Bansonsi 1 - La Sainte Bible en Langue Yipunu

BaIsrael utsana betsani o Canaan

¹ Josue anofu baIsrael bamawivula Fumu rie: Anyi va gari etu oreyila uyetumuna bisi Canaan?

² Fumu amawagula rie: Yifumba yiJuda yiureyila, nyimawakisa bulongu bueni ombu gogu.

³ BaJuda bamatsingula baSimeon rie: Tʼwendianu o bulongu abumatuvegu na mbanda, tukayetoyisanu bisi Canaan; tuwenda nenu wandi o yiari ayi dumadila disiala. Kabogu baSimeon bamawenda nogu.

⁴ BaJuda bamawenda na Fumu amabawakisa bisi Canaan na baPerizie; bamabetsa yigumi yitosini tsibabaala o Bezec.

⁵ Bamarasuna Adoni-Bezec o Bezec; bamamutumuna na bamabetsa bisi Canaan na baPerizie.

⁶ Adoni-Bezec amarina; tumba bamamuduka na bamayemugaanga, va julu vana bamamutabula milembu mibalumi mimakaka na mimakulu.

⁷ Adoni-Bezec amavosa rie: Magumidusambuali mabakaga bamatabulu milembu mibalumi mimakaka na mimakulu, abamabolanga abimalagumuganga o tsi tavula ami; Nsambi amakabusila pila. Bamamubega o Jerusalem agu amayefuila.

⁸ BaJuda bamayetumuna bisi Jerusalem na bamabonga musiengi, bamaboka batu mbana bamanyensa musiengi.

⁹ BaJuda bamamuewenda uyetoyisa bisi Canaan abamatsananga o mikongu o yiari yibanda bulongu.

¹⁰ Bamatoga divita na jogu abamatsananga o Hebron agumanengulungu va kala Quiriat-Arba; na bamabetsa bifumba biebibi: Chechai na Ahiman na Talmai.

¹¹ Avana bamatoyisila bisi Debir: Debir umanengulungu va kala Quiriat-Sefer.

¹² Caleb amavosa rie: Nyuwetsa muana ami umugetu Axa na jandi agubonga Quiriat-Sefer.

¹³ Otniel, muana dibaala uQuenaz muana nguji ungebi uCaleb amagubonga; Caleb amamuwetsa na muana andi Axa.

¹⁴ Anokota diwela na Otniel, amamuruma uvonda taji andi musiru; amasunduga va buru andi; Caleb amamuwivula rie: Diambu yi?

¹⁵ Amawaka rie: Kabili! Tsia gumapega yiari yitandu? Peyi na bileka wandi. Kabogu Caleb amamugabila bileka bineni na bigeyi.

¹⁶ BaQuenie abamaba bategula baboji buMoise bamarambuyila o musiengi umambari va mosi na baJuda na bamawenda o kumu jiJuda o tandu Arad na bamayetsana va mosi na batsiga.

¹⁷ BaJuda bamasogama va mosi na baSimeon na bamabetsa bisi Canaan abamatsananga o Sefat; udugusu mugeli bamapasa musiengi nabamaguluga Horma.

¹⁸ Mbana baJuda bamabonga misiengi miemimi: Gaza na Ascalon na Ecron na mimbu amamabambana.

¹⁹ Fumu amaba na baJuda; baJuda bamadila yiari yimikongu tumba basamarungula ubinga bisi kumu mu mbari bamaba na makalu mamadilu.

²⁰ Bamavega Hebron ombu Caleb dedi mosi nana Moise amavosila; bamabinga baana barieru bababaala baAnac.

²¹ BaBenjamin basamabinga baJebusie abamatsaninanga o Jerusalem; te na namunyi baJebusie betsaningi va mosi na baBenjamin.

²² BaJoseph bamayetoyisa bisi Bethel na Fumu amaba nogu.

²³ BaJoseph bamayesieenga Bethel agumanengulungu va kala Louz.

²⁴ Bagora bamalaba dibaala adimapalila o musiengi na bamamuruma rie: Tulonsi mbura aji turungula ukotila o musiengi na jetu tugulasa yingeba.

²⁵ Jandi amabalonsa mbura ukotila o musiengi na bamaboka bisi musiengi; tumba basamaboka dibaala dieni na mukuta andi uotsu.

²⁶ Dibaala dieni amagabuga o bulongu baHitt; amayerunga musiengi agu amaluga Louz adina uinengulungu te na namunyi.

²⁷ BaManasse basamarungila ubinga batu abamatsananga o Bet-Chean no Taanak no Dor no Ibleam no Meguiddo na mimbu amamabambana; la dibandu bisi Canaan basamagusuga o bulongu bueni.

²⁸ Diuleba baIsrael bamaba na tindi mangolu bamakotisa bu-ukotisa bisi Canaan o buviga, basamarungula ubabinga.

²⁹ BaEfraim basamarungula ubinga bisi Canaan abamatsaninanga o Guezer la dibandu bisi Canaan bamatsananga va mosi na baEfraim o Guezer.

³⁰ BaZabulon basamarungula ubinga bisi Quitron na bisi Nahalal la dibandu bisi Canaan bamatsananga va mosi na baZabulon abamabakotisa bu-ukotisa o buviga.

³¹ BaAsser basamarungula ubinga bisi Akko nesi bisi Sidon nesi bisi Alab nesi bisi Akzib nesi bisi Helba nesi bisi Afic nesi bisi Rehob;

³² la dibandu baAsser bamatsananga va mosi na bisi Canaan.

³³ BaNeftali basamarungula ubinga bisi Canaan abamatsananga o Bet-Chemech no Bet-Anat, bamatsananga va mosi nogu na bamabakotisa bu-ubakotisa o buviga.

³⁴ BaAmor bamabinga baDan te no yiari yimikongu na basamabasingisa usunduga o kumu.

³⁵ BaAmor bamagusuga va Har-Heres o Ayalon no Chaalbim. Ava baJoseph bamadilila mangolu bamabalasa maguga na bamabakotisa o buviga.

³⁶ Mandilu mabaAmor mamabandila o mukongu uAkrabbim na mamamata te no Sela.