Banongu 11 - La Sainte Bible en Langue Yipunu

¹ Mudodu agugaa uwelimina uvu nsoruru ombu Fumu tumba yipitsulu ayivu yiwelimina yimulasi ubueji.

² Ava dunangu duvu, yisonyi yivu wandi; uviolila ubueji uba divolambombu.

³ Businganyi bubatu basungama buibawendisi. Ugambu udurondu u-agugaa na businganyi uimurombisi ubungana.

⁴ Mu yilumbu yibunsonsi busina bugaa na tsongu; yika dusungugu duiveyi monyu.

⁵ Businganyi bumutu usunda buibuejisi nsanunu andi tumba batu babi bokeboka na mbivulu tsiogu.

⁶ Businganyi bubatu basungama buibagobuli tumba batu abagaa na businganyi bokebunga na ndunsulu tsiogu.

⁷ Dufu dumutu mubi duitsiemusi matasa mandi motsu; sinsa viri ditasa dibusina buandi.

⁸ Mutu usungama amawaku kalala mu maguga mandi; mutu mubi evingi va mbura andi.

⁹ Mutu mubi ebungi mbatsi andi na posulu tsiandi tumba diela diwaki batu basungama kalala.

¹⁰ Musiengi uotsu yika nsangu na nsangu ava batu basungama belungili; tumbai besangili ava batu babi befuangingi.

¹¹ Musiengi uikakusu na miula mibatu baboti tumba uidesu mu diambu diposulu tsibatu babi.

¹² Jandi oyilensi mutu nandi agaa na diela tumba mutu aguvu na dujabu avu sui.

¹³ Jandi oyisamuni mfuengululu etubuli bisuegu tumba oyibisueyi orungula uvagulu yitu.

¹⁴ Ugambu na malubu batu bapuela bebungini; milonsi mipuela miurombisa ndungulu.

¹⁵ Aguivangini ufuta miganu mingana olaba uvura; aguibusi uvangana obanganga sui.

¹⁶ Dikongu dimugetu edili bundumba; dibaala adivu na mangolu edili busina.

¹⁷ Mutu muboti ekevayi maboti tumba mungo dikasi eketsoyisa.

¹⁸ Mutu mubi esali yisalu ayimudunsi tumba oyiduki dusungugu osaku yisaku yiboti.

¹⁹ Dusungugu duiveyi monyu tumba oyivayingi mabi edili dufu.

²⁰ Bango penda bavu nsoruru ombu Fumu tumba abavu na dusungugu bemulasi ubueji.

²¹ Dingensa mutu mubi okilusu tumba abasungama botsu bagokilusu.

²² Nana moru ulora uvu mu mbasu ngulu dedi mosi na mugetu muboti agugaa na diela.

²³ Nsala tsibatu basungama yika uvaganga maboti tumba batu babi bolasu kabu jiNsambi.

²⁴ Jogu abegabi tsiri utsikadana bebangingi tindi bisina tumba mungo nyinga obanganga tindi yijaga.

²⁵ Jandi oyivayingi maboti oba na digumba; jandi oyivotsi puila jimutu nandi, puila andi jiuvotsu wandi.

²⁶ Batu besiengi aguisueyi putu tsiandi tumba aguitsisumbisi ana duyitsu.

²⁷ Jandi oyirombingi maboti olabanga monyi tumba oyirombingi mabi omalabanga.

²⁸ Jandi oyikevega uduka busina buandi oberuga tumba batu basungama boba nderi miri amivinsingi magaji.

²⁹ Jandi oyirombisi musosi mu yifumba yiandi obialila punga; yiduka oba musalitsi umungo diela.

³⁰ Bifu bimutu usungama bivu nderi miri amiveyi monyu; mungo diela eduti batu.

³¹ Guluanu, lesa mutu usungama edili dikabu diandi vava tsi tambusa na mutu mubi na muvayitsi masumu!