Banongu 15 - La Sainte Bible en Langue Yipunu

¹ Kabusulu tsiboti tsivotsi kabu tumba posulu tsibukanyi tsijimatisi.

² Mungo diela elonsi mambu madujabu, yiduka epalisingi buduka.

³ Fumu egengili biari biotsu, elabi babi na baboti.

⁴ Posulu tsiminyimu tsivu nderi muiri umonyu tumba posulu tsikanda tsinemisi mirima,

⁵ Yiduka elensi malubu mataji andi tumba jandi oyidumi nsiembu avu alubuga.

⁶ O ndagu mutu usungama uvu digumba dineni tumba maguga mavu yisaku yi-abagaa na businganyi.

⁷ Posulu tsibango diela tsilonsi diela tumba tsibiduka tsigaa na tsongu.

⁸ Pagu tsibatu babi tsivu nsoruru ombu Fumu tumba tsambu tsibatu basungama tsimulasi ubueji.

⁹ Bifu bibatu babi bivu nsoruru ombu Fumu tumba erondi jandi oyikipingi dusungugu.

¹⁰ Mukilu uneni uivivi jandi agumapembuga nsila; jandi oyivini nsiembu ofu.

¹¹ Lesa mbura jiabafu na mbengi bijabunu na Fumu tambusa na mirima mibatu!

¹² Munongu dunangu agerondi yiri osiembu la dibandu agewendi ombu bango diela.

¹³ Murima ubasa na nsangu uiveyi mamunga tumba pa murima uvu na munyongu yika dusisi na dusisi.

¹⁴ Mungo dujabu erombi diela tumba yiduka elabi ubueji na buduka buandi.

¹⁵ Bilumbu biotsu bi-agumakambulu bivu bibi tumba mungo nsangu esangilingi temu tsiotsu.

¹⁶ Diwelimina uba na mua pesu busina nodumanga Fumu tsiri uba na bungunu buneni abuvu na mikunga.

¹⁷ Uviolila ubueji uji miguba na mutu agu guirondi tsiri uji ngombi jivonga na mutu agu guivini.

¹⁸ Mungo dikasi erombisi mitsundu tumba aguvu na pugu evotsi mitsundu.

¹⁹ Nsila mutsoritsi jivu yika matsiendi na matsiendi tumba nsila jimutu usungama jivu jibatu.

²⁰ Muana dibaala aguvu na diela elasi taji andi na nguji nsangu, yiduka elensi taji andi na nguji.

²¹ Buduka buvu nsangu ombu jandi agugaa na diela tumba mungo dujabu ewendingi sungingi.

²² Bisalu bibunsini pa milonsi misatsi tumba bibuejingi pa milonsi mivu mipuela.

²³ Mutu elabi nsangu pa ejabi uwagula, ka muna ubueji gu pa posulu atsimavosu tsivotsi batu!

²⁴ Nsila monyu jiutolisa mungo diela te no julu yiri agovindama o mbura jiabafu.

²⁵ Fumu epansi ndagu tsibango dunangu tumba ewarisi mandilu mamukuili.

²⁶ Matasa mabi mavu nsoruru ombu Fumu tumba posulu tsiboti tsimulasi ubueji.

²⁷ Mungo jiba mbongu, elasi bisi mukuta andi maguga tumba jandi oyivini milendu odila monyu.

²⁸ Mutu usungama eletasa ama owagula tumba mutu mubi evosingi mapopopu.

²⁹ Fumu eliyili batu babi nsima tumba egulu tsambu tsibatu basungama.

³⁰ Yisuisu yiyisagumunu yiveyingi nsangu; misamu miboti mivayi nyuru yika biogugu.

³¹ Jandi aguvu limba ugulu nsiembu otsana va mosi na bango diela.

³² Jandi oyibusi ulonsu ekevina tumba jandi oyigulu nsiembu edili dujabu.

³³ Uduma Fumu uilonsi diela, mutu alekesunsa mbana odila bundumba.