Banongu 22 - La Sainte Bible en Langue Yipunu

¹ Diduma diboti diviolili nesi busina na maboti meviolilj lora jivema nesi tindi lora.

² Yisina na yijaga bana dibandu dimosi: Fumu agumabasunda jogu botsu babeji.

³ Dibaala dilubuga elabi mabi na esuemi tumba biduka bevioyi kuasa na bekilusu.

⁴ Yisaku yiukesunsa na uduma Fumu la busina na bundumba na monyu.

⁵ Matsiendi na mirambu bivu mu nsila jimungo kanda; jandi oyikekelisa agowakululu.

⁶ Lonsa muana bifu biwelimina; nesi va buvunda buandi agobibusa.

⁷ Yisina erumi bijaga na jandi oyisombi avu nderi muviga ujandi oyimusombisi.

⁸ Jandi oyifunisi mabi okilusu na durumu duandi dutsiemuga.

⁹ Jandi ojivu na yingeba ogabulu miula mu mbari eveyi biguji biandi ombu bijaga.

¹⁰ Binga bango dunangu mbana mitsundu miusuka; nesi misosi na bisiengu biusuka.

¹¹ Kaga oba mbatsi jimutu oyirondi uba na murima ulioma na posulu tsiminyimu.

¹² Fumu ekelisi basungama; tumbaetutsi posulu tsibasoyitsi badiela.

¹³ Mutsoritsi evosi rie: Va gusu kana vavu yimbungu! Nyuboku mu nsila!

¹⁴ Posulu tsibimbembu tsivu nderi dubila; jandi agu Fumu amanyoyila otsudama muna.

¹⁵ Bangebi bavu na buduka; mukasa ubatsiemusa buonyi.

¹⁶ Jandi oyikambisi bijaga na elensi bisina disukusulu diandi divu bujaga.

Malubu mamunongu na munongu

¹⁷ Liga matuji noguhi posulu tsidiela; vega murima agu utsiyisa dujabu duami.

¹⁸ Mu mbari divu diwelimina yiri gubikelisa mu murima agu na biugulungungu na posulu tsiagu.

¹⁹ Nyirondi ugulonsa namunyi yiri guvayila Fumu yitu yiagu yiotsu.

²⁰ Nyisakagusoninanga mambu maboti: malongi na matasa,

²¹ yiri gutsiyisa ngensa tsimambu nowagula aguvu na bivu?

²² Guyakinda yijaga mu mbari yijaga avu na guyakambisa agumakambulu.

²³ Fumu obatabulila bunsonsi na obokisa jogu abamabakinda.

²⁴ Guyafubana na mungo yifutsu, guyalinga va mosi na mungo dikasi,

²⁵ mu mbari gukewiji bifu biandi na mbe biukaluga murambu mu ndeʼ beni.

²⁶ Guyaba va mosi na jogu abetabusini kasu nesi va mosi na jogu abeveyi batuga mu diambu dimiganu.

²⁷ Gugaa na yima ufuta dibandu yi gukerombisila yiri bogupatula tangi agu?

²⁸ Guyakuekisa mandilu makala amabataji bagu bamavaga.

²⁹ Gumalaba mutu aguvu na buketi mu yisalu yiandi? Osalilanga bakaga tsiri batu bakulini.