Banongu 13 - La Sainte Bible en Langue Yipunu

¹ Muana udibaala aguvu na diela egulu malubu mataji andi tumba muana udibaala aguvu mudesitsi agekipi nsiembu.

² Mutu odilanga maboti mu diambu diposulu tsiandi tsiboti tumba ama basoyitsi badiela berombi la dikasi.

³ Jandi oyikebini na posulu tsiandi ekerombila monyu; jandi aguvu na mapopopu okerombisa ubungana.

⁴ Mutsoritsi ana nsala atsi agorungula uvotsa tumba oyisalingi na mangolu edilingi abi avu na nsala.

⁵ Mutu usungama evini mamfurulu; mutu mubi ekevaga mbunga na elabingi yisonyi.

⁶ Dusungugu duigayi abevayingi maboti tumba mbivulu tsirombisi muvayitsi umasumu dufu.

⁷ Bamosi bevayi nderi bisina bavu tumba bagaa na yima; basusu bevayi nderi bijaga bavu tumba bavu na tindi busina.

⁸ Busina bumutu buvu nderi tuga jimonyu andi tumba yijaga, anyi omuvayila mapemi?

⁹ Yijalala yibasungama yivu tindi yijalala tumba batu babi bavu nderi lambi ajitsimi.

¹⁰ Dunangu duirombisi yika mitsundu tumba diela divu na jogu abegulu malongi.

¹¹ Busina abumadilu masundila, butsiemuga tumba jandi aguigukiyi pesu pesu, abuandi bufunanga.

¹² Uviva noviva uiveyi murima buali tumba ditasa adimadugusu divu nderi muiri aguiveyi monyu.

¹³ Jandi oyilensi diambu ekerombisa diambu tumba jandi oyidumi maruma osaku.

¹⁴ Malongi mamungo diela mavu nderi yileka yimonyu, mowaka batu kalala mu mirambu midufu.

¹⁵ Tindi diela difunisingi duyitsu tumba batu babi bagodila abi berondi.

¹⁶ Mutu uotsu aguvu ulubuga evayingi motsu na dujabu tumba yiduka elasingi buduka buandi.

¹⁷ Yilumbi yibi yirombisi maguga tumba yilumbi yisigama yibeyingi dubembugu.

¹⁸ Bujaga na yisonyi bivu dikabu dijandi agumabusa mukilu tumba jandi aguikipi nsiembu ekakusunu.

¹⁹ Nsala atsimadugusu tsibeyi nsangu, la dibandu biduka bagerondili udunda mabi.

²⁰ Jandi oyinamingi bango diela oba mungo diela tumba jandi oyifubini na yiduka olaba uvura.

²¹ Maguga menami jogu abevayingi masumu tumba ubueji uvu yisaku yibatu basungama.

²² Disiala dimutu muboti diugengila bategula bandi tumba busina bumuvayitsi umasumu bumasuegulu mutu usungama.

²³ Bijaga bedili digumba o manungi mogu, batu bamosi betsiemuyi mu mbari bagaa na businganyi.

²⁴ Jandi oyibusi udimba muana andi emuvini tumba oyimurondi emukilisi.

²⁵ Mutu usungama ejangingi te na egukuru tumba mutu mubi yika ufu efu na nsala.