Banongu 21 - La Sainte Bible en Langue Yipunu

¹ Matasa makaga mavu nderi yivela ayi Fumu ewendisi nana erondili.

² Bifu biotsu bimutu bivu biboti ombu jaʼ beni tumba Fumu epitsi motsu.

³ Uvaga adivu diwelimina na disungama melasi Fumu ubueji tsiri umuvagulila pagu.

⁴ Dunangu na udugusu nsala na bisalu bibi bivu masumu.

⁵ Abesali na mangolu bedili digumba tumba jandi oyisali na bivatila obanganga na nsala.

⁶ Bilundulu bibafuritsi bigaa na tsongu: bivu nderi punga ajivioyi: birombisi dufu.

⁷ Dikasi dibatu babi la dubungu duogu mu mbari bebusi uba na businganyi.

⁸ Mutu mubi ejabunu na bifu biandi bibi; musinganyi evayingi amavu masungama.

⁹ Uviolila ubueji utsana o disaku tsiri utsana o ndagu mosi na mugetu aguvu na mitsundu.

¹⁰ Mutu mubi erondi uvaga mabi, agevayili nesi mbatsi andi maboti.

¹¹ Ava bekilisili mudesitsi, yiduka ekaluyi mungo diela; ava belonsili mungo diela edili dujabu.

¹² Fumu egengili ndagu mutu mubi; na ubunga emubungi.

¹³ Jandi oyigalisi murima ava yijaga egamuyili, jaʼ wandi ogamuga na agodila mutu umuwagula.

¹⁴ Diboti adivagu o musuega divotsi kabu na mulendu agumavegu o musuega uivotsi tindi kabu.

¹⁵ Ka muna nsangu ji ava mutu usungama edukili dusungugu tumba jogu abevayi mabi bobungana.

¹⁶ Jandi oyibusi dujabu ofu.

¹⁷ Jandi oyirondi yika nsangu okaluga yijaga; jandi oyirondi malamu na matsi agoba yisina, via!

¹⁸ Mutu mubi avu nyobu jimutu usungama, mudunsitsi evingi va mbura musinganyi.

¹⁹ Uviolila ubueji utsana o mbura jigumuga tsiri utsana na mugetu aguvu mutsunditsi na manyonyoga.

²⁰ Bilundulu bibango diela bivu bibasa de tumba yiduka emani biandi biotsu.

²¹ Jandi oyirondi uba musinganyi edili monyu na dusungugu na duyitsu.

²² Mungo diela elebi o musiengi ubaneni upansa bivaga biogu abi bamavayila yitu.

²³ Jandi oyikebini na posulu tsiandi, ekekelisa yiri agokilusu.

²⁴ Badesitsi bavu na dunangu na bekerutsula na bevayi nana berondili.

²⁵ Nsala tsimutsoritsi tsimuboki mu mbari ebusi usala.

²⁶ Nyangu na mukolu yika unyuenga enyuengi tumba mutu usungama eveyingi tsiri utsikadana.

²⁷ Lesa pagu tsibatu babi tsivu nsoruru tambusa na atsimavagulu na mabeʼ mabeji.

²⁸ Mbeji jimfurulu obungana tumba jandi oyigulu ngensa agotabulu kusu.

²⁹ Mutu mubi agaanayisonyi tumbamutu usungama avu awara.

³⁰ Vagaa diela nesi dujabu nesi dilongi abiugagana na Fumu.

³¹ Kabala jivu jikunsama mu yilumbu yidivita tumba ndunga jiruyili ombu Fumu.