambu diedidi: Peyi tsungi beji; nyuyenawenda o mikongu uyenalilanga mu mbari ufu nyifu na nyisakawelu, jetu na bambatsi bami. Amawagula rie: Ka wendanu!

³⁸ Amamusingisa tsungi beji. Kabogu jogu na bambatsi bandi bamayenawenda na bamayenalilanga butsiemi buogu o mikongu.

³⁹ Tsungi beji tsinovioga, amagabuga ombu taji andi mbana taji amadugusu pangini aji amavangana. Muana mugetu asamajaba babaala. Avana yifu yieyina yimabandila o Israel:

⁴⁰ bilima biotsu baana babagetu baIsrael bolilanga bilumbu bina urangimina muana umugetu uJefte muisi Galaad.