Banongu 8 - La Sainte Bible en Langue Yipunu

Nana diela divu

¹ Diela unengila dinengili, dujabu ugamuga duigamuyi. Dugegulu?

² Nesi mu mansila amavu va julu tsimikongu nesi mu mabaga mamansila; diela divu.

³ Va migula mimiunu mimandagu nesi va makotulu mamisiengi; migamu midionyi migulunu rie:

⁴ Jenu batu nyidunengili. Nyinengili bisi butamba buotsu.

⁵ Jenu biduka, wijianu ukelula mambu; jenu bifufu wijianu dujabu.

⁶ Guluanu, nyina mambu maneni udutsingula, nyidibuli murima ami udulonsanga.

⁷ Nyitubuli ngensa, bilila biami bigerondi uvosa mamfurulu.

⁸ Posulu tsiami tsiotsu tsivu tsibusinganyi, tsigaa na mamfurulu nesi ndunsulu.

⁹ Ombu jandi aguvu na dujabu tsivu kengili ombu jogu abavu na diela tsivu tsisungama.

¹⁰ Solanu malongi mami uviolila lora jivema; solanu dujabu uviolila tindi lora ajivu na dufunu duneni.

¹¹ Menu dielanyiviolili maperala vagaa ne yimosi yidufunu duneni ayivu dedi nami.

Nana diela dikelasa

¹² Menu Diela nyitsani va mosi na dujabu, nyijabi usala va mosi na duonyi.

¹³ Uduma Fumu la uvina mabi; mbe ka menu nyivini dunangu na durutsu na mabi na posulu tsindunsulu.

¹⁴ Kanu tsivu tsiami na nyitsidugusu, menu nyivu dujabu, na mangolu mavu nami.

¹⁵ Bakaga berumi na mangolu mami, baana babakaga betabuli bunsonsi na monyi.

¹⁶ Na mangolu mami barumitsi na baneni berumi, nesi botsu abetabulili bisi butamba bunsonsi.

¹⁷ Nyirondi jogu abetondi, jogu abetombi bendabi.

¹⁸ Busina na bundumba bivu nami nesi maboti ametsingi na dusungugu.

¹⁹ Pegulu tsiami tsivu tsiboti uviolila lora nesi tindi lora na digumba diami diviolili lora jivema.

²⁰ Nyivu mu nsila jidusungugu, mu mansila mabusinganyi,

²¹ uyevega maboti ombu jogu abetondi nesi ubasa bilundulu bimandagu mogu.

²² Fumu amansunda kala, ne bisundu biandi biotsu bikasundu.

²³ Nyimaba vana dibandu, ne butamba bukasundu.

²⁴ Nyimaburu nesi miubu mbe misakaba nesi bileka bimamba mbe bisakaba;

²⁵ ne mikongu mikawarusu, nesi bikundubuga bikaba, menu nyimaburu kala;

²⁶ mbe Fumu asakavaga nesi butamba nesi musiru nesi dibungili ditega didifufundu mu bulongu.

²⁷ Ava amavayila julu nyimaba vana; nesi ava amavayila dugongula va julu mubu.

²⁸ Nesi ava amavayila mamungi o julu ava amapalisila mamba na mangolu o bileka,

²⁹ nesi ava amakunsila mandilu mamubu yiri mamba magopumuga yiari na yiari, nesi ava amavayila yibuga yibutamba.

³⁰ Nyimasala va mosi nandi na nyimamulasanga ubueji bilumbu biotsu, nyimasangilanga temu tsiotsu va gusu andi.

³¹ Nyimasangilanga va butamba abu amasunda, nyimalabanga ubueji va mosi na batu.

Ka muna ubueji gu uvu na jandi oyigulu diela!

³² Baana bami bababaala kululuanu, ka muna ubueji gu uvu nenu pa duikelisi maruma mami!

³³ Guluanu malubu yiri duba na diela, duyamabusa.

³⁴ Ka muna ubueji gu uvu na jandi oyikulu nesi oyirangimini mambu mami yilumbu na yilumbu nesi oyikelisi makotulu mandagu ami!

³⁵ Jandi agumandila amadila monyu, Fumu omulasa maboti mandi.

³⁶ Jandi oyivayi masumu ekevega mbela: aguipiningi erondi dufu.