Banongu 26 - La Sainte Bible en Langue Yipunu

Buduka

¹ Nana mfula jigenoyingi va mangala nesi va temu dutsonsugu dedi mosi yiduka agedili digoba.

² Milogu migorungula ugugaanga pa gugaa na diambu; mivu nderi batsoli abevioyi tsiri ubetama.

³ Mukasa umasuegulu kabala, budilu bumasuegulu buru na mukasa umasuegulu yiduka.

⁴ Guyawagula buduka buyiduka; ndeʼ beni gukebagunu nandi.

⁵ Wagula yiduka na buduka, akekegengila rideri avu na diela.

⁶ Jandi oyitindi bulumbi na yiduka avu nderi amaketabula makulu na ekelasi maguga.

⁷ Nana makulu ma-ayitsonduyi magaa na mangolu dedi mosi na nongu ajiubuagu na yiduka.

⁸ Uyitsa yiduka divu kulini dedi na utunga dimanyi mu yilangandaji.

⁹ Nana mutsietsiendi va dikaka dimungo dilangi dedi na nongu ajipalili munu yiduka.

¹⁰ Oyingasisi yiduka mu yisalu erombisi batu mambu.

¹¹ Mondi emueji bilusi abi abanoluga na yiduka emuevaga buduka buandi.

¹² Tindi yiduka eviolili mutu aguitasi yiri ana diela.

Mutsoritsi

¹³ Mutsoritsi agesoyimi evosi rie: Mu nsila muvu yimbungu, mansila motsu yika bimbungu na bimbimgu.

¹⁴ Yiabutsu yigabuyi va magongi mandi, mutsoritsi egabuyi o tangi andi.

¹⁵ Mutsoritsi epoduli dikaka diandi mu yipela tumba elabi uvura ukelisila.

¹⁶ Mutsoritsi etasi yiri anana diela uvio lila yisambuali yibabaala abejabi uwagula.

Banongu basusu

¹⁷ Oyifuami mu mambu mangana avu nderi oyigaangi mondi ajivioyi mu matuji.

¹⁸ Nana dilagu esani namuji na mbansa na buta

¹⁹ anana mutu aguidunsi mutu nandi avu ava emuwivuli rie: Tsiri yika ukibisa nsigukibisa?

²⁰ Pa mikansu mitsatsi muji utsima uitsimi na pa bagaa babeyitsi bamatamba mitsundu misuki.

²¹ Nana magala mamuji mebangisi muji na mikansu miroyisi muji eni dedi mosi mutsunditsi erombisi mitsundu.

²² Posulu tsimungo matamba tsivu nderi pinda tsigangu, ka muna nsangu ji matamba meni melasi batu.

²³ Posulu tsiminyimu tsisueyi murima ubiva na tsivu nderi lora jivema ajimanamugu mu yisanga yidiga.

²⁴ Jandi oyivini ekelasa na posulu tsiandi; murima andi uvu ubasa de na ndunsulu.

²⁵ Ava evosili posulu tsiminyimu guyamuvayila yitu mu mbari ana yisambuali yiminongu minsoruru mu murima andi.

²⁶ Ne pa osuega divina diandi o tsi posulu tsipenda, mbivulu tsiandi tsiulabana.

²⁷ Jandi oyitimi dubila otsudama muna na dimanyi diuvika jandi agumadibungasana.

²⁸ Penda jivu divina na jinemisi tindi unemisa na mamfurulu merombisi dubungu.