Banongu 7 - La Sainte Bible en Langue Yipunu

Yimbembu udunsa edunsi mufudu

¹ Muana ami udibaala guyalibana mambu mami; kelisa maruma mami.

² Kelisa ama nyigulonsi mbana gudila monyu; kelisa malongi mami nana guikelisili bikokosi biagu.

³ Malinsingi nagu nomakelisa mu murima agu.

⁴ Tsingula diela rie: Ndeʼ guji yibusi yiami! Tsingula dujabu rie: Ndeʼ guji mbatsi ami,

⁵ yiri biuguwamusa te na gugoduka mugatsi ngana, aguvu na posulu tsibupumbi.

⁶ Yilumbu yimosi nyimaba va fenetera jindagu ami na nyimagengila va gusu kana.

⁷ Nyimalabilila bafudu na va gari ogu vamaba yiduka.

⁸ Jandi amavioganga muna nsila bebeli na yimbembu, amayenawenda o ndagu andi.

⁹ Dimalabana tsisiga va bimbombori.

¹⁰ Mugetu eni amayenamubengusana, amaduara tindi kembu na ukunsa ekunsi diambu diandi.

¹¹ Uvosa evosi nana erondili; avu nsunsaba o gari ndagu andi,

¹² temu tsimosi aji muna nsila, temu tsisusu aji o makasa nesi mbura tsiotsu, umingila emingili babaala.

¹³ Ubumba emubumbi, ufifa emufifi, agaa na yisonyi, emutsinguli rie:

¹⁴ Nyimavangana na Nsambi umuvagulila pagu tsikabusulu tsimaboti, namunyi nyibanotsidugusu.

¹⁵ La dibandu nsipalila ugubengusana. Nyimaronda ugujaba na laba tumalabana.

¹⁶ Nyimakunsa tangi ami na mamfunga mamatsanda maEgypte;

¹⁷ nyimanyansa tangi ami muyombu umira na alowe na kanela.

¹⁸ Ruga tuyilaba nsangu va tangi; tukevega udugusu nsangu tsietu.

¹⁹ Mulumi ami agaa o ndagu; aji o ulinga uvala.

²⁰ Amaweʼ na komi jibasa de na mbongu, agogabuga te na yisusungi yiupala.

²¹ Amamusovisa na posulu tsiandi tsidiela, mufudu amagulu posulu tsiandi tsibupumbi.

²² Amayenamuduka nderi ngombi ajibegu o uboku, nesi nana yiduka ayimatungu ukilusu,

²³ te na dubansa dumamutoba mu mbombu, nesi nana tsoli ajimakatana mu disinga tsiri ujaba yiri yika ufu efu.

²⁴ Baana bami bababaala tsie kululuanu, banu limba ugulu ama nyivosi.

²⁵ Mirima mienu miyaduka bifu bimugetu umunongu eni, duyaketsiemusa mu mansila mandi.

²⁶ Mu mbari amabokisa batu bapuela, nesi babaala bamangolu bamabokusu nandi.

²⁷ Ndagu andi jivu nsila utolila o mbura jiabafu; uwenda bewendi o ufu.