Banongu 23 - La Sainte Bible en Langue Yipunu

¹ Pa guji va tavula na mutu muneni rangimina aguvu va gusu agu;

² uviolila ubueji ukeboka tsiri udibula mulugu agu.

³ Guyanyungila milambu miandi; biguji biandi biurungula ugudionga.

⁴ Guyaketsoyisa udila busina, dunda ubutasanga.

⁵ Ndeʼ guirondi ugengilanga abigotamba notsiemuga? Mu mbari busina buvu na mapapi na upurumuga buipurumuyi nderi mbira.

⁶ Guyaji biguji bimungo nyinga na guyanyungila milambu miandi;

⁷ mu mbari nana eketasila anana avu, oguruma rie: Janganga nonuanganga; tumba murima andi ugaa nagu.

⁸ Guluga abi gumaji na gusunda ulibana posulu tsiagu tsiboti.

⁹ Guyalubusa yiduka mu mbari elensi diela diagu.

¹⁰ Guyakuekisa mandilu makala uyenapatula bisiana manungi.

¹¹ Mu mbari mugabusilitsi ogu upila avu na tindi mangolu: Nsambi jaʼ beni oguvega mbela.

¹² Vega murima agu utsiyisa dilongi na liga matuji ugulu posulu tsidujabu.

¹³ Guyabusa ukilisa muana ne pa gumudimba na dikasi agofu, via

¹⁴ tumba guimuwaki kalala yiri agobungana o bulungi bumuji.

Malongi mataji ombu muana andi udibaala

¹⁵ Muana ami udibaala pa guna diela nyulaba ubueji.

¹⁶ Nyusangila na murima uotsu ava guvosilanga amavu masungama.

¹⁷ Guyawava bavayitsi bamasumu tumba dumanga Fumu,

¹⁸ mu mbari amavu o gusu mavu mawelimina na guna tsongu.

¹⁹ Gulu muana ami dibaala ba na diela, kipanga amavu masungama.

²⁰ Guyatsana na banuitsi bamalamu, nesi jogu abeviosulili ujanganga.

²¹ Mulangitsi na jandi oyiviosulili motsu bekevaga bijaga na mutimbitsi yilu oduisu masiengi.

²² Gulu taji agu, jandi amagubura na guyalensa nguji agu mu mbari amanuna.

²³ Manina mangolu motsu udila ngensa na guyajitsiemusa, manina mangolu magu motsu udila diela nesi dilongi nesi malubu.

²⁴ Taji jimutu usungama elabi tindi nsangu na jandi agumabura musinganyi nesi mungo malubu olabanga nsangu wandi.

²⁵ Taji agu na nguji agu balabingi nsangu na jandi agumagubura alabingi nsangu wandi!

²⁶ Muana ami udibaala kevega ombu gami na rondanga bifu biami wandi.

²⁷ Jaba yiri buvuyisa buvu nderi dubila na yimbembu avu nderi ngila.

²⁸ Erambi mirambu nderi yikongu avu na erombisi babaala bapuela utsimbu.

Mulangitsi

²⁹ Anyi bevosili rie: Ngeba menua? Anyi bevosili rie: Munyongu nana? Anyi betsundili? Anyi befundingi? Anyi ana mapura amagaa na dibandu? Anyi avu na misu mabenga?

³⁰ Jogu abemoyingi na malamu, jogu abebimbingi mafubi.

³¹ Guyagengila malamu amelabini na dubengu duboti amevayi binsiensi mu kopa ameminu na buranga,

³² mbana megaki nderi muemfu.

³³ Gulabanga biriariamu na guvosanga posulu tsibuduka.

³⁴ Gulaba nderi guji o gari mubu nesi usilama o julu muiri.

³⁵ Guvosa rie: Bamandimba tumba ngegulu buali; bamandimba na nyisamadigulu. Ava nyurambuyila nyuwenda umueyenu.