Banongu 30 - La Sainte Bible en Langue Yipunu

Mambu maAgour

¹ Mambu maAgour muana dibaala uYaque. Mambu ama amavosa na Itiel; Itiel na Oukal:

² Dingensa nyivu tindi yiduka uviolila mutu uotsu, na ngaa na dujabu;

³ Nyisamawiji diela na ngejabi diela adinjabisi Nsambi.

⁴ Anyi amamata o julu? Anyi amaruyila guna? Anyi amagaanga punga na makaka mandi? Anyi amatunga mijamba va yikutu yiandi? Anyi amavaga mandilu mabutamba? Diina diandi yi? Diina dimuana andi udibaala yi? Guimujabi?

⁵ Pangini tsiotsu tsiNsambi tsigevinsi kingu, jandi avu ngubu jijogu aberondi usuema ombu gandi.

⁶ Guyabuesa diambu mu mambu mandi mu mbari akegukilisana gukelusu mufuritsi.

⁷ Nsambi ami, nyiguwivuli mambu mabeji: mansingisi te na dufu duami.

⁸ Kakisini ndunsulu na mamfurulu; guyapaga yijaga nesi yisina, peyingi yika biguji biami.

⁹ Diurungula uba digumba diutombisa ugugala na nyuwivula rie: Anyi avu Fumu? Vo nyudaga mu diambu dibujaga nolensa diina diNsambi ami.

¹⁰ Guyafuegilila musalitsi ombu fumu andi mu mbari akegusienga na gukeba na mbela.

¹¹ Avu munongu mutu oyisiengi taji andi na agegabusili nguji andi diboti.

¹² Avu munongu mutu oyiketasa ulioma avu diuleba muinsi andi usakasusu.

¹³ Avu munongu mutu aguvu na dunangu na avu tsamanga.

¹⁴ Avu munongu mutu agu minu mandi mavu nderi majenga na mibaka miandi mivu nderi mabaga. Avu akunsama uyenakambisa agumakambulu nesi bijaga.

Banongu basusu

¹⁵ Duguva ana baana babagetu babeji abevosi rie: Peyi, peyi! Vavu mambu marieru amagemani nsala, nesi mana amagevosi rie: Vana dedi!

¹⁶ Mburajiabafu, yinguma yimugetu, butamba abugegukuru mamba, muji agugetsimi.

¹⁷ Pa mutu elensi taji na nguji andi bakavanga bayibususu bomudoda na baana bambira bomuji.

¹⁸ Vavu mambu marieru ama ngorungula utsiyisa nesi mana amangejabi:

¹⁹ Dibondu dimbira o julu, dibondu dinyoga va julu dimanyi, dibondu didikumbi mu mubu, dibondu didibaala ombu mugetu.

²⁰ Ajina jivu nsila jiyimbembu yimugetu: ejangingi na etsinduli munu mbana evosi rie: Ngaavaga dibi.

²¹ Mambu marieru mereyimisi butamba na vavu mambu mana ama dugorungula uwarila:

²² Muviga oyirumi, yiduka oyigukurungu,

²³ mugetu aguilensu oyiwelini musalitsi umugetu oyibialili disiala difumu andi.

²⁴ Vavu bibulu bina bigeyi mu butamba tumba bivu na diela diviolila:

²⁵ Bamburutotu bagaa na mangolu tumba bekunsi mogu motsu va temu jiwelimina.

²⁶ Badamana bagaa na mangolu ne nana bevayi bitsiga biogu o gari tsimamanyi.

²⁷ Makokoku magaa na bakaga ne nana belingingi muna mabuli;

²⁸ Mabambila megaangu na makaka ne nana melabini o ndagu kaga.

²⁹ Vavu barieru abivu na tindi muendu nesi bina abivu na muendu uboti:

³⁰ yimbungu ayiviolili bibulu biotsu bisusu;

³¹ kabala jidivita; vo mulumi yinsabi nesi kaga aguiwendisi divita.

³² Pa dunangu duigurombisi uvaga mambu mabuduka na pa guna matasa makulini, simina!

³³ Pa mutu egami ngatsi edili matsi; pa mutu edimbi mbasu jimutu nandi epalisi malungu dedi mosi kabu jipalisi mitsundu.