Bansonsi 10 - La Sainte Bible en Langue Yipunu

Bansonsi basusu: Tola na Yair

¹ Abimelek anofu, Tola muana dibaala uPouva mutegula uDodo muisi yifumba yiIssakar amalabana uwaka baIsrael kalala; amatsaninanga o Chamir o mukongu uEfraim.

² Jandi amaba nsonsi o Israel magumabeji na bilima birieru; mbana amafu na amatsigu o Chamir.

³ Jandi anofu Yair amalabana, jandi amaba muisi Galaad na amaba nsonsi o Israel magumabeji na bilima bibeji.

⁴ Amabura magumarieru mabaana bababaala abamanangamanga mu magumarieru maburu na bamadila magumarieru mamisiengi aminengulungu te na namunyi misiengi miYair; mivu o bulongu buGalaad.

⁵ Yair anofu amatsigu o Camon.

BaAmor utumuna betumuni baIsrael

⁶ BaIsrael bamamuevaga amasamalasa Fumu ubueji: bamasalila baBaal na baAstarte va mosi na bansambi baSyrie na baSidon na baMoab na baAmmon na baPhilistin; bamabusa Fumu na basamamuemusalila.

⁷ Fumu amanyoyila baIsrael tindi kabu te na amabasumbisa ombu baPhilistin nombu baAmmon.

⁸ Muna yilumbu yieni bamakambisa baIsrael na bamabatsoyisa tindi utsoyisa, anana dimabila yigumi na yinana yibilima ombu baIsrael abamaba o disimu dina diJourdain ombu baAmor abamaba o Galaad.

⁹ BaAmmon bamasabuga Jourdain uyetoyisa baJuda na baBenjamin na baEfraim. BaIsrael bamalaba tindi munyongu.

¹⁰ BaIsrael bamatatila Fumu rie: Jetu tumaguvayila dibi mu mbari tumabusa Nsambi etu na tumasalila baBaal.

¹¹ Fumu amawivula baIsrael rie: Nyisamaduwaka kalala ombu bisi Egypte nombu baAmor nombu baAmmon nombu baPhilistin?

¹² Ava baSidon na baAmalec na baMaon bamadukambisila, jenu dunotatila nyisamaduwaka kalala?

¹³ Tumba jenu dumambusa na dumasalila bansambi bangana. La dibandu ngomueduwakila kalala.

¹⁴ Yetatilanu bansambi aba dumasola; baduwaki kalala ava dulabila munyongu!

¹⁵ BaIsrael bamatsingula Fumu rie: Jetu tumavaga dibi; tuvayili nana guirondili. Dimosi buandi, tuwaki kalala namunyi!

¹⁶ Mbana bamagusula bansambi bangana abamaba nogu na bamamuesalila Fumu agumalaba maguga mogu.

¹⁷ BaAmmon bamagukama na bamavaga milaku o bulongu buGalaad. BaIsrael bamagukama wandi na bamayevaga milaku o Mispa.

¹⁸ Batu botsu na basefu baGalaad bamawivusananga rie: Anyi oreyila utumuna baAmmon? Jandi oba sefu jibisi Galaad botsu.