Banongu 9 - La Sainte Bible en Langue Yipunu

Diela unengila dinengili

¹ Diela dimarunga ndagu andi jineni, dimavala yisambuali yimakutu majionyi.

² Dimabokisa bibulu; dimagukiga malamu; dimakunsa tavula.

³ Dimasindiga basalitsi bandi babagetu o julu mukongu umisiengi unengila rie:

⁴ Jenu biduka kotanu gunu! Bamatsingula jogu abagaa na diela rie:

⁵ Ruganu uyiji biguji biami noyinu malamu ama nyimagukiga;

⁶ dundanu buduka buenu mbana dudila monyu, banganganu na dujabu!

Mungo diela na mungo dunangu

⁷ Jandi oyisiembi mungo dunangu ekelasa yisonyi; jandi oyisungiyi mutu mubi esiengu.

⁸ Guyasiemba mungo dunangu mu mbari akeguvina; siemba mungo diela, jandi ogurondanga.

⁹ Gabila mungo diela, oba na tindi diela; lonsa agusungama, jandi oroyisa dujabu duandi.

¹⁰ Uduma Fumu la dibandu didujabu, diela diNsambi la malubu.

¹¹ Menu Diela, nyufunisa bilumbu biagu na bilima biagu biubuesu.

¹² Pa guna diela, divu dindeʼ beni; pa guji mungo dunangu ndeʼ beni guikilusu.

Yiduka unengila enengili

¹³ Yiduka yivu nderi mugetu aguvu na dikasi na agugejabi diambu.

¹⁴ Etsani va munu ndagu andi nesi va julu mukongu umusiengi.

¹⁵ Avana enengilili baviosi bansila abevioyi kuasa rie:

¹⁶ Jenu biduka kotanu gunu. Amalonsa abagaa na diela rie:

¹⁷ Mamba ama guidayi mavu maboti, mapa ama guji o musuega mavu maboti wandi!

¹⁸ Bagejabi yiri avana bamfumbi bavu na abamamuwagula bavu o yibususu yiabafu.