Banongu 6 - La Sainte Bible en Langue Yipunu

Busa miganu

¹ Muana ami udibaala pa gumatabusana dugasu na mutu nagu na pa gumakevega tuga jibatu basusu,

² pa gumakerambila mirambu na posulu tsiagu na pa gumagaangu na posulu tsindeʼ beni,

³ kabogu muana ami udibaala ukegobula diuleba gumagaangu na mutu nagu, wenda yekutama va gusu andi nomulembiyila.

⁴ Guyatimba yilu na guyawenda yilu.

⁵ Rina dedi mosi nana tsiesi erinini murela nesi nana tsoli erinini murela batsoli.

Busa uba mutsoritsi

⁶ Ndeʼ mutsoritsi lewiji bamburutotu: gengila bisalu biogu nowiji diela;

⁷ bagaa na basefu nesi bivunda bibisalu nesi balonsi.

⁸ Bekunsi mogu motsu va temu jiwelimina na begukiyi biguji biogu yiri bagofu na nsala.

⁹ Ndeʼ mutsoritsi te na temu yi gusimbuyila? Te na temu yi gurambuyila yilu?

¹⁰ Mua pesu yilu, muapesu utsukama, muapesu utsingiga miogu nowenda yilu,

¹¹ mbana bujaga na nsala biugukambisa dedi mosi nana yikongu na mukinditsi bekambisili batu.

Mudunsitsi

¹² Bango bikumbu na batu babi la jogu abefuringi;

¹³ bepieti misu na betoti nyala tsimakulu na begebusini na milembu;

¹⁴ bikumbu bibasi mirima miogu, betasingi yika mabi na mabi, berombisi mitsundu.

¹⁵ Kabogu dubungu duogu dusundila ulabana; bosundila ugaangu, vagoba mutu ubawaka kalala.

Ama Fumu evini

¹⁶ Vavu mambu masiamunu ama Fumu evini nesi yisambuali yiminongu ama elabi nsoruru:

¹⁷ dunangu, mamfurulu, bukongu,

¹⁸ murima aguitasingi yika mabi, makulu amelingingi uvaga mabi,

¹⁹ bumbeji bumfurulu na mutu aguirombisi mitsundu va gari baana bataji.

Malubu mu diambu dibumbembu

²⁰ Muana ami udibaala, kelisa maruma mataji agu na guyabusa malongi manguji agu.

²¹ Bibangingi mu murima agu temu tsiotsu, bibi nderi kembu mu kingu agu.

²² Biuguwendisanga mu muendu agu, biugukelisa va tangi agu, biuvosanga nagu ava guirambuyili.

²³ Mu mbari maruma mavu nderi lambi na malongi mavu nderi yijalala, malubu mansiembu mavu nderi nsila ajiviosi mutu o monyu.

²⁴ Bionyi biugukelisa yiri gugofuama yimbembu nesi aguvu na posulu tsibupumbi.

²⁵ Guyamunyungila mu diambu dikembu andi. Guyadunsu na misu mandi.

²⁶ Gukaluga tindi yijaga mu diambu diyimbembu va julu vana mugetu ngana onmgula ugurombisa dufu.

²⁷ Je mutu okotisa muji o tsi yikutu yiandi na bikutu biandi bigonyenga?

²⁸ Je mutu oyenatsiarilanga magala mamuji tsiri unyenga matambi mandi?

²⁹ Divu dedi mosi na jandi oyiduki mugatsi umutu nandi; mutu uotsu agusilama nandi okilusu.

³⁰ Tanguji mudayitsi amadaga mu mbari amaba na tindi nsala;

³¹ tumba pa bomugaanga vengu ofuta yisambuali yikumbu, ovega biotsu abivu nandi o ndagu andi.

³² Tumba jandi oyivayi bumbembu na mugetu avu yiduka; jandi oyivayi nana, erondi uketsiemusa.

³³ Onemusungu na olabanga yisonyi na yisonyi yiandi yigotsinduga, via!

³⁴ Kabu jimulumi jiuranga, agomuemulasa yingeba, omugabusila pila.

³⁵ Agosinga bukali ne pa bofunisa milendu. Agosinga, via!