Banongu 5 - La Sainte Bible en Langue Yipunu

Malubu mu diambu dimugetu ngana

¹ Muana ami udibaala ba liyiyi uwiji diela diami; liga matuji ugulu dujabu duami.

² Gunokipa malongi mami guvosanga na dujabu.

³ Dedi mosi nana buji buvu na dueyi anana bilila bimugetu ngana bivu na nana matsi mavu na mbunga jiboti, amandi mesovisi mutu.

⁴ Tumba va disukusulu amandi mavu na nduli nderi dugundu na mavu tindi mengu nderi dijenga adivu mengu yiari na yiari.

⁵ Uwenda ewendi o dufu nesi o mbura aji abafu bavu.

⁶ Agekipi nsila monyu, nsila andi jivu fuakara, agejabi agu ewendisini.

⁷ Muana ami udibaala, tsie kululu, guyabusa malongi mami.

⁸ Kakana vala na mugetu umunongu eni, guyabambana va munu ndagu andi.

⁹ Guyakewakisa ombu basusu; kebana, mulumi agugaa na yingeba ogubivisa.

¹⁰ Bagetu bangana botopulu maboti magu nesi abi gumasala udila biuba bibagetu basusu.

¹¹ Va disukusulu mangolu magu mosuka, gubima yika ubimanga.

¹² Gukewivula rie: Dibandu yi nyimavinina malongi na dibaridu yi nyimabusila nsiembu?

¹³ Dibandu yi nyimabusila diufi dimilonsi miami?

¹⁴ Mbe nyisamakota muna mbe ngelensu va gari batu bebana.

Ronda mugatsi agu gumawela va bungebibuagu

¹⁵ Nuanganga mamba maditanga diagu, mamba amepalili o yileka yiagu.

¹⁶ Bileka biagu biuvuvanga kulini? Mijamba miagu miupumuganga o makasa?

¹⁷ Bibi bindeʼ beni, guyamagabila batu bangana.

¹⁸ Yileka yiagu yigabulu miula; diwendi rie: laba ubueji na mugatsi agu, agu gumawela va bungebi buagu,

¹⁹ aguvu yitumba-numba, ba na mamunga temu tsiotsu ava guimugengilili na durondu.

²⁰ Muana ami udibaala, dibandu yi guvu na mamunga ava guigengilili mugetu ngana? Dibandu yi guibumbili mugetu agu gugejabi?

²¹ Fumu ejabi motsu ama guivayi na elabi mbura tsiotsu atsi guiwendi.

²² Mutu mubi ogaangu na mabi mandi na oba atungu na masumu mandi.

²³ Ofu mu mbari ebusi malongi, buduka buandi bumurombisa dufu.