Banongu 17 - La Sainte Bible en Langue Yipunu

¹ Uviolila ubueji uji biguji bikunyi noba na duvotsu tsiri utsana va tavula jibasa de na banyama agu betsundingi.

² Musalitsi aguvu na malubu odiamisa muana dibaala aguilasi taji andi yisonyi, mbana odila dikabu didisiala dimukuta.

³ Lora jivema na lora tsipitsulu na muji tumba Fumu epitsi mirima.

⁴ Batu babi begulusunu na babi nogu, bafuritsi begulusunu na bafuritsi nogu.

⁵ Jandi oyidesi yijaga esiengi Nsambi agumamusunda; jandi aguisangili maguga mamutu nandi jaʼ wandi okilusu.

⁶ Bategula bavu nderi dugaba dubununu na bataji bavu bundumba bubaana bogu.

⁷ Posulu atsimakelulu tsigesoyini na yiduka; mfurulu tsigesoyini na barumitsi!

⁸ Milendu mivu nderi mamanyi madufunu duneni ombu jandi oyimidili, yiotsu yina biandi biotsu bifuningi.

⁹ Jandi oyilibini dibi erombi durondu, jandi oyidirangimini mu posulu tsiandi ekakisini bambatsi.

¹⁰ Nsiembu tsilasi tindi diambu ombu mutu aguvu na diela, uviolila kama tsilu atsimadimbu yiduka.

¹¹ Mutu mubi elasi bumbini buandi tumba mungo dikasi otindu ombu gandi.

¹² Uviolila ubueji ubenguna na magena ameyenaromba baana bandi tsiri ubenguna na yiduka na buduka buandi.

¹³ Jandi oyivayi dibi va julu diboti olabanga dibi o ndagu andi.

¹⁴ Ubanda mitsundu uvu nderi ubula mueyi; kegusula ne mutsundu ukabanda.

¹⁵ Jandi oyiveyi ndunga ombu mutu mubi na jandi oyiveyi mutu usungama mbela: botsu babeji bavu nsoruru ombu Fumu.

¹⁶ Mbongu atsivu va dikaka diyiduka tsi yi? Usumba diela? Agaa na diela via.

¹⁷ Bambatsi berondisiningi temu tsiotsu, ne temu maguga belabini nderi bavu baana bataji.

¹⁸ Agugaa na diela etabusini dugasu na mutu nandi na duonyi eketsoyisa.

¹⁹ Jandi oyirondi mitsundu ekerombisa mbela; jandi oyikematisa obungana.

²⁰ Mungo kanda agolaba ubueji; jandi aguvu na posulu tsikulini olabanga purulu.

²¹ Jandi agumabura yiduka olabanga munyongu; taji yiduka agosangilanga.

²² Nsangu jivu yilongu yiboti tumba murima ubuliga uvu tindi buali.

²³ Mutu mubi esingi milendu o musuega uyenabivisanga dusungugu.

²⁴ Diela divu va gusu iiiungo dujabu tumba yiduka uromba eyenadiromba te na masuka mabulongu.

²⁵ Muana dibaala aguvu yiduka enyongisi taji andi nesi mugetu agumamubura.

²⁶ Digaa diwelimina ufutisa mutu usungama dumandu nesi ukilisa aberumingi.

²⁷ Jandi aguvu na yida-mamba ana diela, jandi aguvu na bumbosi ana dujabu.

²⁸ Nesi yiduka pa aji sui elabini nderi ana diela; jandi oyidibiyi munu elabini nderi ana dujabu.