Banongu 14 - La Sainte Bible en Langue Yipunu

¹ Mugetu aguvu na diela ewarisi mukuta andi; yiduka yimugetu egupansi.

² Jandi oyiwendi sungingi edumi Fumu tumba jandi oyiduki mansila makulini emulensi.

³ Posulu tsiyiduka tsivu nderi mukasa na tsilasi dunangu duandi tumba posulu tsibango diela tsibarombisi duyitsu.

⁴ Pa bangombi besatsi yilundulu yibiguji yivu pavala; digumba dilabini pa bangombi bapuela bavu.

⁵ Mbeji jiwelimina agefuri; mbeji ajigaa jiwelimina efuringi.

⁶ Mudesitsi erombi diela ne nana agedidili tumba mutu aguvu na dujabu esundili udila diela.

⁷ Kakana na biduka; gugowiji diela ombu gogu.

⁸ Diela dimungo malubu la utsiyisa monyu; buduka bubiduka la ndunsulu.

⁹ Biduka bisani na masumu tumba batu basungama belasu maboti maNsambi.

¹⁰ Mutu jaʼ beni ejabi munyongu nesi nsangu andi, mutu ususu agorungula ubijaba.

¹¹ Ndagu jibatu babi jiupansu tumba ndagu jibatu basungama jiutsinganga.

¹² Nsila aji mutu etasi jivu jiwelimina, jisupuyi o dufu.

¹³ Ava dikeki divu murima urungula ubanganga na munyongu; ava nsangu jiusukila munyongu uisiali.

¹⁴ J andi agumapembuga nsila otopulu na bifu biandi; mutu muboti olaba ubueji na motsu amavu nandi.

¹⁵ Yiduka evayili motsu amabevosi yitu tumba mungo malubu elemakelula.

¹⁶ Mungo diela ana yida-mamba na orina mabi tumba yiduka ana dunangu mu mbari ekelaba awelimina.

¹⁷ Jandi aguisundili unyoga evayi kulini, jandi agumabasa na ndunsulu ekerombisa uvinu.

¹⁸ Biduka biudila buduka tumba diela dibango malubu divu nderi dugaba duogu.

¹⁹ Batu babi bogudama va gusu batu baboti nesi va makotulu mamandagu mabatu basungama.

²⁰ Yijaga evinu nesi na mbatsi andi tumba aberondi bisina bavu bapuela.

²¹ Jandi oyilensi mutu nandi evayi disumu, ka muna ubueji gu uvu na jandi aguilasi yingeba ombu jogu abamakambulu!

²² Jogu abetasingi yika mabi bagetsiemuyi? Abetasi maboti bemavayi na nsangu na usigama.

²³ Yisalu yiotsu yiveyi digumba tumba uvosa novosa ugaa na tsongu.

²⁴ Busina buvu yisaku yibango diela, buduka bubiduka bubanganga buduka.

²⁵ Mbeji ajivosi ngensa jiwaki batu kalala tumba mundunsitsi evosi mamfurulu.

²⁶ Jandi oyidumi Fumu ana yisiku yiwara mu mbari avu yisuemunu yiandi.

²⁷ Uduma Fumu uvu nderi yileka yimonyu, uiwamusi mutu ugonga mirambu midufu.

²⁸ Ava batu bavu bapuela la bundumba bukaga; pa batu begambu la disukusulu dimusuga andi.

²⁹ Jandi agugesundili unyoga ana dujabu duneni tumba jandi aguisupdili unyoga etubuli buduka.

³⁰ Jandi aguvu sui onunanga tumba diwavi divu nderi nyama jitupa.

³¹ Ukambisa yijaga la usienga Nsambi agumamusunda; tumba ulasa yingeba ombu agumakambulu la duyitsu.

³² Mutu mubi amabetsu na mbivulu tsiandi tumba mutu usungama edili yisuemunu nesi va dufu duandi.

³³ Diela divu na bango dujabu tsia divu va gari biduka?

³⁴ Dusungugu duibangusi bulongu tumba masumu meburombisi yisonyi.

³⁵ Musalitsi aguvu na malubu edili maboti makaga tumba elasi kabu andi ombu oyimurombisi yisonyi.